Deuteronome 32 - Tshwa Bible

¹ Nwina matilo! zwanani, nzi ta wulawula; Ni misava a yi ingise timhaka ta nomu wa mina!

² A gonzo ya mina yi ta dona khwatsi i vula, A gezu ga mina gi ta tsakamisa khwatsi i nzhokati; Khwatsi i vula hehla ka byanyi go nyuka, Khwatsi manamula-nghala hehla ka byanyi!

³ Hakuva nzi taba hungu hi vito ga Jehova; Dumisani Nungungulu wa hina! Tis. 34:3

⁴ I Ribye, mitiro yakwe yi mbhelele; Hakuva tontlhe tindlela takwe ti lulamile; I Nungungulu wa kutsumbeka, loyi a nga hiko na kukanganyisa; I na ni wunene, i lulamile.

⁵ Lezi va ti onhileko, a hi vanana vakwe, Hi vona va nga ni nanzu; Lixaka li gombonyekileko ni lo hemba. Ekso. 32:9; Isa. 1:3; Mat. 12:39

⁶ Kaxana mu ta tlhelisela ka Jehova hi za kunghahi ke? Nwina vanhu va zipumbu, mu nga hiko na wutlhari? Kasi a hi yena dadani wa wena, loyi a ku mahileko ke? Hi yena a ku wumbileko a ku yimisa.

⁷ Alakanya masiku ya kaleloko; U khumbula malembe ya zizukulwana zi hunzileko, Wutisa a raru wa wena, i ta ku byela, Ni masingalakati ya wena ma ta ku hlawutela.

⁸ Loku Loyi a nga Hehla-hehla a nyikileko matiko a tshomba ya wona, Laha yena na a hambanyisile a vanana va vanhu, I lo tsala mimbhingano ya vanhu Khwatsi hi wunyingi ga vanana va ka Israeli.

⁹ Hakuva xiavelo xa Jehova hi vanhu vakwe; Jakobe xiavelo xa tshomba yakwe. Ekso. 19:5; 1 Ped. 2:9

¹⁰ I mu kumile xiwuleni, A xiwula xa tihuwa ti chavekako. I mu bhiyele, a mu wundla, I mu hlayisile khwatsi hi nzololo ya tihlo gakwe,

¹¹ Khwatsi hi gama loku gi vuxa mavinyani ya gona, Na gi haha hehla ka mavinyani ya gona; I lo tshambulutisa lezo tipapa takwe, a va teka, A va beleka lomu tipapeni ta yena. Ekso. 19:4; Isa. 63:9

¹² Lezo Jehova yece i lo rangela a vanhu vakwe, Ku wa nga hi na munwani nungungulu.

¹³ Yena i mu kanzihisile zitsungeni za misava, Israeli i gile mihanzu ya khwati; I mu anwisile hi wulombe ga lomu ribyeni, Ni mafura lawa ma humako lomu ribyeni go nonoha;

¹⁴ Ni mawomba ya tihomu, ni masi ya timbuti, Ni mafura ya tiyivu; Ni tihamba leti ti pswalilweko le Baxani, ni timhongo, Ni mapa ya mavele ma nanaselweko khwatsi. Mu nwile a vinya go nanziha, gi nga nkhata wa mauva.

¹⁵ Jexuruni a su kulukelana, a radlavanya. A kuluka, a zimuka, a tala hi mafura. Kanilezi a tsika Nungungulu loyi a mu wumbileko, A nyenya a ribye ga kuhanyiswa kakwe.

¹⁶ Va vuxile xiluse xakwe hi vanwani vanungungulu, Va mu zangarisile hi manyala.

¹⁷ Va khozelile madimoni lawa ma nga hiko Nungungulu, Ni vanungungulu lava va nga va tiviko, Vanungungulu vaswa, lava va chikelako lokuloku, Lava vararu va nwina va nga va chavangiko. Tis. 106:36; 1 Kor. 10:20

¹⁸ U tsikile a Ribye legi gi nga ku beleka, U rivele Nungungulu loyi a ku pswalileko.

¹⁹ Jehova i lo zi wona, a va tsika, A holovela vana vakwe va xinuna ni va xisati,

²⁰ Aku: Mina nzi ta va fihlela a nghohe ya mina, Nza nga wona lezi zi to humelela, Hakuva lixaka la ku gombonyeka, I vanana va nga tsumbekiko.

²¹ Vona va nzi vuxele xiluse hi lezi zi nga hiko Nungungulu, Va nzi zangarisile hi zilo zabye za hava; Nzi ta va vuxela xiluse hi lezi zi nga hiko vanhu, Nzi ta va zangarisa hi matiko ya zipumbu.

²² Hakuva a nzilo wa zanga ya mina wu vurisilwe, Wu vura kala le wutshanwini ga lava va fileko, Wu hisa misava zinwe ni mihanzu ya yona, Wu hisa ziseketelo za zitsunga.

²³ Nzi ta va anzisela makhombo, Nzi heta tigalala ta mina hehla ka vona.

²⁴ Va ta choma hi ndlala, va giwa hi kuhisa ka miri Ni ntungu lowu wo karata nguvu; Nzi ta va rumela a meno ya zivanza, Ni wuxungu ga zikokakoka za lomu tshurini.

²⁵ Lahandle va ta dawa hi tlhari, Ni lomu tindlwini va ta dawa hi kutshisa; A jaha gi ta lova khwatsi hi nhanyana, Ni loyi a anwako khwatsi hi xikhosana.

²⁶ Nzi ngalo: Nzi ta va hangalasa; Nzi ta vinya kualakanya ha vona xikari ka vanhu.

²⁷ Loku ku wa nga hi lezo nzi chavako a kutikulisa ka valala vabye; Lezaku a valala va ta kala va nga nzi pimi, Vaku: A mandla yahina ma tlakusilwe, A hi Jehova a nga maha lezi zilo zontlhe. Mitse. 14:15; Ezek. 20:14

²⁸ Hakuva vona i tiko gi nga hiko na makungo, Ku hava kupima ka vona.

²⁹ Loku va wa tlharihile ngha va zi pimile, Va alakanya kugumelwa ka vona.

³⁰ Xana munhu a nga hlongolisa kuyini a 1,000 wa vanhu ke? A vanhu vambiri va nga hlongola 10,000 wa vanhu ke? Loku a Ribye gabye gi nga va xavisangi, Ni loku Jehova a nga va nyikelangi ke?

³¹ Hakuva a ribye ga vanwani a gi koti a Ribye ga hina, Valala va hina va vumela mhaka leyi.

³² Hakuva a xivina xabye xi huma sinyeni ya Sodoma, Ni le masinwini ya Gomora; A mauva yabye mauva ya nyongwa, Zitata za wona za bava. Ezek. 16:49

³³ A vinya ga zona mbuxungu ga tinyoka, Ni wuxungu legi ga phiri.

³⁴ Xana zontlhe lezi a zi hlayiswangi magombeni ya mina, A zi vekwangi lomu bakweni ga mina ke?

³⁵ A kuphota ni kutlhelisela zi lumba mina, Zi vekelwe a siku lego a nkonzo wabye wu ta nga retemuka; Hakuva a siku ga kuxaniseka kabye gi tshinele, A zilo lezi va longiselweko zona zata hi xihatla.

³⁶ Hakuva Jehova i ta yimela vanhu vakwe, Ni kambe i ta hawukela malanza yakwe, Laha a ta nga wona lezaku a ntamu wabye wu mbhelile. Ni lezaku ku nga ta sala ni munwe wa vona. 1 Tih. 14:10; 2 Tih. 14:26

³⁷ Zonake i taku ngalo: Va kwihi vanungungulu vabye ke? Ni ribye gabye ga wuchavelo ke?

³⁸ Va kwihi a vanungungulu lava va ngaga mafura ya miphahlo yabye, Lava va nganwa a vinya ga minyikelo yabye? A va suke va mu hlanguta, A va mu vikele! Vala. 10:14

³⁹ Cuwukani makunu lezaku hi mi na nzoce nzi nga Nungungulu, Lezaku a ku kona munwani nungungulu ahandle ka mina. Hi mina nzi dayako, hi mina nzi hanyisako; Nza balesa phanja, nzi tlhela nzi holisa; A ku na munhu loyi a tlhatlhisako canjeni ga mina. 1 Sam. 2:6; Isa. 45:5; Hos. 6:1

⁴⁰ Hakuva nza tlakusa canja ga mina tilweni, Nziku: Nzi loyi a hanyako kala kupinzuka!

⁴¹ Loku nzi lota a xingwalangwanza xa tlhari ga mina, Ni loku nzi lamula hi canja ga mina, Nzi ta ti photela ka valala va mina, Nzi ta tlhelisela lava va nzi vengako.

⁴² Nzi ta nwisa tigalala ta mina hi nkhata, Ni tlhari ga mina gi ta xura hi nyama, Hi nkhata wa lava va tlhabyilweko ni wa va khomilweko, Ni tihloko ta tihosi ta valala.

⁴³ Bhumani nwina matiko, yimbelelani hi kutsaka zinwe ni vanhu vakwe, Hakuva Nungungulu i tlhelisele a nkhata wa malanza yakwe, Wa ti photela hehla ka valala vakwe, I maha nzhiho hi kota ya misava yakwe, ni vanhu vakwe. Tis. 9:13; Rom. 15:10; Kuv. 19:2

⁴⁴ Mosi i lota a ta wulawula ka vanhu a timhaka ta leli lisimu, na a hi na Joxua nʼwana Nuni.

⁴⁵ Laha Mosi a nga wa mbhetile ku wulawula tontlhe leti timhaka ka vontlhe Va ka Israeli, i te ngalo kabye:

⁴⁶ Hlayisani lomu timbilwini ta nwina a timhaka tontlhe leti nzi kustumunyako ha tona legi siku mahlweni ka nwina; mu ta leletela a vanana va nwina, va tazwa ni ku maha tontlhe timhaka ta lowu nayo.

⁴⁷ Hakuva a hi timhaka ta hava xikari ka nwina; kanilezi mbutomi ga nwina; hakuva mu ta lehisa ha tona a masiku ya nwina ka tiko legi mu yako ku ya gi fumela le tlhatukweni wa Jordani.

⁴⁸ Ka gwalego siku Jehova i lo byela Mosi, aku:

⁴⁹ Kanziha xitsungeni lexi xa Abarima, le xitsungeni xa Nebo lexi xi nga lomu tikweni ga Moabi, lexi xi xungeteneko ni Jeriko; zonake u ta ya wona a tiko ga Kanani legi nzi fumisako ka gona a vanana va ka Israeli.

⁵⁰ Na wena u ta yafa leyo ka lexo xitsunga u ta nga kanziha ka xona, zonake u ta amukelwa ka va ka nwina, khwatsi hi nakuloni Aroni, loyi a fileko le xitsungeni xa Hora a amukelweko ka va ka kabye;

⁵¹ hakuva mu nzi onhele xikari ka vanana va ka Israeli hi mhaka ya mati le Meriba le Kadexe, le xiwuleni xa Zini; hakuva nwina a mu nzi basisangi xikari ka vanana va ka Israeli.

⁵² Hikwalaho u ta ya wona a tiko gi nga mahlweni ka wena, kanilezi u nga ta enghena ka gona, gona tiko legi nzi nyikileko a vanana va ka Israeli.