2 Tihosi 23 - Tshwa Bible

Josia a hetisa a wukhozeli ga zifananiso.

¹ A hosi yi lo rumisa lezaku ku tsomhanyiswa wontihe masingalakati ya vaJuda ni va le Jerusalema, vata kakwe.

² A hosi yi lo kanziha yiya lomu ndlwini ya Jehova zinwe ni vontlhe vanhu va ka Juda, ni vaaki vontlhe va lomu Jerusalema, ni vapristi, ni vaprofeti, ni vontlhe vanhu, vatsongwani ni va hombe, a gonza tindleveni tabye a timhaka tontlhe ta bhuku ga xivumelwano legi gi thumbilweko lomu ndlwini ya Jehova. Deut. 31:11

³ A hosi yi lo yima hi laha nyangweni yi maha xivumelwano mahlweni ka Jehova lezaku i ta lanzela Jehova, a hlayisa milayo yakwe, ni timhaka takwe, ni zileletelo zakwe hi mbilu yakwe yontlhe, ni muhefemulo wakwe wontihe, ni kutiyisa ka timhaka ta xivumelwano lexi, leti ti tsalilweko lomu bhukwini legi. A vanhu vontlhe va lo ti boha xivumelwaneni lexo. Jox. 24:25

⁴ A hosi yi lo leletela mupristi wa hombe Hilkia, ni vapristi va tsongwani, ni vahlayisi va nyangwa a ku humesa lomu tempeleni ya Jehova zontlhe lezi zi mahelweko Baali na Axtarte, ni handla gontlhe ga tilo, a zi hisa lahandle ka Jerusalema, le koveni wa Kidroni, a yisa a khuma ga kona le Beteli.

⁵ I lo susa a vapristi va zifananiso lava va nga wa yimisilwe hi tihosi ta ka Juda a kuva vahisi va tibani lomu matshanwini ma tlakukileko, ni lomu mitini ya va ka Juda, ni le handle ka Jerusalema, ni lava va nga wa phahlela ka Baali ni ka gambo, ni ka hweti, ni ka zimilwa, ni ka handla gontlhe ga tilo, va zi hisela tibani.

⁶ I lo humesa a xifananiso xa Axtarte lomu ndlwini ya Jehova, a zi yisa handle ka Jerusalema, le koveni wa Kidroni a ya zi hisa, a halata a khuma ga zona lomu xilahleni xa vanhu va tiko,

⁷ I lo khungumulela a tiyindlu ta vanhu lava va ti nyiketelako wubhayini va tshamileko lomu ndlwini ya Jehova, laha a vavasati va lukelako kona a matenda ya Axtarte.

⁸ I lo vitana vontlhe vapristi lava va tshamileko lomu mitini ya ka Juda, a nyenyezisa a matshamu ma tlakukileko, laha a vapristi va nga wa hisela kona tibani, kusukela le Geba kala le Berexeba; i lo khungumula a matshamu ma tlakukileko ya tinyangwa lawa ma nga ndleleni ya nyangwa ya Joxua a nduna ya muti, hi tlhelo ga xibhabha xa nyangwa ya muti. Jer. 11:13

⁹ Hambulezo, a vapristi va matshamu ma tlakukileko a va ha kanzihangi kambe le alatini ga Jehova le Jerusalema; kanilezi va loga zibaba lezi zi nga comelwangiko xikari ka va ka kabye. Ezek. 44:10

¹⁰ A hosi yi lo nyenyezisa Tofeti legi gi nga le koveni wa vanana va ka Hinome, kasi a ngave kona munhu a ta nga hisa a nʼwana wakwe wa mufana kutani wa nhanyana laha nzilweni wa Moloke. Levi 18:21; Jer. 7:31

¹¹ A nga ha vumelangi lezaku a mahaxi lawa a tihosi ta ka Juda ti nga wa ma nyikelisisile ka gambo, a kuva mata lomu ndlwini ya Jehova kusuhani ni yindlu ya Natani-Meleki a nduna ya muti, loyi a akileko le hubyeni ga le nzhako; i lo hisa a tikareta ta gambo.

¹² I lo khungumulela a maalati lawa ma nga wa hi le hehla ka yindlu yi tlakukileko ya Ahaza, lawa ma akilweko hi tihosi ta ka Juda, ni maalati lawa Manasa a nga wa akile ka tihubye timbiri ta yindlu ya Jehova; a hosi yi lo ma hahlula yi ma hoxa lahasi, yi ya halata a tsutsungwani wa kona le xicongwaneni xa Kidroni.

¹³ I lo hangalasa ni matshamu ma tlakukileko ma nga wa cuwukene ni Jerusalema hi tlhelo ga Mutsuwuka-gambo ga xitsunga xa Kulova, lawa Solomoni a hosi ya ka Israeli a nga wa ma akele Axtarte, a manyala ya vaSidoni, na Kemoxe, a manyala ya maMoabi, na Milkome, a manyala ya vanana va ka Amoni; a hosi i lo ma nyenyezisa. Mitse. 21:29

¹⁴ I lo fayetela a zifananiso, a tsemelela ni zifananiso za Axtarte, a tata wutshamu ga zona hi marambu ya vanhu. Ekso. 34:13; Deut. 7:5

¹⁵ Ni kambe i lo khungumula a alati legi gi nga wa hi le Beteli, ni wutshamu gi tlakukileko legi gi nga wa mahilwe hi Jeroboamu nʼwana Nebate, loyi a onhisileko va ka Israeli; i lo khungumula a alati lego ni wutshamu gi tlakukileko, a hisa a yindlu ya kona a yi maha tsutsungwani, a hisa ni xifananiso xa Axtarte.

¹⁶ Josia i lo hunzuluka a cuwuka a zilahla lezi zi nga wa hi laho xitsungeni, a humesa a marambu minkeleni leyo, a ma hisa alatini, a gi nyenyezisa khwatsi hi lezi Jehova a wulileko hi nomu wa munhu wa Nungungulu loyi a wulileko timhaka leti. 1 Tih. 13:2

¹⁷ Zonake a hosi yi te ngalo: Xialakanyiso xa yini lexi nzi xi wonako ke? A vanhu va muti va lo hlamula, vaku: Xilahla xa munhu wa Nungungulu loyi a ngata hi le Juda, a taba huwa mahlweni ka alati ga Beteli hi zilo lezi wena u zi mahileko.

¹⁸ Yena i te ngalo: Mu tsikeni a rula! Ngha a nga hi kona munhu a susako marambu yakwe. Zonake va lo tsika a marambu yakwe ni ya muprofeti loyi a ngata hi le Samaria.

¹⁹ Josia i lo susa ni tontlhe tiyindlu ta lomu ka matshamu ma tlakukileko ti nga wa hi lomu mitini ya tiko ga Samaria ti nga wa mahilwe hi tihosi ta ka Israeli, va zangarisa Jehova; i lo ti maha khwatsi hi leti ta le Beteli.

²⁰ I lo daya vontlhe vapristi lomu maalatini, lava va nga wa hi kona, a hisa marambu yabye hehla ka maalati; zonake i lo tlhelela Jerusalema.

²¹ A hosi yi lo leletela vanhu vontlhe, yiku: Mahani a Pasika ya Jehova Nungungulu wa nwina, khwatsi hi lezi ku tsalilweko lomu bhukwini ga xivumelwano. Ekso. 12:3; Deut. 18:2

²² Hakuva cima a ku mahiwangi a Pasika ya ku nghahi kusukela masikwini ya Valamuli va ka Israeli, ni masiku wontihe ya tihosi ta ka Israeli, ni masiku ya tihosi ta ka Juda.

²³ Kanilezi hi lembe ga wu 18 ga kufuma ka hosi Josia ku lo mahiwa a Pasika ya Jehova le Jerusalema.

²⁴ Ni kambe Josia i lo hlongola vangoma, ni zitumbe, ni materafime, ni zifananiso za vanungungulu, ni wontihe manyala lawa ma wonilweko lomu tikweni ga ka Juda ni ga Jerusalema, kasi ku tiyisa a timhaka ta nayo leti ti tsalilweko lomu bhukwini legi mupristi Hilkia a gi thumbileko lomu ndlwini ya Jehova. Levi 19:31; Deut. 18:10; Isa. 8:19

²⁵ Cima ku wa nga hi kona hi mahlweni kakwe a hosi yo kota yena leyi yi nga hunzulukela ka Jehova hi mbilu yakwe yontlhe, ni muhefemulo wakwe wontihe, ni ntamu wakwe wontihe, a lanzela a nayo wa Mosi; ni nzhako kakwe cima a ku humangi munwani wo kota yena.

²⁶ Hambulezo, a zanga ya Jehova cima a yi bohlangi, hakuva yi wa hi ya hombe, hakuva i wa holovela vaJuda hi kota yo zontlhe lezi Manasa a nga mu zangarisa ha zona.

²⁷ Hakuva Jehova i waku: Yenawu Juda nzi ta mu susa mahlweni ka mina, khwatsi hi lezi nzi susileko Israeli, nzi hoxa a muti lowu nzi wu hlawuleko, a muti wa Jerusalema, ni yindlu leyi nzi nga wa te ngalo: A vito ga mina gi ta tshama ka yona.

²⁸ A yinwani mitiro ya Josia ni zontlhe lezi a zi mahileko zi tsalilwe lomu bhukwini ga Matimu ya tihosi ta ka Juda.

²⁹ Xikhatini xwalexo xakwe, Faro-Neko a hosi ya le Gipite i lo kanziha a ku yalwa ni hosi ya le Asiria, le Congweni wa Eufrate; yenawu hosi Josia i lo huma ku mu tlhangaveta. Zonake laha Faro-Neko a nga mu wona, i lo mu daya le Megido.

³⁰ A malanza yakwe ma lo suka le Megido na ma mu rwele hi kareta, ma mu yisa le Jerusalema, ma ya mu lahla xilahleni xakwe. Zonake a vanhu va tiko va lo teka Jehoahaza nʼwana Josia va mu tota hi mafura, va mu wumbela wuhosi xikhundleni xa raru wakwe. Jehoahaza a khomiwa hi vaGipite.

³¹ Jehoahaza i wa hi ni 23 wa malembe a xikhati a nga sangula ku fuma. I lo fuma tihweti tinharu le Jerusalema. A vito ga nyine wakwe i wa hi Hamutali nʼwana Jeremia wa le Libna.

³² Yena i lo maha kubiha mahlweni ka Jehova; i lo lanzela zontlhe lezi zi mahilweko hi vararu vakwe.

³³ Faro-Neko i lo mu khotsela le Ribla, a tikweni ga Hamate, lezaku kasi a nga fumi le Jerusalema; zonake i lo leletela lomu tikweni ga ka Juda lezaku va neha a nzhuvo wa 100 wa titalenta ta siliva, ni talenta yinwe ya nzalama.

³⁴ Faro-Neko i lo yimisa Eliakimu nʼwana Josia a kuva hesi xikhundleni xa raru wakwe Josia, a hunzula a vito gakwe aku hi Jehoiakimu; kanilezi Jehoahaza i lo mu teka a mu yisa le Gipite, a si ya fela leyo.

³⁵ Jehoiakimu i lo nyika Faro a siliva ni nzalama; kanilezi yena i lo leletela a vanhu a ku humesa mali ya nzhuvo leyo, khwatsi hi kuleletela ka Faro. Yena i lo kurumeta lezaku a vanhu va tiko, a siliva ni nzalama, munwe ni munwani a humesa kota lipimo lakwe kasi ku ya nyika Faro-Neko.

³⁶ Jehoiakimu i wa hi ni 25 wa malembe a xikhati a nga sangula ku fuma; i lo fuma 11 wa malembe le Jerusalema. A vito ga nyine wakwe i wa hi Zebida nʼwana Pedaia wa le Ruma.

³⁷ I lo maha kubiha mahlweni ka Jehova, a lanzela zontlhe lezi a vararu vakwe va nga zi maha.