Amosi 2 - Tshwa Bible

Xiprofeto za Moabi, Juda na Israeli.

¹ Jehova i ngalo: Hi kota ya zionho zinharu za Moabi, kutani mune wa zona, nzi nga ta susa a xitsayiso, hakuva i hisile a marambu ya hosi ya le Edome ma kala ma maha mhemba.

² Kanilezi nzi ta rumela a nzilo hehla ka Moabi, wu ta hisa a ziluvelo za le Keriote. Zonake Moabi i ta lova na ku hi ni pfilupfilu ni tihuwa ni kuvuma ka mpunzu.

³ Zonake nzi ta lovisa a mulamuli xikari kabye, nzi daya tontlhe tihosana tabye, ku wula Jehova.

⁴ Jehova i ngalo: Hi kota ya zionho zinharu za Juda, kutani mune wa zona, nzi nga ta susa a xitsayiso, hakuva va alile a nayo wa Jehova, a va hlayisangi a zilayelo zakwe; a vanungungulu vabye va mawunwa va va hambukisile, lava a vararu vabye va nga va lanzela. Vala. 2:11

⁵ Kanilezi nzi ta rumela a nzilo hehla ka Juda, wu ta hisa a ziluvelo za Jerusalema.

⁶ Jehova i ngalo: Hi kota ya zionho zinharu za Israeli, kutani mune wa zona, nzi nga ta susa a xitsayiso, hakuva va xavisile loyi a lulamileko hi ku fela siliva, ni muvumali hi ku fela a patswa wa zilato.

⁷ Va navela ni tshuri wa misava wu nga tihlokweni ta lava va vumalako, va onha a mhaka ya lava va koramileko. A munhu ni raru wakwe va enghena ka nhwana munwe, va nyenyezisa a vito ga mina go basa.

⁸ Va etlela lomu matlhelweni ya maalati wontlhe hehla ka tinguwo leti ti tekilweko hi kota ya milanzu; lomu ndlwini ya Nungungulu wabye va nwela kona a vinya ga lava va rihisilweko. Ekso. 22:26; Deut. 24:12

⁹ Kasike hi mina nzi lovisileko a maAmori mahlweni kabye, lava kuleha ka vona ku nga ringana ni kuleha ka tisedare, na va hi ni ntamu wo fanana ni wa mitule; kasike nzi lovisile a mihanzu yabye le hehla ni mitsu yabye lahasi. Deut. 2:33; Jox. 24:8; Vala. 11:23

¹⁰ Hi mina nzi mu humesileko tikweni ga Gipite, nzi mu rangela xiwuleni 40 wa malembe, kasi mu fela ku fumela a tiko ga maAmori.

¹¹ Nzi mu vuxela vaprofeti xikari ka vana va nwina, nzi mu vuxela manuzirita xikari ka majaha ya nwina. A zi tano ke, nwina vana va ka Israeli? ku wula Jehova.

¹² Kanilezi nwina mu lo nwisa a vinya a manazirita, mu beletela vaprofeti, muku: Mu nga ha profeti! Mitse. 6:2; Vala. 13:5; Isa. 30:10

¹³ Langutani, nzi ta mu manya wutshanwini ga nwina, khwatsi i kareta gi manyako na gi tele hi milumbi.

¹⁴ Loyi wa mazambu i ta tsanzeka ku tsutsuma, a wa ntamu a nga ta vuneka hi ntamu wakwe, ge hambu a nhenha a ku ponisa a wutomi gakwe.

¹⁵ A mukhomi wa wura a nga ta yima, ni mukhileli wa haxi a nga ta ponisa wutomi gakwe.

¹⁶ Hambu loyi a nga ngwhazi xikari ka tinhenha i ta tsutsuma hi siku lego na hi ximbyiri, ku wula Jehova.