Deuteronome 16 - Tshwa Bible

¹ U ta hlayisa a hweti ya Abiba u mahela Jehova Nungungulu wa wena a Pasika, hakuva a hweti ya Abiba hi yona a hweti leyo Jehova Nungungulu wa wena a ku humesileko ha yona ni wusiku le Gipite.

² U ta tlhavela Jehova Nungungulu wa wena a Pasika hi zifuyo za hombe ni za zitsongwani ka wutshamu lego Jehova a ta nga gi hlawula a ku veka a vito gakwe laho.

³ U ngagi a xibaba xi comelweko zinwe nago, u taga xibaba xi nga comelwangiko ntlhanu wa masiku ni mambiri, na xi hi xibaba xa kuxaniseka, hakuva wena u lo huma hi kuhatlisa le tikweni ga Gipite, u ta alakanya wontihe masiku ya wutomi ga wena a siku legi u humileko ha gona le tikweni ga le Gipite.

⁴ Ku nga dzuki ku woniwa a comelo lomu ngangweni ka wena tikweni gontlhe ga wena lomu ka ntlhanu wa masiku ni mambiri; kasike a nyama ya muphahlelo, lowu u ta nga phahlela ni gambo ga siku go ranga, yi nga sali kala manziko ni mixo. Ekso. 34:25

⁵ U nga tlhavi a Pasika ka miti leyi Jehova Nungungulu wa wena a ku nyikileko yona;

⁶ kanilezi u taya tlhava ka wutshamu lego Jehova Nungungulu wa wena a ta nga gi hlawula ku veka a vito gakwe laho; u ta yi tlhava laha gambyeni laha a gambo gi sangulako ku pela, hi xona xikhati lexi u humileko ha xona le Gipite.

⁷ Wena u ta yi woca, uga laha ka wutshamu lego Jehova Nungungulu wa wena a ta nga gi hlawula, zonake ni mixo u ta tlhelela mixaxeni ya wena.

⁸ Lomu ka ntlhanu wa masiku ni ginwe wena u taga zibaba zi nga hiko na comelo; hi siku ga wuntlhanu ni mambiri ku tava ni mutlhangano wa kubasa wa Jehova Nungungulu wa wena; u nga tiri ni ntiro munwe.

⁹ U ta hlaya 7 wa maviki; u ta sangula ku hlaya maviki lawo ya 7 hi xikhati lexo va sangulako ku hula timbewu;

¹⁰ zonake u ta mahela Jehova Nungungulu wa wena a mubuzo wa maviki; u nyikela hi kuranza ka mbilu ya wena, khwatsi hilezi Jehova Nungungulu wa wena a ku katekisileko ha zona.

¹¹ U ti tsakela mahlweni ka Jehova Nungungulu wa wena zinwe ni mufana wa wena, ni nhanyana wa wena, ni nanza ga wena ga xinuna ni ga xisati, ni muLevi loyi a nga xikari ka muti wa wena, ni muluveli, ni xisiwana, ni noni, lava va nga xikari ka nwina ka wutshamu lego Jehova Nungungulu wa wena a ta nga gi hlawula ku veka vito gakwe laho;

¹² na u alakanya lezaku wenawu u wa hi khumbi le Gipite, hikwalaho u ta hlayisa zileletelo lezi ni ku zi maha.

¹³ II tava ni mubuzo wa mixaxa lomu ka 7 wa masiku; loku u hulile a mavele ya minzhimbo ya wena, ni ya zigowolo za wena,

¹⁴ na wena u ta ti tsakela ka lowo mubuzo zinwe ni mufana wa wena, ni nhanyana wa wena, ni nanza ga wena ga xinuna ni ga xisati, ni muLevi, ni muluveli, ni xisiwana, ni noni, lava vontlhe va nga laha mutini wa wena.

¹⁵ Lomu ka 7 wa masiku, u ta maha mubuzo wa Jehova Nungungulu wa wena ka wutshamu lego Jehova a ta nga gi hlawula, hakuva Jehova Nungungulu wa wena i ta ku katekisa kontlhe kuhuleni ka wena, ni ka yontlhe mitiro ya mandla ya wena, hikwalaho u tava ni kutsaka hakunene.

¹⁶ Wanuna munwe ni munwani i ta ya ti wonekelisa mahlweni ka Jehova Nungungulu wa wena zikhati zinharu hi lembe, laha ka wutshamu lego Jehova a ta nga gi hlawula; lezo hi lezaku mubuzo wa zibaba zi nga hiko na comelo, ni mubuzo wa maviki, ni mubuzo wa mixaxa, kanilezi va nga ti wonekelisi mahlweni ka Jehova na va nga welelangi nchumu;

¹⁷ loyi ni loyi i ta neha a munyikelo wakwe kotisa lezi Jehova Nungungulu wa wena a mu katekisileko ha zona.

¹⁸ II ta yimisa Valamuli ni vatsali ka yontlhe miti leyi Jehova Nungungulu wa wena a ta nga ku nyika, hi tinyangwa ta wena; va ta lamula vanhu hi kululama.

¹⁹ U nga hambanyisi a nongameto; u nga cuwuki a nghohe ya munhu, u nga amukeli zinyikiwo, hakuva a zinyikiwo za tsopetisa a mahlo ya titlhari, ni ku onha timhaka ta lava vo lulama.

²⁰ Wena u ta lanzela nongameto basi, kasi wa fela ku hanya u fumela a tiko legi Jehova Nungungulu wa wena a ku nyikileko gona.

²¹ V nga byali a sinya hambu ni ya lihi lixaka, kasi ku maha zifananiso za Axera kusuhani ni alati legi u ta nga akela Jehova Nungungulu wa wena.

²² Ni kambe u nga ti yimiseli a zifananiso lezi Jehova Nungungulu wa wena a zi vengako.