Deuteronome 1 - Tshwa Bible

¹ Leti hi timhaka leti Mosi a nga hlawutela vontlhe vanana va ka Israeli le tlhatukweni wa Jordani le xiwuleni, a nkoveni wu cuwukeneko na Sufa, xikari ka Parani na Tofela na Labani na Hazerote na Dizahaba.

² Kusukela Horebe ku famba hi ndlela ya xitsunga xa Seire i mpfhuka wa 11 wa masiku ku chikela le Kadexe-Barnea.

³ Makunu hi lembe ga 40, ka hweti ya 11, hi siku go ranga ga hweti, Mosi i lo hlawutela ka vanana va ka Israeli zontlhe lezi Jehova a mu leleteleko ku va byela.

⁴ A maha lezo laha na hlulile Sihoni, a hosi ya maAmori, loyi a nga wa akile le Hexboni na Ogi a hosi ya le Baxani, loyi a nga wa akile le Axtarote, na Edrei. Mitse. 21:23

⁵ Zinghaho Mosi i lo sangula ku va tlhamusela lowu nayo le tlhatukweni wa Jordani le tikweni ga Moabi, aku:

⁶ Jehova Nungungulu wa hina, i wulawulile ka hina le Horebe, aku: Nwina mu tshamile xikhati xo leha ka lexi xitsunga.

⁷ Tlhelani mu famba, mu ya enghena le xitsungeni xa maAmori ni ka vontlhe lava va akileko lomo, mu famba le Araba, ni le xitsungeni ni le nkoveni, ni le Dzongeni, ni le mbhirini ka bimbi, le tikweni ga maKanani, ni le Lebanoni, kala congweni wa hombe, wona congo wa Eufrate.

⁸ Langutani, nzi mu nyikile tiko; fambani mu ya teka tiko lego Jehova a hlambanyileko ka vararu va nwina, Abrahama, na Isaka, na Jakobe, a ku va nyika gona, ni zizukulwana zabye anzhako ka vona. Gen. 12:7; 15:18

⁹ Na mina nzi wulile ka nwina lexo xikhati, nziku: Cima a nzi zi koti ku mu rwala nzoce.

¹⁰ Jehova Nungungulu wa nwina i mu enzelekisile, zonake inyamutlha mu tele kota tinyeleti ta tilo.

¹¹ Jehova Nungungulu wa nwina a mu enzelekise kambe hi ka khume ga mazana, a mu katekisa kota lezi a mu tsumbisileko!

¹² Nzi ta rwalisa kuyini na nzi hi nzoce a minzhwalo ya nwina, ni kubinza ka nwina, ni kukanetisana ka nwina ke?

¹³ Hikwalaho hlawulani madota lomu ka tontlhe tinyangwa ta nwina, a vavanuna lava va tlharihileko, lava va nga ni kupima, va tibyiwako, nzi ta va yimisa hehla ka nwina.

¹⁴ Nwina mu wa nzi hlamule, muku: A mhaka leyo u yi wulako yi sasekile.

¹⁵ Hikwalaho mina nzi tekile a madota lomu ka tinyangwa ta nwina, a vavanuna va kupima, va tibyiwako, nzi va yimisa hehla ka nwina a kuva tinduna ta 1,000, ni tinduna ta 100, ni tinduna ta 50, ni tinduna ta 10, kasi va maha vahlayisi lomu ka tinyangwa ta nwina.

¹⁶ Ka xona xikhati lexo nzi wa leletele Valamuli va nwina, nziku: Zwanani timhaka ta vamakabye va nwina, mu lamula hi kululama timhaka tabye, hambu ni wamatiko loyi a akileko xikari ka nwina.

¹⁷ Mu nga lamuli hi ku cuwuka nghohe ya munhu; kanilezi nwina mu tazwa a timhaka ta ntsongwani kota timhaka ta wahombe; mu nga chavi xiyimo xa munhu, hakuva kulamula kuta hi ka Nungungulu. Loku yinwani mhaka yi mu tsanza, mu ta yi neha mahlweni ka mina nzi ta ta yizwa. Ekso. 18:26; 23:3; Jak. 2:9

¹⁸ Ka lexo xikhati nzi lo mu leletela zilo zontlhe lezi mu faneleko ku zi maha.

¹⁹ Loku hi sukile le Horebe, hi tsemakanya xontlhe xiwula lexi xa hombe xo tshisa, lexi mu xi wonileko; hi famba hi ndlela ya xitsunga xa maAmori, kota lezi Jehova Nungungulu wa hina a hi leleteleko, kala hi chikela Kadexe-Barnea.

²⁰ Ku nga laho nzi ngaku ngalo ka nwina: Mu chikele xitsungeni xa maAmori, lexi Jehova Nungungulu wa hina a hi nyikako xona.

²¹ Languta Jehova, Nungungulu wa wena, i ku nyikile tiko. Kanziha uya gi teka, kota lezi Jehova a wulileko, yena Nungungulu wa vararu va wena. U nga chavi hambu ni ku rurumela.

²² Zonake nwina nwentlhe mu lota ka mina, mu ta ku ngalo: A hi rumeni vanhu mahlweni ka hina, va ya hlola tiko, kasi va fela ku ta hi byela hi timhaka ta ndlela leyi hi ta nga famba ha yona, ni miti leyi hi ta nga chikela ka yona. Mitse. 13:2

²³ Nzi lo xalala hi gezu lego; zonake nzi lo teka 12 wa vavanuna xikari ka nwina, a nuna munwe ka nyangwa yinwe ni yinwani.

²⁴ Va lo suka va kanziha xitsunga, zonake va lo chikela le nzhelelweni wa le Exkole va wu hlola.

²⁵ Va lo teka a mihanzu ya tiko, va yi neha ka hina, va ta hi hlawutela lezaku: A tiko lego Jehova, Nungungulu wa hina, a hi nyikileko gona i tiko gi nene.

²⁶ Kanilezi nwina mu lo ala ku kanziha muya ka gona, mu kaneta kuleletela ka Jehova, Nungungulu wa nwina.

²⁷ Zonake mu sola lomu matendeni ya nwina, muku ngalo: Jehova i lo hi humesa le Gipite hi kota ya lezi a hi vengako, a ta hi nyikela canjeni ga maAmori kasi va hi lovisa.

²⁸ Hi ta kanziha hiya kwihi ke? Lezo vamakabye va hina va hi mbhetile ntamu lomu timbilwini ta hina; hi lezi ve ngalo: A vanhu va kona va hi hunza hi kutala, na va hi va ziyimo zo zimuka; ni miti ya hombe ya makhokhola yo tlakukela ni le tilweni, hi wonile ni vanana va ka Anake leyo.

²⁹ Zonake mina nzi te ngalo ka nwina: Mu nga tsemeki hlana, hambu ni ku va chava!

³⁰ Jehova Nungungulu wa nwina, loyi a fambako mahlweni ka nwina, i ta mu lwela kota lezi a nga mu mahela zontlhe mahlweni ka nwina le Gipite.

³¹ Ni lomu xiwuleni mu wonile lezaku Jehova, Nungungulu wa wena, i lo ku beleka kota loku munhu a beleka nwanana wakwe, ka yontlhe ndlela leyi mu fambileko ka yona kala mu ta chikela laha. Deut. 32:10

³² Hambu lezo nwina a mu tsumbangi Jehova, Nungungulu wa nwina,

³³ loyi a fambako mahlweni ka nwina lomu ndleleni, a mu lavela a wutshamu go gwimba matenda, ni ku mu kombisa ndlela laha wusikwini hi nzilo, ni laha hlikanhini hi refu.

³⁴ Na Jehova i lozwa a kuwulawula ka nwina, zonake i lo zangara a hlambanya, aku:

³⁵ Cima ku nga tava kona munhu wa lixaka leli li bihileko, a ta nga wona tiko lego go saseka, legi nzi hlambanyileko ku nyika vararu vabye, sine Kalebi nʼwana Jefuna! Mitse. 14:21; Tis. 95:11

³⁶ Yena i ta gi wona; nzi ta nyika ka yena ni vana vakwe a tiko legi a ta nga kanzihela gona, hakuva yena i chivirikile ku lanzela Jehova.

³⁷ Na Jehova i lo nzi holovela hi kota ya nwina, aku ngalo: Wenawu cima u nga ta enghena lomo!

³⁸ Joxua a nʼwana wa Nuni loyi a yimako mahlweni ka mina i ta enghena lomo; mu tiyise hakuva hi yena a ta nga nyika va ka Israeli a tiko lego gi maha tshomba yabye.

³⁹ Kasike a vanana va nwina, lava mu nga wula ha vona lezaku va ta khomiwa va maha tihloko, ni vana va nwina lava inyamutlha va nga tiviko kusaseka ni kubiha, hi vonake va ta nga enghena ka tiko lego; nzi ta va nyika gi maha tiko gabye.

⁴⁰ Kanilezi nwina tlhelani mu famba hi ndlela ya Bimbi go Pswhuka.

⁴¹ Zonake mu lo hlamula muku ka mina: Hina hi onhile ka Jehova. Hikwalaho hina hi ta famba hi yalwa kota lezi Jehova Nungungulu wa hina a hi leleteleko. Zonake nwina mu lo hloma, mu nga chavi ku kanziha zitsungeni. Mitse. 14:40

⁴² Kanilezi Jehova i te ngalo ka mina: Va byele uku: Mu nga kali mu kanziha, kambe mu nga dzuki mu yalwa, hakuva mina a nzi kona xikari ka nwina; mu ngaya hlulwa hi valala va nwina.

⁴³ Zinghaho mina nzi lo wulawula ka nwina, kanilezi cima a mu ingisangi; mu lo kaneta timhaka ta Jehova, mu ti kurumeta mu kanziha xitsungeni.

⁴⁴ Zonake a vaAmori lava va akileko ka lexo xitsunga, va lo huma va talwa na nwina, va mu hlongola kota tinyoxi ti tsutsumisako vanhu, va mu hlasela le Seire kala le Horma.

⁴⁵ Laha na mu wuyile mu lo ta rila mahlweni ka Jehova, kanilezi Jehova a nga ingisangi a gezu ga nwina, hambu ni ku kangatela a ndleve yakwe a muzwa.

⁴⁶ Zonake mu lo tshama le Kadexe masiku yo tala, ma nga wona masiku lawo mu tshamileko leyo.