Amosi 4 - Tshwa Bible

¹ Zwanani mhaka leyi, nwina tihomu ta le Baxani, ti nga lomu xitsungeni xa Samaria, nwina lava mu xanisako zisiwana, mu tsimbeketako vavumali, mu nge ka vanuna va nwina: Nehani hinwa!

² Hosi Jehova i hlambanyile hi wubaswa gakwe, aku: Mata a masiku lawa va ta nga mu koka hi ziove, a misalela ya nwina yi kokiwa hi zimemba.

³ Mu ta huma mutini hi mihoco ya khurisi, munwe ni munwani a huma hi ka lowu a cuwukeneko nawo, mu ya ti hoxa le Harmoni, ku wula Jehova. Isa. 2:20; Ezek. 12:5, 12

Israeli a nga gonzi nchumu.

⁴ Yanani Beteli mu ya onha; yanani le Gilgale mu ya anzisa a zionho! Nehani a miphahlelo ya nwina mixo ni mixo, mu nyikela za wukhume za nwina hi siku ga wunharu.

⁵ Mahani miphahlelo ya kubonga hi lezi zi comelweko, muba nyiwo hi minyikelo leyi yi mahiwako hi kuxuva ka munhu; hakuva mu ranza lezo, nwina vanana va ka Israeli, ku wula Hosi Jehova. Levi 2:11; 7:12

⁶ Kambe nzi mu rumele ndlala mitini yontlhe ya nwina, mu vumala zakuga matshanwini ya nwina wontlhe. Hambu zi hi tano, a mu hunzulukangi ka mina, ku wula Jehova. 2 Tih. 6:25; 8:1

⁷ Nzi mu tsonile vula na ka ha sele tihweti tinharu a kuva mu tshovela; nzi yi nisa ka muti munwe, a ka wunwani yi ngani; a simu ginwe gi nelwa, legi gi nga kala ku nelwa gi woma.

⁸ Zinghaho a miti mimbiri ni miti minharu yi loya ka muti a ku yanwa mati, kanilezi yi nga kolwi. Hambu zi hi tano, a mu hunzulukangi ka mina, ku wula Jehova.

⁹ Nzi bile a mavele ya nwina hi mheho ya xikobani ni tindlati, a masimu ya nwina yo tala, ni zivina za nwina ni mikuwu ya nwina ni mioliva ya nwina zi gilwe hi bhanzala; hambu zi hi tano, a mu hunzulukangi ka mina, ku wula Jehova.

¹⁰ Nzi mu rumele a ntungu wo fanana ni wa le Gipite, nzi daya ma jaha ya nwina hi tisupado, a mahaxi ya nwina ma phangiwa; a kunuha ka zirumbi za wugovelo ga nwina nzi ku mahile ku chikela tinhovini ta nwina; hambu zi hi tano, a mu hunzulukangi ka mina, ku wula Jehova. Ekso. 9:3; 12:29; 2 Tih. 13:3, 7

¹¹ Nzi mu lovisile khwatsi hi laha Nungungulu a nga lovisa Sodoma ni Gomora, mu lo pona ku fanana ni lihunyi li susilweko nzilweni; hambu zi hi tano, a mu hunzulukangi ka mina, ku wula Jehova. Gen. 19:24; Isa. 13:19

¹² Hikwalaho nzi ta maha lezo ka wena, Israeli; khwatsi hi lezi nzi ta nga maha lezo ka wena, ti longisele ku tlhangana ni Nungungulu wa wena, Israeli.

¹³ Hakuva, loyi a nga vanga zitsunga ni mheho, a tlhatlhambutela ka munhu lezi zi na nga maalakanyo yakwe, loyi a hunzulako mixo yi maha munyama, a fambako matshanwini ma tlakukileko ya misava, a vito gakwe hi Jehova, a Nungungulu wa tiyimpi.