2 Tihosi 4 - Tshwa Bible

A zibya za mafura.

¹ Makunu a munwe wa vasati va vapizani va vaprofeti i loba huwa ka Elixa, aku: A nanza ga wena, a nuna Wa mina, i file! Wena wa zi tiva lezaku i wa hi munhu loyi a nga wa chava Jehova. Makunu loyi a nga wa mu pembile i tile ku ta teka a vana va mina va vambiri a ya va maha tikhumbi takwe! Levi 25:39; Mat. 18:25

² Elixa i te ngalo kakwe: Nzi nga ku vuna hi yini ke? Nzi byele lezi u nga nazo lomu ndlwini ya wena! Yena i lo hlamula, aku: A nanza ga wena a gi na nchumu lomu ndlwini, ntsena a mbitana ya mafura.

³ Zonake Elixa i te ngalo: Famba ka vaakelane va wena vontlhe u ya lomba a timbita to tala ta maphanga.

⁴ U ta enghena lomu ndlwini ni vana va wena u ti valela livati u cheletela mafura lomu ka timbita tontlhe, leti ti tatako va ya ti veka.

⁵ Zinghaho a wasati i lo suka a ya ti valela lomu ndlwini ni vana vakwe; i lo nehelwa timbita, a ti cheletela mafura.

⁶ Laha a timbita ti nga wa tele, i te ngalo ka nʼwana wakwe: Nzi nehele yinwani mbita. Yena aku: Laha a ka ha hi kona yinwani mbita! Zonake a mafura ma lo tiya.

⁷ Zonake i lo suka a ya tivisa a munhu wa Nungungulu; yena aku: Famba u ya xavisa mafura lawo, u riha a nanzu wa wena; lawa ma salako u ta hanya ha wona ni vana va wena.

A nʼwana wa wasati wa muXuname.

⁸ Makunu hi ginwani siku Elixa i lo hunza hi le Xuname. Laho ku wa hi kona a wasati wo fuma, loyi a nga mu kurumeta a ku yaga zakuga zakwe. Siku ni siku, loku a hunza laho i waya aga kakwe.

⁹ A wasati aku ka nuna wakwe: Nza zi tiva lezaku a munhu loyi a hambukako laha ka hina wontihe masiku, munhu wa Nungungulu.

¹⁰ A hi akeni a xiyindlwana xo tlakuka hi laha khurisini, hi vekela a mubhedi, ni meza, ni xitshamu, ni kandiya, a ta ta etlela kona loku a hi enzela.

¹¹ Hi ginwani siku Elixa i lota a ta etlela lomu ka yindlu leyo.

¹² 1 te ngalo ka nanza gakwe Gehazi: Vitana wasati loyi wa muXuname. I lo ya mu vitana; a wasati a ta yima mahlweni kakwe.

¹³ Elixa i te ngalo ka Gehazi: Mu byele, uku: U hi amukele khwatsi; makunu xini nzi ta nga ku vuna ha xona ke? Xana u lava a kuva u wulawuliwa le hosini, kutani ka nduna ya yimpi ke? Yena aku: Mina nzi akile xikari ka vanhu va ka hina.

¹⁴ Elixa aku: Hi ta mu mahela yini ke? Gehazi i lo hlamula, aku: Hakunene, yena a nga na nʼwana, ni nuna wakwe i khosahele.

¹⁵ Yena i te ngalo: Mu vitane. Yena i lo mu vitana a ta yima laha nyangweni.

¹⁶ Elixa i te ngalo ka yena: A ka leyi nguva ha nwakani, wena u ta wukarela a nwanana. Yena aku: Ahihi hosi yanga, u nga hembeli a nanza ga wena! Gen. 18:10

¹⁷ A wasati i lo xura nyimba a beleka a nwanana wa mufana xikhatini xwalexo, lomu ka lembe gi gamelako, khwatsi hi kuwula ka Elixa.

¹⁸ A nwanana i lo kula; a ginwani siku a nwanana i lo huma a lanza a raru wakwe le masinwini ka vatshoveli.

¹⁹ I te ngalo ka raru wakwe: Hloko ya mina, hloko ya mina! Yena aku ka nanza gakwe: Mu tlakule u mu heleketa ka nyine wakwe.

²⁰ 1 lo mu tlakula a mu heleketa ka nyine wakwe; a nwanana i lo wukarelwa hi nyine wakwe kala laha hlikanhini, zonake i lofa.

²¹ Yena i lo kanziha a ya mu etlelisa laha mubhedini wa munhu wa Nungungulu, a vala livati a huma lahandle.

²² I lo vitana a nuna wakwe, aku: Nzi rumele a munwe wa malanza zinwe ni mbongola, kasi nza fela ku tsutsuma nziya ka munhu wa Nungungulu, nzi ta tlhela nzi wuya kambe.

²³ Yena i te ngalo: Na u yela yini kakwe inyamutlha? A hweti a yi se woneka, ni kambe a hi sabado. A wasati i te ngalo: Zi lulamile!

²⁴ Zonake i lo gabhatsela a mbongola, aku ka nanza gakwe: Yi chayele u tshonometa, u nga nzi yimisi laha ndleleni kala mina nzi ku byela.

²⁵ Zinghaho i lo suka aya ka munhu wa Nungungulu le xitsungeni xa Karmeli. Makunu laha a munhu wa Nungungulu a nga mu wonile na ha hi kule, i te ngalo ka Gehazi, a nanza gakwe: Hi gaya a wasati wa muXuname!

²⁶ Tsutsuma u mu khinga, uku kakwe: Wa hanya ke? A nuna wa wena wa hanya ke? Ni nwanana wa hanya ke? Yena i te ngalo: Va hanya!

²⁷ Zonake i lota ka munhu wa Nungungulu le xitsungeni a ta khoma milenge yakwe. Gehazi i lo tshinela laha kusuhani a ku ta mu tsikisa, kanilezi a munhu wa Nungungulu i te ngalo kakwe: Mu tsike, hakuva a muhefemulo wakwe wa karateka, kanilezi Jehova i nzi fihlele lezi zilo, a nga nzi tivisangi.

²⁸ Zonake a wasati i te ngalo: Xana mina nzi wa kombele nʼwana ka hosi ya mina ke? Mina a nzi ku byelangi nziku: U nga nzi khohlisi ke?

²⁹ Elixa i te ngalo ka Gehazi: Boha xiwunu xa wena u teka a nhonga ya mina u welela canjeni ga wena, u famba; loku u tlhangana ni munhu, u nga mu losi; ni loku a munhu a ku losa wena, u nga mu anguli, U ta ya tlhateka a nhonga ya mina lomu nghoheni ya nwanana. Lu. 10:4

³⁰ Kanilezi a nyine wa nwanana i te ngalo: Nzi hlambanya hi Jehova a hanyako ni muhefemulo wa wena wu hanyako, lezaku cima nzi nga ta ku siya. Zonake Elixa i lo suka a famba zinwe naye.

³¹ Gehazi i lo hunza a ranga mahlweni kabye, a ya tlhateka a nhonga lomu nghoheni ka nwanana; kanilezi ku wa nga hi na gezu hambu a xikombiso xa kuingisa. Zonake i lo tlhela a khinga Elixa a ya mu tivisa lezaku a nwanana a nga vukangi.

³² Makunu laha Elixa a nga wa enghenile lomu ndlwini, i lo wona a nwanana na file, na a latilwe laha mubhedini wakwe.

³³ Elixa i lo enghena lomu ndlwini a ti valela ni nwanana, a khongela ka Jehova. Mat. 6:6; Miti. 9:40

³⁴ I lo ti nawula hehla ka nwanana, a vekela a nomu wakwe hehla ka nomu wa nwanana, ni mahlo yakwe hehla ka mahlo ya nwanana, ni mandla yakwe hehla ka mandla ya nwanana; zonake a nyama ya nwanana yi lo kufumela.

³⁵ Elixa i lo suka kakwe a renzelekela lomu ndlwini aya seno ni seno, a kanziha a ti nawula hehla ka nwanana. A nwanana i lo wetshemula 7 wa makhati a hanyanya.

³⁶ Zonake Elixa i lo vitana Gehazi, aku kakwe: Vitana wasati loyi wa muXuname. Gehazi i lo mu vitana. Loku ata kakwe, Elixa aku: Teka a nwanana wa wena.

³⁷ A wasati i lowa mikonzweni yakwe, a khizama lahasi; zonake i lo teka a nwanana wakwe a huma lahandle.

A matsawu ya wutsulu.

³⁸ Makunu laha Elixa a nga wa tlhelele Gilgali, lomu tikweni ku wa hi ni ndlala. A vapizani va vaprofeti va wa tshamile mahlweni kakwe. Yena i te ngalo ka nanza gakwe: Xungeta a mbita ya hombe, u bhikela zakuga a vapizani va vaprofeti.

³⁹ A munwe wabye i lo huma aya le khwatini a ya khaya matsawu. Kanilezi i lo kuma a tihlambuti ta khwati, a khaya tihaka ta kona, a bohela lomu ka nguwo yakwe. Loku a wuyile i lo ti tsemelela lomu mbiteni ya zakuga, hakuva va wa nga ti tivi.

⁴⁰ Zonake a vanhu va lo phamela a zakuga lezo vaga. A xikhati va nga sangula kuga zakuga lezo, va loba huwa, vaku: Munhu wa Nungungulu, ku na ni lufu lomu mbiteni! A va ha zi gangi zakuga lezo.

⁴¹ Elixa i te ngalo: Hi zona; nehani a mapa! I lo ma chela lomu mbiteni, aku: Phamelani vanhu vaga! Ku wa nga ha hi na mhango lomu mbiteni.

⁴² Makunu laho ku lota a munhu hi le Baal-Xalixa a neha zakuga ka munhu wa Nungungulu, a zibaba za mihanzu yo ranga, 20 wa zibaba za sevada ni mavele ya zipfhaki zo tsakama lomu kwameni wakwe. Elixa i te ngalo kakwe: Nyika a vanhu lava vaga! Mitse. 18:31; Mat. 14:15; Joh. 6:5

⁴³ A nanza gakwe gi te ngalo: Zi ta mahisa kuyini a ku phamela 100 wa vanhu ke? Elixa i lo hlamula, aku: Nyika vanhu vaga, hakuva Jehova i ngalo: Va taga zi sala.

⁴⁴ Zonake i lo va phamela vaga, zi tlhela zi sala khwatsi hi kuwula ka Jehova.