2 Timote 3 - Tshwa Bible

A masiku ya kugumesa.

¹ Kanilezi tiva lezaku, a masikwini yo gumesa ku ta chikela a zikhati za zikarato. Juda 18

² Hakuva vanhu va ta ti ranza wutsumbu, a varanzi va mali, a vamatshanza, a va manyanga, a va tihlamba, a va nga ingisiko vapswali vabye, a va nga bongiko, a va nga basangiko, Rom. 1:30

³ lava va nga ranziko a va ka kabye, lava va nga tsetseleliko, a valumbeti, lava va nga tiviko ku ti khoma, lava va lunya, lava va nga ranziko zinene,

⁴ lava va nga tsumbekiko, va xikanikani, va ti kukumukisako, lava va ranzako ku ti tsakisa ku hunza ku ranza Nungungulu;

⁵ va na nga ni xiyimo xa ku khozela Nungungulu, kasi va kaneta a ntamu wa kona. Fularela a vanhu va kunghahi. 1 Tim. 5:8

⁶ Hakuva xikari ka vona va kona lava va enghenako tindlwini, va khoma a vavasati va gome, lava va binzwako hi zionho, va susumetwako hi kunavela kunyingi, Mat. 23:14

⁷ a vavasati lava va gonzako xontlhe xikhati, kanilezi va nga zi koti ku chikela kutiveni ka zinene. 1 Tim. 2:4

⁸ Kota lezi Janesi na Jambresi va nga vukela Mosi, hizalezo ni vavanuna lava va vukela a zinene; va bihisilwe kupimeni kabye, a va vuni nchumu kukholweni. Ekso. 7:11

⁹ Kanilezi cima va nga ta humelela; hakuva a wupumbu gabye gi ta su dlunya ka vanhu vontlhe, kota lezi ni ga vanalavo gi nga su, dlunya. Ekso. 8:13; 9:11

¹⁰ Kanilezi wena u nzi lanzele a kugonziseni, ni mafambeleni, ni makungwini, ni kukholweni, ni kutimiseleni, ni liranzweni, ni lihlaza-mbilwini,

¹¹ ni le kuxanisweni, ni kuxanisekeni loku nzi nga humelelwa ha kona le Antiokia, ni le Ikoniume, ni le Listra. Kuxaniseka ka kuyini nzi nga hi nako! kanilezi Hosi yi lo nzi hlanguta ka kona kontlhe. Tis. 34:19; Miti. 13:45; 14:2; 2 Kor. 1:10

¹² Hakunene vontlhe lava va ranzako ku hanya hi wutomi ga wukhozeli legi gi nga ka Kristu Jesu, va ta xaniswa. Mat. 16:24; Joh. 17:14; Miti. 14:22; 1 Kor. 15:19

¹³ Kanilezi a vanhu vo biha ni vakanganyisi va ta nonohisa vaya mahlweni kubiheni, va kanganyisa vanwani, va tlhela va kanganyiswa.

¹⁴ Kanilezi wena, namarela ka lezi u zi gonzileko, ni lezi u tiyisilweko ha zona, na u kari u tiva a vagonzisi va wena;

¹⁵ ni lezaku a kusukela wuhlangini ga wena u tivile a mitsalo yo basa, leyi yi nga ni ntamu a ku ku maha u tlhariha, u kala u hanyiswa hi kukholwa loku ku nga ka Kristu Jesu. Tis. 119:11; Joh. 20:31; Rom. 10:17

¹⁶ Yontlhelele mitsalo yi pimisilweko vanhu hi Nungungulu ya vuna kugonziseni, ni kukawukeni, ni kululekeni, ni kulayeni hi za kululama; Lu. 1:70; 2 Ped. 1:20

¹⁷ kasi a munhu wa Nungungulu a fela ku mbhelela, na a longiselelwe a mitiro yontlhe yo saseka. 1 Tim. 6:11; Tit. 1:9