Deuteronome 5 - Tshwa Bible

¹ Na Mosi i lo vitana vontlhe a vanana va ka Israeli, aku kabye: Ingisani, va ka Israeli, a milayo ni zileletelo lezi nzi wulako nyamutlha lomu tindleveni ta nwina; mu zi gonza ni ku chela kota hi ku zi hlayisa.

² Jehova Nungungulu wa hina i mahile xivumelwano zinwe na hina le Horebe. Ekso. 19:5

³ Jehova a nga mahangi lexi xivumelwano ni vararu va hina, kanilezi i zi mahile na hina lava hi nga kona laha nyamutlha, ha ha hanyako hontlhe.

⁴ Jehova i wulawulile na nwina le xitsungeni na mu cuwukana zinwe naye, na a hi xikari ka nzilo;

⁵ mina nzi wa yimile xikari ka nwina na Jehova, ku mu tlhamusela a gezu ga Jehova, hakuva mu wa chava a nzilo lowo, a mu kanzihangi xitsungeni; aku ngalo: Ekso. 19:16; 20:18

⁶ Hi mina Jehova Nungungulu wa wena, loyi a ku humesileko tikweni ga Gipite a ndlwini ya wukhumbi.

⁷ U nga ta kuva ni vanwani vanungungulu mahlweni ka mina.

⁸ U nga ti maheli xifananiso xi vatlilweko xa zilo lezi zi nga le hehla tilweni, ni xa lezi zi nga lahasi misaveni, hambu ni xilo xa lezi zi nga lomu matini lahasi ka misava.

⁹ U nga zi khizameli, hambu ni ku zi khozela; hakuva mina Jehova Nungungulu wa wena, nzi Nungungulu wo pinyama, loyi a tsayisako a vanana hi kota ya zionho za vapswali vabye, kala ka xizukulwana xa wunharu ni xa wumune xa lava va nzi vengako. Ekso. 34:7; Mitse. 14:18; Jer. 32:18

¹⁰ Kanilezi nza va mahela wuxinji kala ka xizukulwana xa khume ga mazana xa lava va nzi ranzako, va hlayisako milayo ya mina.

¹¹ U nga hlakani hi vito ga Jehova, Nungungulu wa wena, hakuva Jehova a nga ta mu khoma kota munhu a nga hava nanzu, loyi a hlakanako hi vito gakwe.

¹² Hlayisa a siku ga Sabado u gi basise, kota lezi Jehova Nungungulu wa wena a ku leleteleko.

¹³ U ta tira ntlhanu wa masiku ni ginwe, u maha yontlhe mitiro ya wena;

¹⁴ kanilezi hi siku ga wuntlhanu ni mambiri i Sabado ga Jehova Nungungulu wa wena. U nga tiri ntiro hi siku lego, wena ni mufana wa wena, ni nhanyana wa wena, ni xitiri xa wena xa wanuna ni xa wasati, hambu ni homu ya wena, ni mbongola ya wena, ni xinwani xifuyo xa wena, ni muluveli loyi a nga mutini wa wena; kasi a xitiri xa wena xa wanuna ni xa wasati va fela ku humula kota wena. Gen. 2:2; Ezek. 20:12; Maheb. 4:4

¹⁵ Hakuva u fela ku alakanya lezaku wenawu u wa hi xitiri le tikweni ga le Gipite, kanilezi Jehova Nungungulu wa wena i ku humesile hi canja ga ntamu gi tlakukileko, hikwalaho Jehova Nungungulu wa wena i ku leletele ku hlayisa a siku ga Sabado.

¹⁶ Chava raru wa wena ni nyine wa wena, kota lezi Jehova Nungungulu wa wena a ku leleteleko, kasi a masiku ya wena ma ta engetelwa, mu katekiswa laha misaveni leyi Jehova Nungungulu wa wena a ku nyikileko.

¹⁷ U nga dayi.

¹⁸ U nga bhayi.

¹⁹ U nga yivi.

²⁰ U nga lumbeti wakelane wa wena hi wumboni ga mawunwa.

²¹ U nga naveli sati wa muakelane wa wena, u nga naveli a yindlu ya muakelane wa wena, hambu ni simu gakwe, ni xitiri xakwe xa wanuna ni xa wasati, ni homu yakwe, ni mbongola yakwe, hambu ni xihi xilo xa muakelane wa wena.

²² Leti timhaka ti lo wulawuliwa hi Jehova ka tlhangano wontihe wa nwina le xitsungeni, na a hi lomu nzilwehi, ni refu, ni munyama, a wulawula hi gezu ga hombe, a nga engetelangi nchumu. I lo tsala leti timhaka ka timbila timbiri ta maribye a nzi nyika.

²³ Laha mu ngazwa a gezu na gi huma hi lomu munyameni, ni laha a xitsunga na xi vura nzilo, mu lo tshinela ka mina hi tihosana tontlhe ta tinyangwa ta nwina zinwe ni masingalakati,

²⁴ mu ta ku ngalo: Languta, Jehova Nungungulu wa hina i hi kombisile kungangamela kakwe ni wukulu gakwe, hi zwile a gezu gakwe gi huma lomu nzilweni; hi wonile nyamutlha lezaku Nungungulu a wulawula ni vanhu, ni vanhu va ha hanya.

²⁵ Makunu hi ta fela yini ke? Hakuva a nzilo lowu wa hombe wu ta hi lovisa; loku ho engeta kambe hizwa a gezu ga Jehova Nungungulu wa hina, hi tafa.

²⁶ Hakuva mbamani va ngazwa kukotisa hina a gezu ga Nungungulu loyi a hanyako na gi wulawula hi lomu nzilweni, va hanya ke? Vala. 13:22

²⁷ Yana wena wece, u yazwa zontlhe lezi zi wuliwako hi Jehova Nungungulu wa hina, u ta ta hi byela zontlhe lezo Jehova Nungungulu wa hina a ta nga ya ku byela, hina hi ta ta ingisa hi zi maha.

²⁸ Jehova i zwile timhaka ta nwina leti mu nga wa wulawula na mina, na Jehova i te ngalo ka mina: Nzi zwile timhaka leti a vanhu va wulawulileko ka wena, va wulile khwatsi zontlhe.

²⁹ Ko khwatsi va ngava ni timbilu ta xichavo ha mina, va hlayisa milayo ya mina yontlhe xontlhe xikhati; va wa ta tshameka ni vanana vabye kala kupinzuka!

³⁰ Famba u ya va byela, uku: Tlhelelani matendeni ya nwina,

³¹ kanilezi wena tshama laha zinwe na mina, nzi ta ku byela yontlhe milayo ni timhaka ni zileletelo; lezi u ta nga ya va gonzisa zona kasi va fela ku ya zi maha lomu ka tiko legi nzi va nyikileko ku ya gi fumela.

³² Chelani kota, mu maha kota lezi Jehova Nungungulu wa nwina a mu leleteleko; mu nga hambukeli xineneni, hambu xibhabheni,

³³ kanilezi fambani hi yontlhe ndlela leyi Jehova Nungungulu wa nwina a mu leleteleko, kasi mu fela ku hanya, mu tshameka; ni lezaku kasi masiku ya nwina ma fela ku anza a tikweni legi mu yako ku ya gi fumela.