2 Tihosi 21 - Tshwa Bible

Manasa a fumela Juda.

¹ Manasa i wa hi ni 12 wa malembe a xikhati a nga sangula ku fuma. I lo fuma 55 wa malembe le Jerusalema. A vito ga nyine wakwe i wa Hefziba.

² I lo maha lezi zi bihileko mahlweni ka Jehova, a lanzela a manyala ya matiko lawo Jehova a ma hlongoleko mahlweni ka vanana va ka Israeli.

³ I lo aketa a matshamu ma tlakukileko lawa ma nga wa khungumulwe hi raru wakwe Hezekia, a aketa ni alati ga Baali, a maha xifananiso xa Axtarte, khwatsi hi lezi a nga wa mahile Ahabi a hosi ya ka Israeli; i lo khizamela wontihe mabandla ya tilo a ma khozela.

⁴ I lo aka a alati lomu ndlwini ga Jehova, lomu Jehova a nga wa te ngalo: Nzi ta veka a vito ga mina le Jerusalema. Deut. 12:5; 1 Tih. 8:29

⁵ I lo aketela a maalati ya mabandla ya tilo matshanwini mambiri ya yindlu ya Jehova.

⁶ I lo hisa a nʼwana wakwe nzilweni, a namarela wutumbeni ni wuloyini, a yimisa vangoma ni vavumbi, a maha kubiha ko hunzeleta mahlweni ka Jehova, a mu zangarisa. Levi 18:21; 19:26; Jer. 32:35

⁷ I lo yimisa a zifananiso za Axtarte a zi mahileko ndlwini leyi hi kota ya Davida ni nʼwana wakwe Solomoni Jehova a nga te: Leyi yindlu ni muti wa Jerusalema nzi zi hlawule xikari ka tontlhe tixaka ta ka Israeli kasi ku aka a vito ga mina kala kupinzuka.

⁸ Nzi nga ta maha a mikonzo ya ka Israeli yi nzula kambe le handle ka tiko legi nzi nyikileko vararu vabye, loku vona va khatalela ku maha zontlhe lezi nzi va leleteleko a ku zi maha, va hlayisa a milayo leyi a nanza ga mina Mosi a va leleteleko.

⁹ Kanilezi vona a va ingisangi; Manasa i lo va kucetela ku maha kubiha ka hombe ku hunza matiko lawa Jehova a ma lovisileko mahlweni ka vanana va ka Israeli.

¹⁰ Jehova i lo kanela hi milomu ya malanza yakwe, va nga vaprofeti, aku:

¹¹ Kota lezi Manasa a hosi ya ka Juda a mahileko manyala ya kunghahi, a onha ku hunza vaAmori lava va nga wa hi kona hi mahlweni kakwe, a onhisa ni vaJuda hi zifananiso zakwe: Jer. 15:4

¹² hi kota ya lezo Jehova Nungungulu wa ka Israeli i ngalo: Nzi ta neha khombo lomu Jerusalema ni tikweni ga ka Juda, a khombo ga hombe nguvu gaku ni wihi loyi a ta nga gizwa a tindleve takwe ti ta cwangula.

¹³ Nzi ta pima a Jerusalema hi lingoti la le Samaria ni xipimanyiso xa yindlu ya Ahabi; nzi ta sula a Jerusalema, khwatsi hi loku a munhu a sula a ngelo a wu khubhunyeta.

¹⁴ Nzi ta hoxa a misalela ya vanhu va mina, nzi va nyikela mandleni ya valala vabye, va phangiwa va khomiwa hi valala vabye vontlhe;

¹⁵ hakuva va mahile lezi zi bihileko mahlweni ka mina, va nzi zangarisa, kusukela siku lego nzi nga humesa vararu vabye hi le Gipite kala nyamutlha.

¹⁶ Ni kambe Manasa i halatile nguvu a nkhata wu nga hiko na nanzu kala a tata a Jerusalema ha wona, kusukela nyangweni yinwe ya muti kala ka yinwani nyangwa, ahandle ka zionho zakwe lezi a onhisileko ha zona va ka Juda; i mahile kubiha mahlweni ka Jehova.

¹⁷ A yinwani mitiro ya Manasa ni zontlhe lezi a zi mahileko zi tsalilwe lomu bhukwini ga Matimu ya tihosi ta ka Juda.

¹⁸ Manasa i lo etlela zinwe ni vararu vakwe, a lahliwa lomu sinwini ga yindlu yakwe, a sinwini ga Uza; zonake a nʼwana wakwe Amoni i lo fuma xikhundleni xakwe. Amoni a fumela Juda.

¹⁹ Amoni i wa hi ni 22 wa malembe a xikhati a nga sangula ku fuma; i lo fuma malembe mambiri lomu Jerusalema. A vito ga nyine wakwe i wa Mexulemete, a nʼwana Haruza wa le Jotba.

²⁰ I lo maha lezi zi bihileko mahlweni ka Jehova khwatsi hi lezi a nga maha a raru wakwe Manasa.

²¹ I lo lanzela tindlela tontlhe ta raru wakwe, a khozela a zifananiso lezi a raru wakwe a nga zi khozela, a zi khizamela.

²² I lo fularela Jehova Nungungulu wa vararu vakwe, a nga fambi hi tindlela ta Jehova.

²³ A malanza ya Amoni ma lo maha mahlevo, ma daya hosi lomu ndlwini ya yona.

²⁴ Kanilezi a vanhu va tiko va lo daya vontlhe lava va nga vukela hosi Amoni, va yimisa nʼwana wakwe Josia a ku fuma xikhundleni xakwe.

²⁵ A yinwani mitiro ya Amoni ni lezi a zi mahileko zi tsalilwe lomu bhukwini ga Matimu ya tihosi ta ka Juda.

²⁶ I lo lahliwa nkeleni wakwe lomu sinwini ga Uza; zonake a nʼwana wakwe Josia i lo fuma xikhundleni xakwe.