2 Timote 2 - Tshwa Bible

Xaniseka na mina kota a sochwa ga Jesu Kristu.

¹ Wena-ke, nwananga, ngha uva ni ntamu tipswalweni leti ti nga ka Kristu Jesu. Efe. 1:19; 3:16; 6:10; Kol. 1:11; 1 Tim. 1:2

² Lezi u zi zwileko ka mina mahlweni ka vakustumunyu vanyingi, zi veke ka vavanuna va tsumbekileko, lezaku ya fela ku zi kota ku gonzisa vanwani. 1 Tim. 1:18

³ Xaniseka zikaratweni zinwe na mina, kota a sochwa go saseka ga Kristu Jesu.

⁴ Loku a munhu aya yimpini a nga ti binzisi hi mitiro ya loku kuhanya, hakuva i fela ku tsakisa loyi a mu hlomisileko. 1 Kor. 9:25

⁵ Kambe loku a munhu a palisana kuhlakaneni, a nga nyikwi xidlodlo ahandle ka loku a dawule hi nayo.

⁶ A murimi loyi a tirileko a ntiro wa kona, hi yena a faneleko ku amukela a xiavelo xo ranga xa mihanzu.

⁷ Ehleketa lezi nzi zi wulako, a Hosi yi ta ku nyika kutlhariha timhakeni tontlhe.

⁸ Alakanya Jesu Kristu loyi a vukileko hi ka vafileko, wa pswalo wa Davida, khwatsi hi kuwula ka ivangeli leyi nzi yi kanelako, Miti. 2:30; 13:23; Rom. 2:16; 1 Kor. 15:1

⁹ Leyi nzi zwako zikarato ha yona kala nziva makhotsweni khwatsi hi xigohi; kanilezi a mhaka ya Nungungulu a yi na ku bohiwa.

¹⁰ Hikwalaho nzi timisela zontlhe hi kota ya vahlawulilweko, kasi na vonawu va fela ku kuma a kuhanyiswa loku ku nga ka Kristu Jesu, zinwe ni kungangamela ka pinzukelwa. 2 Kor. 1:8

¹¹ Gi tsumbekile a gezu legi gi nge ngalo: Hakuva loku hi file zinwe naye, kambe hi ta hanya zinwe naye; Rom. 6:5, 8; 1 Tim. 1:15

¹² loku hi timisela, hi ta fuma zinwe naye; kanilezi loku hi mu kaneta, yenawu i ta hi kaneta. Mat. 10:33; Mar. 8:38; Rom. 8:17; 1 Ped. 4:13

¹³ Loku hi nga tsumbeki, yena i ta simamisa a tsumbekile; hakuva a nga na ku ti kaneta. Mitse. 23:19; Rom. 3:3; 9:6

Tindlela ta kuhambuka

¹⁴ Va alakanyise hi timhaka leti, u va laya mahlweni ka Hosi, lezaku va nga kanetisani hi timhaka, hakuva a zi vuni nchumu, zi hambukisa ntsena lava va zi zwako. 1 Tim. 1:4; 5:21; 6:13

¹⁵ Chela kota ku ti kombisa mahlweni ka Nungungulu u hi loyi a hlolilweko u kheseka, a xitiri xi nga luko na tingana, loyi a avelako a mhaka ya zinene hi kululama.

¹⁶ Kanilezi nyenya a mafenya lawa ya hava, hakuva lava va wulako wona va taya mahlweni hi kungakholwi. Tit. 1:14

¹⁷ A mhaka yabye yi ta vunjhukela kota khoro. A va kunghaho hi Himeneusi na Filetusi; 1 Tim. 1:20

¹⁸ lava va hambukileko zineneni, va nge ngalo: A kuvuka ka vafileko ku hunzile; va daya a kukholwa ka vanwani. 1 Kor. 15:12

¹⁹ Kanilezi a xiseketelo xi tiyileko xa Nungungulu xi yimile, na xi hi ni xifungo lexi xaku: A Hosi ya va tiva lava va nga va yona; niku: Ngha munwe ni munwani a kumbukako a vito ga Hosi a suka kungalulameni. Nah. 1:7; Mat. 24:24; Rom. 8:35; 1 Joh. 2:19

²⁰ Lomu ndlwini ya hombe a ku na zibya za nzalama ni siliva zoce, kanilezi zi kona kambe zo vatliwa ni za wumba; zinwani zi na ni mitiro yi dzunziwako, ni zinwani zi na ni mitiro yi nga dzunziwiko.

²¹ Hikwalaho loku munhu a tsawukana ni mitiro ya kunghaho, i tava xibya xi dzunziwako, lexi xi basisilweko, xi faneleko ku tiriswa hi nwinyi wa xona, na xi longiselelwe a mitiro yontlhe yo saseka.

²² Potsoloka a kumbilukela ka lava vaswa, u lanza kululama, ni kukholwa, ni liranzo, ni kurula, zinwe ni lava va khongelako ka Hosi hi timbilu ti basileko.

²³ Kanilezi ala ku xuxa hi timhaka ta wupumbu leti ti nga vuniko nchumu; wa zi tiva lezaku ti vanga timholova.

²⁴ A zi faneli lezaku a nanza ga Hosi gi holova, kanilezi a gi rule ka vontlhe, na gi tiva ku gonzisa, gi timisela.

²⁵ I fanele ku luleka hi kurula lava va kanetako, na a tsumba lezaku Nungungulu i ta va nyika kuhunzuluka va kala va tiva zinene,

²⁶ lezaku va ti tlharihela va pona tlhanwini wa Satani, loyi va phasilweko hi yena, lezaku va maha kuranza kakwe.