2 Tihosi 25 - Tshwa Bible

¹ Hi lembe ga wu 9 ga kufuma kaZedekia, hi hweti ya wu 10, hi siku ga 10, i lota Nebukadnezare a hosi ya le Babuloni zinwe ni yimpi yakwe yontlhe a ku ta hlasela Jerusalema. Va lo ta wu govela, va aka a tigingisi va wu ranzela. Jer. 39:1; 52:4

² Zinghaho a muti wu lo vimbezelwa kala lembe ga wu 11 ga kufuma ka Zedekia.

³ Hi siku ga 9 ga hweti ya wumune a ndlala yi lo tshinga nguvu lomu mutini, a vanhu va tiko va vumala zakuga.

⁴ Zonake a ligingisi la muti li lo bhoxiwa, vontlhe vavanuna va yimpi va panzanyeka ni wusiku hi ndlela ya nyangwa, hi laha xikari ka makhurisi mambiri, kusuhani ni simu ga hosi. Va lo famba hi ndlela ya libala, a maKaldea na ma kari ma vimbezela a muti.

⁵ Kanilezi a yimpi ya maKaldea yi lo hlongolisa a hosi, va ya yi kuma le tibaleni la Jeriko, a yimpi yakwe yontlhe yi mu tsika yi hangalaka.

⁶ Zonake va lo khoma a hosi va yi yisa ka hosi ya le Babuloni le Ribla, yi ya lamulwa leyo.

⁷ Va lo daya a vanana va Zedekia kuwoneni kakwe; va lo xokola a mahlo ya Zedekia, va mu boha hi mangenje ya suku, va mu yisa le Babuloni.

⁸ Makunu hi hweti ya wuntlhanu, hi siku ga 7 (gi nga lembe ga wu 19 ga kufuma ka Nebukadnezare a hosi ya le Babuloni), ku lota Nebuzaradani a nduna ya varinzeli, a nanza ga hosi ya le Babuloni, a ta enghena Jerusalema.

⁹ I lo ta hisa a yindlu ya Jehova ni yindlu ya hosi; a hisetela tontlhe tiyindlu ta le Jerusalema, ni tontlhe tiyindlu ta vahombe.

¹⁰ Zonake yontlhe a yimpi leyi ya maKaldea yi nga wa hi ni nduna ya varinzeli yi lo khungumula a ligingisi leli li nga wa renzelekele Jerusalema.

¹¹ Makunu a vanhu lava va nga wa sele lomu mutini, ni lava va nga wa ti nyikele ka hosi ya le Babuloni, ni misalela ya vanhu, Nebuzaradani a nduna ya vahlayisi i lo va khoma a va yisa wukhumbini.

¹² Ntsena lezaku a nduna ya varinzeli yi lo siya vanwani vatsongwani va tiko kasi va fela ku hlayisa a zivina ni ku rima a masimu.

¹³ A maKaldea ma lo fayetela a timhanze ta suku leti ti nga wa hi lomu ndlwini ya Jehova, ni zikhatelo ni bimbi ga suku legi gi nga wa hi lomu ndlwini ya Jehova; zonake va lo heleketa a suku wa kona le Babuloni. 1 Tih. 7:15; Jer. 27:19

¹⁴ Va lo teka a timbita ni mafoxola, ni mikwana ni mikombe, ni zontlhe zibya za suku, lezi va nga wa tira ha zona a ntiro wa kukhozela.

¹⁵ A nduna ya varinzeli yi lo teka ni zimbitana za libani, ni zinamelo ni zontlhe lezi zi nga wa hi za nzalama ni siliva.

¹⁶ A timhanze leti ta timbiri, ni bimbi, ni zikhatelo lezi Solomoni a nga wa zi mahele a yindlu ya Jehova, a suku wa zontlhe lezi a wu pimiwangi laha xikalwini.

¹⁷ A kuleha ka mhanze yinwe ni yinwani ku wa hi 18 wa mikono, ni kutlakuka ka zirenzelekwani za suku zi nga wa hi hehla ka tona ku wa hi mikono minharu. A zirenzelekwani zi wa komelwe, na zi hi ni mapomegranada ma zi ranzelekeleko; zontlhe zi wa hi za suku. A mhanze ya wumbiri kambe yi wa hi zalezo.

¹⁸ A nduna ya varinzeli yi lo khoma Sereya, a mupristi wa hombe, na Zefania, a mupristi wo gamela, ni vahlayisi vanharu va nyangwa.

¹⁹ Laho mutini i lo khoma a nduna ya vanhu va yimpi, ni ntlhanu wa tinghanakana ta hosi, lava va kumilweko lomu mutini, ni mutsali wa nduna ya yimpi, loyi a nga wa tira a ku hlomisa a vanhu va tiko, ni 60 wa vavanuna va tiko lava va nga wa hi lomu mutini.

²⁰ Nebuzaradani a nduna ya varinzeli i lo va khoma a va yisa ka hosi ya le Babuloni le Ribla.

²¹ A hosi ya le Babuloni yi lo va daya le Ribla, le tikweni ga le Hamate. Zinghaho a vaJuda va lo yiswa le wukhumbini ga le kule ni tiko gabye.

²² Kanilezi a vanhu lava Nebukadnezare hosi ya le Babuloni a nga va siyile lomu tikweni ga ka Juda, i lo yimisa Gedalia nʼwana Ahikamu wa Xafani a kuva hosi yabye. Jer. 40:5

²³ Makunu tontlhe tinduna ta yimpi ni vanhu va tona, laha va nga wa zwile lezaku a hosi ya le Babuloni yi yimisile Gedalia a ku va a fumela tiko, va lota ka Gedalia le Mizpa, a nga yena Ixmaeli nʼwana Natania, na Joanani nʼwana Karea, na Seraia nʼwana Tanhumete a muNetofate, na Jaazania nʼwana Maakate; va lota zinwe ni vanhu vabye.

²⁴ Gedalia i lo hlambanya kabye ni ka vanhu vabye, aku: Mu nga chavi malanza ya maKaldea; akani lomu tikweni mu khozela a hosi ya le Babuloni, mu ta tshameka khwatsi.

²⁵ Kanilezi hi hweti ya wu 7 Ixmaeli nʼwana Natania wa Elixama, wa lixaka la wuhosi i lota zinwe ni 10 wa vavanuna va ta daya Gedalia, afa zinwe ni vaJuda, ni maKaldea, lava a nga wa hi navo le Mizpa. Jer. 41:1

²⁶ Zonake a vanhu vontlhe, kusukela ka vatsongwani kala ka vahombe, ni tinduna ta yimpi, va lo suka vaya le Gipite, hakuva va wa chava maKaldea.

²⁷ Makunu hi lembe ga wu 37 ga kukhonwa ka Jehoiakina a hosi ya ka Juda, hi hweti ya wu 12, hi siku ga 27, Evil-Merodaki a hosi ya le Babuloni, a lembe lego a nga sangula ku fuma, i lo tlakusa a hloko ya Jehoiakina a hosi ya ka Juda, a mu humesa lomu paxweni.

²⁸ I lo wulawula kusasa ka yena, a mu tlakusa hehla ka tihosi leti ti nga wa hi zinwe naye le Babuloni.

²⁹ I lo mu susa a tinguwo takwe ta wuperesu, aga zakuga mahlweni ka hosi wontihe masiku ya kuhanya kakwe.

³⁰ Lezi a nga wa zi vumala, i wa nyikiwa hi hosi a xiavelo xa siku ni siku, wontihe masiku ya wutomi gakwe.