Deuteronome 21 - Tshwa Bible

¹ Loku ku kumiwa a munhu a delweko lomu tikweni legi Jehova Nungungulu wa wena a ku nyikileko ku gi fumela, na te chanjala lahandle ka muti, na a nga tibyiwi loye a mu deleko;

² zonake a masingalakati ya wena ni Valamuli va wena va tata va ta pima a pfhuka wa kusukela laha ka loyi a delweko kala ku chikela ka miti leyi yi renzelekeleko loyi a delweko.

³ Zonake a masingalakati ya muti lowu wu nga kusuhani nguvu ni loyi a delweko, ma ta teka a thokazi ga homu, legi gi nga tiriswangiko, legi go kala gi nga se rwala a muyoko.

⁴ Ni masingalakati ya muti lowo va ta famba ni thokazi le congweni lowu wu khulungako wontihe masiku, laha ka wutshamu legi gi nga rimiwiko, ni laha ku nga byaliwiko, laho va ta tshova a nhamu ya thokazi le congweni.

⁵ Ni vapristi, a vana va Levi, va ta tshinela kusuhani, hakuva hi vona lavo Jehova Nungungulu wa wena a va hlawulileko a ku tira ku khozela yena, ni ku katekisa hi vito ga Jehova; hikwalaho a milomu yabye yi ta lamula ni ku rulisa tontlhe timholova ni mahungu wontihe ya ku balesana tiphanja.

⁶ Ni wontihe masingalakati ya muti lowu wu nga kusuhani ni xirumbi, va ta hlamba a mandla yabye hehla ka thokazi legi va gi tshovileko nhamu lomu nkoveni.

⁷ Zonake va ta wulawula, vaku: A mandla ya hina a ma halatangi lowu nkhata ni mahlo ya hina a ma wonangi nchumu.

⁸ Jehova! Tsetselela a vanhu va wena va Israeli, lava u va tlhatlhisileko, u nga tlheliseli a nkhata lowu wu nga hiko ni nanzu hehla ka vanhu va wena va Israeli! Zonake va ta tsetselelwa a nanzu wa nkhata.

⁹ Zinghaho wena u ta susa a nkhata lowu wu nga hiko ni nanzu xikari ka wena kasi mu maha kululama mahlweni ka Jehova.

¹⁰ Loku wena u hloma matlhari ku yalwa ni valala va wena, na Jehova Nungungulu wa wena a va nyikela mandleni ya wena u va khoma tihloko;

¹¹ loku a hi kona wasati xikari ka tihloko leto u mu wonako na sasekile, ni loku u mu ranza u alakanya ku mu maha sati wa wena,

¹² u ta mu neha ndlwini ya wena, na yena i ta cinga misisi ya hloko yakwe, ni ku tsema zikamba zakwe;

¹³ zonake i ta tlhatlha tinguwo ta wukhumbi gakwe, a tshama lomu ndlwini ya wena, na a kari a rilela raru wakwe ni mamani wakwe a hweti yinwe; anzhako ka lezo u ta mu teka a maha sati wa wena na wena u maha nuna wakwe.

¹⁴ Ni loku a nga ku xalalisi, u ta mu tsika a ti fambela, kanilezi u nga mu xavisi u xava mali ha yena, ni kambe U nga mu mahi khumbi, hakuva u mu wisile tingana.

¹⁵ Loku munhu a hi ni vasati vambiri, a ranza munwe, kanilezi a munwani a nga mu ranzi; loku vontlhe hi wumbiri gabye va mu belekela a vanana va vafana, loku matewula a hi mufana wa loyi a aliwako, Gen. 29:30

¹⁶ a siku lego a avelako tshomba ka vana vakwe, a nga yimisi a nʼwana wa loyi a mu ranzako mahlweni ka nʼwana wa matewula ya loyi a mu alako.

¹⁷ Kanilezi i ta nyika wutewula ka nʼwana wa loyi a mu alako, a mu avela xiavelo xi wuyetilweko kambiri ka zontlhe lezi a nga nazo; hakuva hi yena kusangula ka ntamu wakwe, ni wutewula gakwe.

¹⁸ Loku munhu a hi ni mufana a nga ni kanu, loyi a nga ingisiko a gezu ga raru wakwe, ni ga mamani wakwe; loyi waku hambu loku va mu laya, kanilezi a nga ingisi;

¹⁹ a raru wakwe ni nyine wakwe va ta mu khoma va mu heleketa mahlweni ka masingalakati ya muti wabye le nyangweni ya muti wabye;

²⁰ va ta ku ngalo ka masingalakati ya muti wabye: A nʼwana loyi wa hina; i na ni kanu, a nga ingisi a gezu ga hina, xifelembu, ni xidakwa.

²¹ Ni vontlhe vavanuna va muti va ta mu gandla hi maribye afa; hi ku maha lezo u ta susa kubiha xikari ka wena, zonake vontlhe va ka Israeli va ta zizwa va chava.

²² Ni loku munhu a mahile a xilo xo biha lexi xi fanelako a kuva afa, loku u mu daya, u mu hayeka laha sinyeni,

²³ a xirumbi xakwe xi nga tshami wusiku laha sinyeni; kanilezi u ta mu susa gwalego siku, hakuva loye a hayekilweko xinyenyeko ka Nungungulu, lezaku u nga nyenyezisi a tiko ga wena legi Jehova Nungungulu Wa wena a ku nyikileko gona a kuva tshomba ya wena. Gal. 3:13