2 Timote 4 - Tshwa Bible

Kanela a Mhaka.

¹ Nza ku hlambanyisa mahlweni ka Nungungulu, ni ka Kristu Jesu, loyi a ta nga lamula a vahanyako ni vafileko, na hi kuwoneka kakwe ni mufumo wakwe, nziku:

² Kanela a mhaka; pinyama hi xikhati xi faneleko ni xikhati xi nga faneliko, u kawuka, u luleka, ni ku khongotela hi kutimisela kontlhe, ni kugonzisa. 1 Tim. 4:13; Tit. 1:13

³ Hakuva xa hata xikhati laha va ta nga ala a gonzo yi hanyisako; kanilezi kota lezi va nga ni tindleve ti nyakanyelelako a kuzwa, va ta ti lavela vagonzisi vo tsakisa kumbilukela kabye; 1 Tim. 1:10

⁴ zonake va nga ta ha ingisa zinene, va ta hambukela mitsheketweni. 1 Tim. 1:4

⁵ Kanilezi wena ti tsitsirite timhakeni tontlhe, u timisela zikaratweni, u tira a ntiro wa muvangeli, u hetisa a ntiro wa wena. Miti. 21:6

⁶ Hakuva makunu va lombela ha mina, a xikhati xa kusuka ka mina xi chikele.

⁷ Nzi lwile a kulwa ko saseka, nzi mbhetile a kutsutsuma ka mina, nzi gongole a kukholwa.

⁸ Makunu nzi vekelwe a xidlodlo xa kululama, lexi a Hosi a nga mulamuli a lulamileko, yi ta nga nzi nyika xona sikwini lego, na ku nga hi mina nzoce, kanilezi ni ka vontlhe lava va ranzileko a kuwoneka ka yena. Kuv. 2:10

A zikarato za Paule.

⁹ Hatlisa uta ka mina lokuloku,

¹⁰ hakuva Demasi i nzi tsikile, kota lezi a ranzako za nguva leyi, i yile Tesalonika; Kreseke i yile Galatia, na Titusi i yile Dalmatia. 1 Joh. 2:15; Kol. 4:14; File. 24

¹¹ Hi Luka yece a nga na mina. Tana na Marku, hakuva wa nzi vuna nguvu ntirweni. Miti. 12:25; 15:37; Kol. 4:10

¹² Tikikusi nzi mu rumile Efesusi. Miti. 20:4; Efe. 6:21

¹³ A jasi legi nzi nga gi siya le Troasi ka Karpusi, tana nago loku uta, ni mabhuku kambe, nguvunguvu a mapapilo ya madzowo.

¹⁴ Alexandro, a mufuli wa suku, i i nzi mahele makhombo yo tala; a Hosi yi ta mu tlhelisela kota mitiro yakwe. 2 Sam. 3:39; Tis. 28:4; Miti. 19:33; 1 Tim. 1:20

¹⁵ Mu kunguhele na wenawu, hakuva i lo kaneta nguvu a timhaka ta hina.

¹⁶ A kutihlamuleleni ka mina ko ranga ku wa nga hi kona munhu loyi a nga nzi yimela, kanilezi vontlhe va lo nzi tsika; ngha va nga hlayelwi nanzu lowo. Miti. 7:60

¹⁷ Kanilezi a Hosi yi lo nzi yimela, yi nzi tiyisa, kasi a mhaka ya fela ku biwa hungu hi mina matlhelweni wontihe, lezaku a vamatiko vontlhe va fela kuzwa; lezo nzi lo hlangutwa nonwini wa nghala. Mat. 10:19; 2 Ped. 2:9

¹⁸ Kunene a Hosi yi ta nzi hlanguta mitirweni yontlhe ya kubiha, yi nzi hanyisela a mufumo wa yona wa le tilweni. A wudzunzo a give ka yona kala kupinzuka ni kupinzuka. Amen! Tis. 121:7

¹⁹ Rungula Prisika na Akwila, ni va ka Oniseferusi. Miti. 18:2; 2 Tim. 1:16

²⁰ Erastusi i sele le Korinte, kasike Trofimusi nzi mu siyile le Miletu na a kari a babya. Miti. 19:22; 20:4

²¹ Hatlisa uta na ku nga se ku chikela wuxika. Eubulusi wa ku rungula, na Pudensi, na Linusi, na Klaudia, ni vamakabye vontlhe.

²² A Hosi a yive ni moya wa wena. A tipswalo a tive na nwina.