2 Tihosi 17 - Tshwa Bible

A kuwa ka Israeli.

¹ Hi lembe ga wu 12 ga kufuma ka Ahaza a hosi ya ka Juda, Hoxea nʼwana Ela i lo sangula ku fuma lomu tikweni ga ka Israeli le Samaria; i lo fuma 9 wa malembe.

² I lo maha lezi zi bihileko mahlweni ka Jehova, kanilezi i wa nga koti tihosi ta ka Israeli leti ti nga fuma hi mahlweni kakwe.

³ Ku lota Xalmanesera a hosi ya le Asiria a ku talwa naye; zonake Hoxea i lo khoza kakwe, a mu luva.

⁴ A hosi ya le Asiria yi lo wona lezaku i na ni makungo ya ku mu vukela, hakuva i wa rumile a mitsumi yiya ka So, a hosi ya le Gipite, ni lezaku i wa nga ha rumeli a nzhuvo ka hosi ya le Asiria khwatsi hi manwani malembe. Zonake a hosi ya le Asiria yi lo mu khoma yi mu valela paxweni.

⁵ Zonake a hosi ya le Asiria yi lo tsemakanya a tiko gontlhe yi kanziha yita Samaria, yi gi vimbezela malembe manharu.

⁶ Hi lembe ga wu 9 ga kufuma ka Hoxea, a hosi ya le Asiria yi lo teka a Samaria, yi yisa va ka Israeli tikweni ga le Asiria, yi ya va akisa le Hala ni le Habora, le Congweni wa Gozani, ni le mitini ya vaMedi.

⁷ Hakuva a vanana va ka Israeli va wa onhele Jehova Nungungulu wabye loyi a va humesileko tikweni ga Gipite, lahasi ka canja ga Faro a hosi ya le Gipite, kambe va wa khozele vanwani vanungungulu. Levi 18:3

⁸ Va lo lanzela a mikhuwo ya matiko lawo Jehova a nga ma hlongola mahlweni ka vanana va ka Israeli, ni mikhuwo ya tihosi ta ka Israeli leyi ti yi mahileko.

⁹ A vanana va ka Israeli va lo maha zinyenyeko ka Jehova Nungungulu wabye hi ku maha a zilo zi nga lulamangiko: va lo ti akela a matshamu ma tlakukileko lomu mitini yabye yontlhe, kusukela ka tiyindlu ta varinzeli kala mitini ya makhokhola.

¹⁰ Va lo ti yimisela a zifananiso za Axtarte lomu matshanwini wontihe ya zitsunga zo leha, ni lahasi ka tontlhe tisinya to nyuka.

¹¹ Va lo hisa tibani lomu matshanwini wontihe ma tlakukileko, khwatsi hi matiko lawa Jehova a nga ma hlongole mahlweni kabye; va lo maha kubiha, va zangarisa Jehova.

¹² Va lo khozela zifananiso lezi Jehova a va byelileko ku ngalo: Mu nga zi mahi. Ekso. 20:2—23:13, 24; Deut. 5:7

¹³ Kasike Jehova i wa va byelile va ka Israeli ni va ka Juda hi vaprofeti vakwe, ni vontlhe vawoni vakwe: aku: Tlhelani lomu tindleleni ta nwina to biha, mu hlayisa zileletelo za mina ni milayo ya mina, khwatsi hi lezi nzi leleteleko vararu va nwina yontlhe milayo, kotisa lezi nzi rumileko a malanza ya mina, va nga vaprofeti.

¹⁴ Kanilezi a va ingisangi; va lo nonohisa a tinhamu tabye khwatsi hi vararu vabye, lava va nga kholwangiko ka Jehova Nungungulu wabye. Ekso. 34:9; Deut. 31:27; Mal. 3:6

¹⁵ Va lo ala milayo yakwe, ni xivumelwano xakwe lexi a xi mahileko ni vararu vabye, ni kulaya loku yena a va layileko ha kona; va lo lanzela manyala, va nga ma tsiki, va lanzela mahanyela ya matiko lawa ma va ranzeleko, lawa Jehova a nga va leletela lezaku va nga mahi zo kota lezi zi mahiwako hi wona.

¹⁶ Va lo tsika yontlhe milayo ya Jehova Nungungulu wabye, va wumba zifananiso za marole mambiri, va ti mahela a zifananiso za Axtarte, va khizama mahlweni ka wontihe mabandla ya tilo, va khozela Baali.

¹⁷ Va lo hisa vafana vabye ni vanhanyana vabye lomu minzilweni, va ti nyiketela kuvumbeni ni wuloyini, ni ku maha lezi zi bihileko mahlweni ka Jehova, va mu zangarisa. Levi 18:21; Deut. 18:10

¹⁸ Hikwalaho Jehova i lo zangarela va ka Israeli, a va susa mahlweni kakwe, ku nga sali nchumu ka vona, ahandle ka nyangwa ya ka Juda basi.

¹⁹ Hambu yenawu Juda a nga hlayisangi a milayo ya Jehova Nungungulu wakwe; va lo lanzela mikhuwo ya va ka Israeli, leyi va nga wa ti yimisele.

²⁰ Zinghaho Jehova i lo cukumeta pswalo wontihe wa ka Israeli, a va hlokisa, a va nyikela mandleni ya vaphangi, kala a va susa mahlweni kakwe. Vala. 2:14

²¹ Hakuva loku Nungungulu a pambule a va ka Israeli ka yindlu ya ka Davida, va lo ti yimisela Jeroboamu wa Nebate a kuva hosi, loyi a nga hambukisa Israeli a nga lanzeli Jehova, a va onhisa hi zionho za hombe.

²² A vanana va ka Israeli a va tsikangi zontlhe lezi zi nga wa mahiwa hi Jeroboamu,

²³ kala Jehova a susa va ka Israeli mahlweni kakwe, khwatsi hi lezi a wulawulileko hi milomu ya malanza yakwe wontihe, va nga vona vaprofeti; i lo susa va ka Israeli lomu tikweni gabye a va yisa le Asiria, lomo va akileko kona kala nyamutlha. Deut. 28:36

²⁴ A hosi ya le Asiria yi lo neha a vanhu va le Babuloni ni va le Kuta ni va le Ava, ni va le Hamate, ni va le Sefarvaime, yi ta va akisa lomu mitini ya Samaria, matshanwini ya vanana va ka Israeli; va lo tshama Samaria, va aka mitini ya kona.

²⁵ Laha va nga wa sangula ku aka, va wa nga chavi Jehova; zonake Jehova i lo va rumela a tinghonyamu ti ta va daya. Levi 26:21

²⁶ Hikwalaho va lo tivisa a hosi ya le Asiria, vaku: A vanhu lava u nga va heleketa le Samaria u ya va akisa, a va tivi nayo wa Nungungulu wa tiko legi, hi xigelo lexo a va rumeleko a tinghonyamu leto ti va dayako, hakuva vona a va tivi nayo wa Nungungulu wa tiko lego.

²⁷ Zonake a hosi ya le Asiria yi lo leletela lezaku: Tlhelisani a munwe wa vapristi lava mu va susileko leyo, a ya aka kona, a va gonzisa a nayo wa Nungungulu wa tiko lego.

²⁸ Zinghaho a munwe wa vapristi lava va susilweko le Samaria i lo ta aka Beteli, a va gonzisa lezi va faneleko ku mu chavisa zona Jehova.

²⁹ Hambu zi hi tano a tiko ginwe ni ginwani gi lo ti mahela a nungungulu wa gona lomu mitini ya gona, va veka lomu tindlwini ta matshamu ma tlakukileko, ti akilweko hi vaSamaria.

³⁰ A vanhu va le Babuloni va lo maha Sukote-Benote; a vanhu va le Kuta va lo maha Nergale; ni vanhu va le Hamate va lo maha Axima.

³¹ A vaAva va lo maha Nibhaza na Tartaka; a vaSefarva va hisela Adrameleki na Anameleki a vanana vabye nzilweni, va nga vanungungulu va vaSefarva.

³² Kambe va lo chava Jehova, va ti hlawutela xikari kabye lava va ta ngava vapristi va matshamu ma tlakukileko, lava va nga wa va mahela miphahlelo lomu tindlwini ta wona.

³³ Va wa chava Jehova, na va khozela vanungungulu vabye hi mamahela ya matiko lawa va humeleko ka wona.

³⁴ Ni nyamutlha lezi va ha lanzela mikhuwo yabye yo sangula, a va chavi Jehova; ni kambe a va lanzeli milayo ni mikhuwo yakwe, hambu ni zileletelo lezi Jehova a leleteleko a vanana va Jakobe loyi a chulilweko vito ga Israeli. Gen. 32:28; 35:10; 1 Tih. 18:31

³⁵ Jehova i mahile a xivumelwano navo, a va leletela, aku: Mu nga khozeli vanwani vanungungulu; mu nga va khizameli ge hambu ku va khozela mu phahlela ka vona. Ekso. 23:13; Vala. 6:10

³⁶ Kanilezi mu ta khozela Jehova loyi a mu humesileko tikweni ga le Gipite hi ntamu wa hombe ni canja gi nawulutilweko; hi yena mu to khizama mahlweni kakwe, mu nyikela miphahlelo kakwe.

³⁷ Wontihe masiku mu ta hlayisa milayo ni zileletelo zakwe, ni nayo ni ziyimiso lezi a mu tsaleleko zona, na mu nga khozeli vanwani vanungungulu.

³⁸ Mu nga rivali a xivumelwano lexi nzi xi mahileko na nwina; mu nga khozeli vanwani vanungungulu;

³⁹ kanilezi mu ta chava Jehova Nungungulu wa nwina, hakuva hi yena a nga mu tlhatlhisa mandleni ya valala va nwina vontlhe.

⁴⁰ Hambu zi hi tano, a va ingisangi; va lo lanzela mikhuwo yabye yo sangula.

⁴¹ Zinghaho a vamatiko lavo va lo chava Jehova, kanilezi na va kari va khozela a zifananiso zabye; ni vanana vabye kambe ni vazukulu vabye va lo maha khwatsi hi vararu vabye kala nyamutlha.