Deuteronome 4 - Tshwa Bible

¹ Makunu, Israeli, ingisa milayo ni zileletelo lezi nzi mu gonzisako, lezaku mu zi maha, kasi mu fela ku hanya, mu ya enghena mu fumela a tiko legi Jehova Nungungulu wa vararu va nwina a mu nyikako gona.

² Mu nga engeteli ka lezi nzi mu leleteleko zona; ni kambe mu nga hunguli nchumu xa zona; kanilezi mu ta hlayisa a milayo ya Jehova Nungungulu wa nwina, leyi nzi mu leleteleko yona. Jox. 1:7; Mav. 30:6; Kuv. 22:18

³ A mahlo ya nwina ma wonile lezi Jehova a mahileko hi kota ya Baal-Peori; hakuva vontlhe lava va nga lanzela Baal-Peori, Jehova Nungungulu wa wena i lo va lovisa xikari ka nwina.

⁴ Kanilezi nwina lava mu namareleko Jehova Nungungulu wa nwina, nwentlhe ma ha hanya kala nyamutlha.

⁵ Langutani, nzi mu gonzisile milayo ni zileletelo, kota lezi Jehova Nungungulu wa mina a nzi leleteleko, kasi nwina ma fela ku lanzela yona ka tiko legi mu yako mu ya fumela gona.

⁶ Mu ta yi hlayisa ni ku yi maha, hakuva legi gi tava wutlhari ni kupima ka nwina le kuwoneni ka matiko lawa ma ta ngazwa hi milayo leyi yontlhe, va taku ngalo: Kunene, legi i tiko ga hombe, gi nga ni wutlhari ni kupima!

⁷ Hakuva hi gihi tiko legi gi nga ni nungungulu wa gona laha kusuhani, khwatsi hi lezi Jehova Nungungulu wa hina a nga kusuhani na hina ka wontihe masiku lawa hi khongelako kakwe?

⁸ Ni lezaku gi kwihi kambe a tiko ga hombe legi gi nga ni milayo ni zileletelo zi lulamileko khwatsi hi yontlhe milayo leyi nzi yi vekako nyamutlha mahlweni ka nwina?

⁹ Ntsena lezaku ti wonele, u hlayisa khwatsi muhefemulo wa wena, kasi u nga rivali lezi u zi wonileko hi mahlo ya wena; ni lezaku zi nga dzuki zi huma lomu mbilwini ya wena ni ka gihi siku legi u hanyako; kanilezi u ta tivisa a vanana va wena ni vazukulu va wena Ekso. 19:17; Deut. 6:7

¹⁰ hi siku lego u nga yima ha gona mahlweni ka Jehova Nungungulu wa wena le Horebe, xikhati lexo Jehova a ngaku ka mina: Tsombanyisa vanhu kasi va tazwa a timhaka ta mina, kasi va fela ku gonza ku nzi chava ka wontihe masiku lawa va ta nga hanya laha misaveni, kasi va fela ku gonzisa a vanana vabye.

¹¹ Hakunene nwina mu lo tshinela mu yima lahasi ka xitsunga; na xitsunga xi vura nzilo kala xikari ka tilo; ni kambe ku wa hi ni wusiku ni refu ni munyama.

¹² Zonake Jehova i lo wulawula na nwina na a hi xikari ka nzilo; nwina mu lozwa a gezu ga timhaka, kanilezi a mu wonangi a xiyimo xakwe, saseka a gezu ntsena.

¹³ Na yena i mu tivisile a xivumelwano lexi a mu leleteleko ku xi hlayisa, yi nga yona milayo ya khume, i lo yi tsala ka timbila timbiri ta maribye. Ekso. 31:18; 34:28

¹⁴ Xikhatini xwalexo Jehova i lo nzi leletela a kuva nzi mu gonzisa milayo ni zileletelo lezi mu ta nga zi hlayisa tikweni legi mu yako ku ya gi fumela.

¹⁵ Ti woneleni futsi, hakuva a mu wonangi a xifananiso hambu ni xinwe a siku legi Jehova a nga wulawula ka nwina le Horebe, na a hi lomu xikari ka nzilo,

¹⁶ mu nga dzuka mu onha hi ku ti mahela a xifananiso xi vatlilweko, xi fananisako nungungulu, kutani xifananiso xa wanuna, kutani xa wasati,

¹⁷ kutani xifananiso xa xihari xi fambako laha misaveni, kutani xifananiso xa xinyanyani xi hahako le tilweni,

¹⁸ ni xifananiso xa xihari xi kokakokako laha misaveni, ni xifananiso xa xidluwani xi hanyako lomu matini lahasi ka misava.

¹⁹ Ni loku u tlakusa a mahlo ya wena le tilweni u wona gambo ni hweti, ni tinyeleti, ni wontihe mabandla ya le tilweni, u nga dzuki u navela ku khizama mahlweni ka zona u zi khozela; hakuva Jehova Nungungulu wa wena i nyikile lezi zilo ka wontihe matiko ma nga lahasi ka tilo, lezaku zi tava tshomba ya wona. 2 Tih. 21:5; Jer. 8:2

²⁰ Nguvu nwina, Jehova i mu humesile khombarini ga nzilo wa le Gipite, kasi mu fela ku maha vanhu vakwe kota lezi mu zi wonako nyamutlha.

²¹ Mbuyangwana! Jehova i nzi holovele hi kota ya nwina, a kala a hlambanya lezaku cima nzi nga tlhatuka a Jordani, nzi enghena tikweni lego go saseka, legi Jehova Nungungulu wa wena a ku nyikileko gona, a kuva tshomba ya wena.

²² Hakuva mina nzi tafa ka legi tiko; cima nzi nga ta tlhatuka Jordani; kanilezi nwina mu ta tlhatuka mu ya fumela a tiko lego go saseka.

²³ Tlharihani, mu nga rivali a xivumelwano lexi Jehova Nungungulu wa nwina a xi mahileko zinwe na nwina, mu nga tlheleli ka xifananiso xi vatlilweko, xi fananisako lezi Jehova Nungungulu wa wena a ku tsimbetelako zona.

²⁴ Hakuva Jehova Nungungulu wa wena i nzilo lowu wu hisako, i Nungungulu loyi a pinyamako.

²⁵ Laha u ta nga beleka a vanana ni vazukulu, ni laha mu ta nga ngha mu tshamile kale lomo, zonake mu ti onha, ni loku mu ti vatlela zifananiso leʼzi fananisako kani hi xihi xilo, mu maha kubiha mahlweni ka Jehova Nungungulu wa nwina, mu mu zangarisa,

²⁶ mina nza vitana nyamutlha a tilo ni misava a kuva vakustumunyu vo mu kecara, lezaku nwina mu ta yafa hi kuhatlisa a tikweni lego mu yako ku ya gi fumela, le tlhatukweni wa Jordani, cima nwina mu nga ta simama ni masiku ya nwina mu hanya, hakuva mu ta ya lobyiswa hakunene.

²⁷ Jehova i ta mu hangalasa xikari ka matiko, zonake mu ta siyiwa mu hi tsengwana wutsongwani xikari ka matiko lawo Jehova a ta nga mu yisa ka wona.

²⁸ Leyo mu ta ya khozela vanungungulu va mahilweko hi mandla ya vanhu; vanungungulu va mahilweko hi tisinya ni maribye, lava va nga woniko, hambu kuzwa, ni kuga ni ku nuheta.

²⁹ Hi kona mu ta nga ya lava Jehova Nungungulu wa nwina; lahoke loku u ya mu lava hi mbilu ya wena yontlhe, ni muhefemulo wa wena wontihe, u ta mu kuma. Isa. 55:6; Hos. 3:5

³⁰ Laha u ta ngava zikaratweni, ni loku lezi zilo zontlhe zi chikela ka wena, hi zikhati za ha tako u ta tlhelela ka Jehova Nungungulu wa wena, zonake u ta ingisa a gezu gakwe.

³¹ Hakuva Jehova Nungungulu wa wena i Nungungulu wa tipswalo; cima a nga ta ku tsika, hambu ku ku lovisa, ni kambe a nga ta rivala a xivumelwano xa vararu va wena lexi a hlambanyileko ka vona.

³² Wutisa ta masiku ya kale lawa ma ku rangeleko, kusukela a siku lego Nungungulu a nga vanga munhu laha misaveni, kusukela kusanguleni ka tilo kala magumeso ya gona, xana ku na nga humelela a zilo za hombe zo kota lezi ke? kutani va na ngazwa zo kota lezo ke?

³³ Hi vahi vanhu va ngazwa kota wena a gezu ga Nungungulu na gi wulawula lomu nzilweni, va hanya ke? Ekso. 19:18

³⁴ Kutani i kona munwani nungungulu loyi a nga ringa ku ya wutla vanhu xikari ka wunwani mufumo, hi zikarato ni ziwoniso ni zihlamaliso ni kulwa hi canja ga ntamu gi tlakukileko, ni mitiro ya hombe yi chavekako, kota lezi Jehova Nungungulu wa nwina, a nga mu mahela zontlhe le Gipite kuwoneni ka nwina?

³⁵ Wena u kustumunyu wa lezi zilo, kasi wena u fela ku zi tiva lezaku Jehova i Nungungulu, a ku kona munwani ahandle kakwe.

³⁶ I ku mahile uzwa a gezu gakwe na a hi tilweni a ku gonzisa; ni laha misaveni i ku wonisile a nzilo wakwe wa hombe; na wena u zwile a timhaka takwe lomu nzilweni.

³⁷ Hi lezi i ranzile vararu va wena, zonake a hlawula a vazukulu vabye anzhako ka vona, yena wutsumbu a ku humesa le Gipite hi ntamu wakwe wa hombe,

³⁸ ni ku hlongola mahlweni ka wena a matiko lawa ma ku hunzako hi wukulu ni ntamu, ni ku ku enghenisa wena lomu tikweni gabye, ni ku ku nyika gona gi maha a tshomba ya wena kota lezi u zi wonako nyamutlha lezi.

³⁹ Zi tive nyamutlha, u zi alakanya mbilwini ya wena, lezaku Jehova i Nungungulu loyi a nga hehla tilweni ni lahasi misaveni; a ku na munwani,

⁴⁰ hlayisa milayo yakwe ni zileletelo zakwe lezi nzi ku leletelako nyamutlha, kasi u fela ku humelela, ni vanana va wena anzhako ka wena, niku kasi a masiku ya wena ma engetelwa laha misaveni leyi Jehova Nungungulu wa wena a ku nyikileko, a kuva ya wena kala kupinzuka.

⁴¹ Zonake Mosi i lo hlawula a miti yinharu le tlhatuko wa Jordani, hi le Mutsuwuka-gambo, Mitse. 35:6, 11; Jox. 20:2

⁴² kasi yi maha wuponelo ga mudayi loyi a dayako muakelane wakwe hi mhango, loyi a nga kala a mu venga tolo hambu tolweni; i ta tsutsumela ka leyi miti kasi a fela ku hanya.

⁴³ Hi Bezera lowu wu nga le xiwuleni, hi le libaleni, lowu wu nga ka Rubeni; ni Ramote le Gileade, wa va Gadi; ni Golani le tikweni ga le Baxani, wa va ka Manasa. Mosi a hlawutela kunyikwa ka Milayo.

⁴⁴ Lowu hi nayo lowu Mosi a nga wu yimisa ka vanana va ka Israeli:

⁴⁵ legi hi wumboni ni milayo ni zileletelo, lezi Mosi a nga nyika ka vanana va ka Israeli na va humile le Gipite,

⁴⁶ na va hi tlhatukweni wa Jordani le nzhelelweni ngomama ni Bet-Peori, le tikweni ga Sihoni a hosi ya maAmori, loyi a akileko le Hexboni, loyi Mosi ni vanana va ka Israeli va nga mu hlasela laha na va huma hi le Gipite.

⁴⁷ Va teka a tiko gakwe, ni tiko ga Ogi, a hosi ya le Baxani, tihosi timbiri ta vaAmori leti ti nga wa akile le tlhatukweni wa Jordani hi le Mutsuwuka-gambo.

⁴⁸ Kusukela le Aroera legi gi nga le mbhirini wa congo wa Amoni, kala le xitsungeni xa Sioni, xi nga Hermoni,

⁴⁹ ni libala lontlhe li nga tlhatukweni wa Jordani hi le Mutsuwuka-gambo, kala ku chikela le Bimbini ga Xiwula hi le lahasi ka Pisga.