2 Tihosi 24 - Tshwa Bible

Vanhu va le Juda va yiswa wukhumbini.

¹ Masikwini yakwe Nebukadnezzare a hosi ya le Babuloni i lo hloma yimpi, Jehoiakimu a maha nanza gakwe malembe manharu; zonake i lo mu hluwuka.

² Jehova i lo rumela a mabutho ya maKaldea, ni ya maSiria, ni ya vaMoabi, ni ya vanana va ka Amoni a ku yalwa na Jehoiakimu; i lo ma rumela a ku ya hlasela va ka Juda, khwatsi hi lezi Jehova a wulileko hi nomu wa malanza yakwe, a vaprofeti.

³ Kunene, khwatsi hi kuleletela ka Jehova, zi lo maheka ka va ka Juda, lezaku a va susa mahlweni kakwe hi kota ya zionho zontlhe za Manasa lezi a zi mahileko; Jer. 15:4

⁴ kambe hi kota ya nkhata lowu wu nga hiko na nanzu lowu a wu halatileko, hakuva i tatile a Jerusalema hi nkhata wu nga hiko na nanzu; hikwalaho Jehova a nga vumelangi ku tsetselela.

⁵ A yinwani mitiro ya Jehoiakimu ni zontlhe lezi a zi mahileko zi tsalilwe lomu bhukwini ga Matimu ya tihosi ta ka Juda.

⁶ Jehoiakimu i lo etlela zinwe ni vararu vakwe; zonake a nʼwana wakwe Jehoiakina i lo fuma xikhundleni xakwe.

⁷ A hosi ya Gipite a ya ha engetangi yi huma lomu tikweni ga yona, hakuva a hosi ya le Babuloni yi wa tekile tiko gontlhe legi gi nga wa hi ga hosi ya le Gipite, kusukela xicongwaneni xa le Gipite kala le Congweni wa Eufrate.

⁸ Jehoiakina i wa hi ni 18 wa malembe a xikhati a nga sangula ku fuma; i lo fuma tihweti tinharu le Jerusalema. A vito ga nyine wakwe i wa hi Nehuxta nʼwana Elnatane wa le Jerusalema.

⁹ Yena i lo maha kubiha mahlweni ka Jehova, a lanzela zontlhe lezi a vararu vakwe va zi mahileko.

¹⁰ Xikhatini xwalexo a malanza ya Nebukadnezare a hosi ya le Babuloni ma lo kanziha ma ta hlasela Jerusalema, va vimbezela a muti.

¹¹ Nebukadnezare a hosi ya le Babuloni i lota mahlweni ka muti, a malanza yakwe na ma ha wu vimbezele.

¹² Zonake Jehoiakina a hosi ya ka Juda i lo ti nyikela ka hosi ya le Babuloni zinwe ni nyine wakwe, ni malanza yakwe, ni tinduna takwe, ni mithenwa yakwe. A hosi ya le Babuloni yi lo mu khoma hi lembe ga wu 8 ga kufuma kakwe.

¹³ I lo teka xontlhe a xuma xa yindlu ya Jehova, ni xuma xa yindlu ya hosi, a tsemelela zontlhe zibya za nzalama lezi Solomoni a hosi ya ka Israeli a nga wa zi mahele yindlu ya Jehova, khwatsi hi kuwula ka Jehova. Jer. 20:5

¹⁴ I lo khomela vontlhe va le Jerusalema, ni tinduna tontlhe, ni tinghwazi tontlhe, a famba navo. Va wa hi 10,000 wa tiperesu; i lo khomela ni vavatli vontlhe ni vafuli, ku sala a zisiwana basi.

¹⁵ I lo khoma Jehoiakina a mu yisa le Babuloni; a khoma ni nyine wa hosi, ni vasati va hosi, ni malanza ya yona, ni masingalakati ya tiko, a va susa le Jerusalema a va yisa le Babuloni. Jer. 22:26

¹⁶ A tinhenha tontlhe ti wa hi 7,000 wa vavanuna, ni vavatli, ni vafuli va nyunzo va wa hi 1,000 wa vavanuna, ni vontlhe a vavanuna va ntamu lava va zi kotako ku hloma matlhari. A hosi ya le Babuloni yi lo va khoma, va yiswa le Babuloni na va hi tikhumbi.

¹⁷ A hosi ya le Babuloni yi lo yimisa Mattania, a nakulobye wa raru wa Jehoiakina, a kuva hosi xikhundleni xa Jehoiakina; i lo hunzula a vito gakwe a mu chula ga Zedekia.

¹⁸ Zedekia i wa hi ni 21 wa malembe a xikhati a nga sangula ku fuma; i lo fuma 11 wa malembe le Jerusalema. A vito ga nyine wakwe i wa hi Hamutali nʼwana Jeremia wa le Libna. Jer. 52:1

¹⁹ I lo maha kubiha mahlweni ka Jehova, khwatsi hi zontlhe lezi Jehoiakimu a zi mahileko.

²⁰ Hakuva a zanga ya Jehova yi lo vindlukela Jerusalema na Juda, kala a va hoxa lahandle va suka mahlweni kakwe. Zonake Zedekia i lo hluwuka a hosi ya le Babuloni.