3 Johani 1 - Tshwa Bible

A ku famba hi zinene.

¹ A singalakati ga rungula Gaiusi a ranzekako, loyi nzi mu ranzako zineneni. 2 Joh. 1

² Xiranzwa, nza khongela lezaku u fela ku hanya khwatsi u vuvuma zilweni zontlhe, kota lezi wu vuvumako a muhefemulo wa wena.

³ Hakuva nzi lo tsaka nguvu, laha ku ngata vamakabye va ta kustumunya hi zinene lezi zi nga ka wena, kota lezi u fambako zineneni. 2 Joh. 4

⁴ A nzi na kutsaka ka hombe ku hunza loku nzi nga nako, laha nzi zwako lezaku vana va mina va famba zineneni. 1 Kor. 4:15; File. 10

⁵ Xiranzwa, u kholekile ka zontlhe lezi u mahelako vamakabye lava va nga vaenzi.

⁶ Vona va mahile wukustumunyu hi liranzo la wena mahlweni ka bandla. U ta maha khwatsi loku u va hlomisa lwenzweni labye kota lezi ku faneleko ntiro wa Nungungulu.

⁷ Hakuva va lo famba hi kota ya Vito, na va nga amukeli nchumu xa vamatiko. 1 Kor. 9:12, 15

⁸ Hikwalaho hi yimelwe hi ku amukela va kunghaho, kasi ha fela ku tirela navo a zinene.

⁹ Mina nzi lo tsalela bandla, kanilezi Diotrefesi, loyi a ranzako a kuva wahombe xikari kabye, a nga hi amukeli.

¹⁰ Hikwalaho loku nzita, nzi ta mu alakanyisa hi mitiro leyi a yi mahako hi ku hi hleva hi timhaka to biha. A nga eneliswi hi ku maha lezo, yena wutsumbu a nga amukeli vamakabye, ni lava va ranzako ku maha lezo wa va tsimbetela, a va hlongola bandleni.

¹¹ Xiranzwa, u nga pimanyisi lezi za kubiha, kanilezi pimanyisa lezi zo saseka. Loyi a mahako kusaseka ngwa Nungungulu; kanilezi loyi a mahako kubiha a nga mu wonangi Nungungulu. Tis. 37:27; Isa. 1:16, 17; 1 Joh. 2:29

¹² Demetriusi i mahelwa wukustumunyu go saseka hi vanhu vontlhe, na zona zinene za mu kustumunyela. Na hinawu ha mu mahela wukustumunyu; wena wa zi tiva lezaku a wukustumunyu ga hina gi nene. Joh. 21:24; 1 Tim. 3:7

¹³ Nzi wa hi ni timhaka tinyingi, kanilezi a nzi zi ranzi ku ku tsalela ha tona hi tinta ni pena. 2 Joh. 12

¹⁴ Kanilezi nza tsumba lezaku nzi ta ku wona lokuloku, zonake hi ta wulawula hi milomu. A kurula a kuve na wena. A maxaka ma ku rungula. Rungula maxaka hi mavito yabye.