Eksodusi 12 - Tshwa Bible

A Pasika.

¹ Jehova i lo wulawula ka Mosi ni ka Aroni le tikweni ga Gipite, aku:

² Leyi: hweti yi tava yo sangula tihweti ka nwina, yi tava hweti yo sangulisa a lembe.

³ Byelani wontihe hlengeletano wa va ka Israeli, muku: Hi siku ga wukhume ga hweti leyi, munwe ni munwani a ti hlawulele a yivana kutani ximhutana kota mingango ya vararu vabye; a ngango ni ngango wu tava ni yivana ya wona kutani ximhutana xa wona.

⁴ Kasi loku a vanhu va ngango lowo va nga ringani ku mbheta a yivana, va ta patsana ni lava va gamekeneko navo, mu hlaya a tsengo wa vanhu mu pima kota lezi munhu a gisako zona.

⁵ Ni yivana a yive ya hamba leyi yi nga lamalangiko, na yi hi ni lembe ginwe; mu ta yi hlawula xikari ka tiyivu kutani xikari ka timbuti.

⁶ Mu ta yi hlayisa kala siku ga wukhume ni mune ga hweti leyi; zonake yi ta tlhabyiwa laha gambyeni hi hlengeletano wontihe wa ka Israeli. Deut. 16:6

⁷ A va teke a nkhata wa kona va tota a timhanze timbiri ta laha nyangweni ya yindlu leyo va gelako ka yona.

⁸ Gona wusiku gwalego a vage a nyama yi wocilweko; vaga zinwe ni zibaba zi nga hiko na comelo, ni matluka yo bava.

⁹ Mu ngagi na yi nga buvangi; kambe mu nga yi bhiki hi mati, kanilezi wocani hi nzilo; a hloko ni masonzo ni za lomu nzeni.

¹⁰ Mu ngo siyi ni nchumu xo chikela manziko; lezi zi ta nga sala hisani ni mixo, mu zi hisa laha nzilweni.

¹¹ Mu ta yiga kota lezi: Mu bohile ziwunu za nwina, na mu ambele a zilato mikonzweni ya nwina, mu khomile nhonga canjeni ga nwina; muga hi kuhatlisa. I Pasika ga Jehova.

¹² Hakuva ka gona wusiku lego nzi ta hunza lomu tikweni ga Gipite, nzi daya a matewula wontihe ya tiko ga Gipite, ya vanhu ni ya zifuyo; zonake nzi ta lamula vanungungulu vontlhe va Gipite. Hi mina Jehova. Mitse. 33:4

¹³ A nkhata wu tava xikombiso xa nwina, ka tiyindlu leti mu nga ka tona; loku nzi wona nkhata, zonake nzi ta hunza; kasi a mhango yi nga engheni xikari ka nwina yi mu daya, xikhati lexi nzi dayako vaGipite.

¹⁴ Lego siku gi tava xialakanyiso ka nwina; mu ta gi hlayisa giva siku ga ximuse ka Jehova zizukulwaneni zontlhe za nwina: ku tava xiyimiso xa kala kupinzuka.

¹⁵ Ntlhanu wa masiku hi mambiri mu taga zibaba zi nga hiko na comelo; hi siku go ranga mu ta humesa a comelo lomu tindlwini ta nwina; Hakuva loye a ta ngaga a zibaba zi comelweko, kusukela siku go sangula kala siku ga wuntlhanu ni mambiri, loye munhu i ta tsemiwa xikari ka vaIsraeli.

¹⁶ Hi siku go ranga mu tava ni ntlhangano wa kubasa; wu tava kona kambe hi siku ga wuntlhanu ni mambiri; ka lawo masiku mu nga tiri hambu ni ntiro munwe, sine a ntiro wo longisa a kuga ka vanhu basi.

¹⁷ Mu ta hlayisa a mubuzo wa zibaba zi nga hava comelo, hakuva ka siku lego nzi lo humesa mabandla ya nwina tikweni ga Gipite; mu ta hlayisa siku lego zizukulwaneni za nwina, ku tava xiyimiso xa kala kupinzuka.

¹⁸ Hi hweti yo ranga, hi siku ga 14 ga hweti, laha gambyeni mu taga zibaba zi nga hava comelo, kala siku ga 21 ga hweti laha gambyeni. Levi 23:5; Mitse. 28:16; Jox. 5:10

¹⁹ Lomu ka masiku ya ntlhanu ni mambiri ku nga dzuki ku kumiwa a comelo lomu tindlwini ta nwina, hakuva loyi a gako lezi zi comelweko, i ta tsemiwa lomu hlengeletanweni ya va ka Israeli, hambu loku a hi muluveli, kutani na nga xisumbulwa xa nwina.

²⁰ Mu nga dzuki muga lezi zi comelweko; lomu tindlwini ta nwina tontlhe mu taga lezi zi nga hiko na comelo.

²¹ Zonake Mosi i lo vitana masingalakati wontihe ya va ka Israeli, aku ka vona; Yanani mu ya hlawula a yivana khwatsi hi tsengo wa mingango ya nwina, mu tlhava Pasika.

²² Mu ta teka a musase wa hisope mu wu peta lomu nkhateni lowo wu ta ngava lomu ngelweni, mu tota timhanze ta laha nyangweni ya yindlu; ku nga dzuki ku huma munhu hi lomu ndlwini yakwe na gi nga seca.

²³ Hakuva Jehova i ta hunza kasi ku ya daya vaGipite; kasi loku a wona a nkhata lomu timhanzeni ta laha nyangweni ka tiyindlu ta nwina, i ta hunza basi hi lomu tinyangweni, na a nga vumeli mudayi ku enghena lomo a mu daya.

²⁴ Nwina mu ta hlayisa zileletelo lezi, zona zi tava xiyimiso ka nwina ni ka vanana va nwina kala kupinzuka.

²⁵ Laha mu ta nga chikela ka tiko legi Jehova a ta nga mu nyika gona, kota lezi a wulileko, mu ta hlayisa a ziyimiso lezi.

²⁶ Laha a vanana va nwina va ta nga mu wutisa, vaku; Xialakanyiso muni lexi ke?

²⁷ Mu taku ka vona; Lowu muphahlo wa Pasika ga Jehova loyi a nga hunza lomu ka tiyindlu ta vanana va ka Israeli le Gipite, xikhati lexo a nga daya vaGipite, a ponisa a tiyindlu ta hina. Ni vanhu va lo korama va khozela.

²⁸ A vanana va ka Israeli va lo famba va ya maha lezo; va lo maha khwatsi hi lezi Jehova a wulileko ka Mosi ni ka Aroni.

A kudawa ka matewula.

²⁹ Zonake hi laha xikari ka wusiku, Jehova i lo daya matewula wontihe ya tiko ga Gipite, kusukela ka matewula ya Faro, loyi a tshamako xitshanwini xakwe, ku kala ka matewula ya tiperesu leti ti nga lomu paxweni, ni matewula ya zifuyo zontlhe.

³⁰ Faro i lo vuka ni wusiku, ni malanza yakwe wontihe, ni vaGipite vontlhe; ku wa hi zirilo za hombe lomo Gipite, hakuva ku wa nga hi kona yindlu yi nga hi hava xirumbi.

³¹ Zonake i lo vitana Mosi na Aroni gona wusiku gwalego, aku ka vona: Sukani mu huma lomu tikweni ga mina, nwina ni vanana va ka Israeli, mu ya khozela Jehova khwatsi hi lezi mu wulileko.

³² Tekani tiyivu ta nwina ni tihomu ta nwina, khwatsi hi lezi mu wulileko, mu famba, minawu mu nzi katekisa.

³³ Zonake a vaGipite va lo kurumeta vanhu ku hatlisa va huma lomu tikweni gabye; hakuva va waku: Hi tafa hontlhe.

³⁴ Zonake a vaIsraeli va lo teka a mapa ma nga comelwangiko, va teka ni zibya zo maha ha zona zibaba, va bohelela lomu ka tinguwo tabye, va zi rwala makatleni yabye.

³⁵ A vanana va ka Israeli va lo maha khwatsi hi lezi Mosi a nga va byelile; va lo kombela ka vaGipite a zibya za siliva, ni za nzalama, ni tinguwo.

³⁶ Zinghaho Jehova i lo nyika thomo ka vanhu vakwe mahlweni ka vaGipite, lezaku va va nyika. Zonake va lo wutlela vaGipite.

A va ka Israeli va huma Gipite.

³⁷ Zonake a vanana va ka Israeli va lo suka Ramsese, vaya Sukote, va wa hi 600,000 wa vavanuna, ku nga hlayiwi ni vanana.

³⁸ Laho ku lo suka zinwe navo a vanhu va tinwani tixaka, ni mitlhambi ya tiyivu, ni ya tihomu to tala nguvu.

³⁹ Zonake va lo bhika zibaba zi nga comelwangiko za mapa lawa va nga huma nawo hi le Gipite, hakuva zi wa nga comelwangi, hi: lezi va loya hi ku hlongolwa le Gipite, hikwalaho va lo tsanzeka ku kuma xikhati xo ti longisela mbuva.

⁴⁰ A malembe laya a vanana va ka Israeli va nga tshama Gipite ma wa hi 430. Gen. 15:13; Miti. 7:6; Gal. 3:17

⁴¹ Zonake a kugumeseni ka 430 wa malembe, hi siku lego a mabandla wontihe ya Jehova ma nga huma tikweni ga Gipite.

⁴² Wusiku lego gi fanele ku hlayiselwa Jehova, hakuva i va humesile ha gona a tikweni ga Gipite; lego wusiku gi ta hlayiselwa Jehova zizukulwaneni zontlhe za vanana va ka Israeli.

⁴³ Zonake Jehova aku ka Mosi na Aroni: A xiyimiso xa Pasika hi lexi: Ngha ku nga hi kona muluveli xikari ka nwina a ta ngaga Pasika;

⁴⁴ kanilezi a nanza ga munhu legi gi xabyilweko hi mali, loku a mu maha nkwera, hi kona a ta ngaga Pasika.

⁴⁵ A muluveli ni loyi a tirelako mali, ngha va ngagi Pasika.

⁴⁶ Yi ta gelwa lomu ndlwini; u nga humi lahandle ni nyama ya kona, mu nga dzuki mu tshova a rambu ga kona. Mitse. 9:12; Joh. 19:36

⁴⁷ Wontihe hlengeletano wa ka Israeli wu ta maha lezo.

⁴⁸ Loku a wamatiko loyi a luvelako xikari ka nwina a lava ku maha Pasika ka Jehova, i fanele ku va maha mikwera vontlhe vavanuna va ngango wakwe, zonake i ta tshinela aga Pasika: hakuva i ta ku khwatsi hi loyi a belekilweko lomu lixakeni la nwina; kasike loyi a nga kala ku enghena wukwera, cima a nga taga Pasika.

⁴⁹ Ku tava nayo munwe, a ka loyi a belekilweko lomu lixakeni la nwina ni ka wamatiko loyi a luvelako xikari ka nwina.

⁵⁰ Zonake a vanana va ka Israeli va lo maha khwatsi hi lezi Jehova a wulileko ka Mosi na Aroni; va lo maha zalezo.

⁵¹ Hi lego siku, Jehova i lo humesa a vanana va ka Israeli le tikweni ga Gipite hi mabandla yabye.