2 Tihosi 15 - Tshwa Bible

Azaria na Jothamu va fumela Juda.

¹ Hi lembe ga wu 27 ga kufuma ka Jeroboamu a hosi ya ka Israeli, Azaria wa Amazia a hosi ya ka Juda i lo sangula ku fuma.

² I wa hi ni 16 wa malembe a xikhati a nga wumbelwa wuhosi; i lo fuma 52 wa malembe le Jerusalema. A vito ga nyine wakwe i wa hi Jekolia wa le Jerusalema. 2 Kro. 25:3, 4

³ I lo maha lezi zi sasekileko mahlweni ka Jehova, khwatsi hi zontlhe lezi raru wakwe Amazia a nga maha.

⁴ Ntsena lezaku a matshamu ma tlakukileko a ma susiwangi; a vanhu va lo simamisa va nyikela miphahlelo ni ku hisa tibani lomu matshanwini ma tlakukileko.

⁵ Jehova i loba a hosi hi hlokonho leyi a nga babya ha yona kala kufeni kakwe, na tshama lomu ndlwini ya vababyi. Jothamu a nʼwana wa hosi i lo fumela a yindlu ya hosi, na a lamula a vanhu va tiko. Levi 13:46

⁶ A yinwani mitiro ya Azaria ni zontlhe lezi a zi mahileko, zi tsalilwe bhukwini ga Matimu ya tihosi ta ka Juda.

⁷ Azaria i lo etlela zinwe ni vararu vakwe, a lahliwa navo mutini wa Davida; a nʼwana wakwe Jothamu a fuma xikhundleni xakwe. A gujeguje lomu tikweni ga ka Israeli.

⁸ Hi lembe ga wu 38 ga kufuma ka Azaria a hosi ya ka Juda, Zakaria nʼwana Jeroboamu i lo sangula ku fuma le Samaria; i lo fuma 6 wa tihweti.

⁹ I lo maha lezi zi bihileko mahlweni ka Jehova, khwatsi hi vararu vakwe; a nga sukangi zionhweni za Jeroboamu nʼwana Nebate, lezi a nga onhisa ha zona va ka Israeli.

¹⁰ Xaluma nʼwana Jebexe i lo maha mahlevo a mu vukela; i lo mu gwaza kuwoneni ka vanhu, a mu daya. I lo fuma xikhundleni xakwe.

¹¹ A yinwani mitiro ya Zakaria yi tsalilwe lomu bhukwini ga Matimu ya tihosi ta ka Israeli.

¹² Legi hi gona a gezu legi Jehova a nga byela Jehu, aku: A vana va wena va ta tshama xitshanwini xa wuhosi ga ka Israeli kala xizukulwana xa wumune; zi lo mahisa zalezo.

¹³ Xaluma nʼwana Jabexe i lo sangula ku fuma hi lembe ga wu 39 ga kufuma ka Uzzia a hesi ya ka Juda. I lo fuma hweti yinwe le Samaria.

¹⁴ Menahema nʼwana Gadi i lo suka hi le Tirza, a kanziha ata Samaria a ta gwaza Xaluma nʼwana Jabexe, a mu daya; i lo fuma xikhundleni xakwe.

¹⁵ A yinwani mitiro ya Xaluma ni mahlevo yakwe lawa a ma mahileko, zi tsalilwe lomu bhukwini ga Matimu ya tihosi ta ka Israeli.

¹⁶ Zonake Menahema i lo hlasela Tifsa ni vontlhe lava va nga wa hi lomo, ni matikwana ya kona, kusukela le Tirza, hakuva va wa nga mu vulule-langi a tinyangwa ta wona; hikwalaho i lo wu hlasela, a bhoxetela a marumbu ya vavasati lava va nga hi ni tinyimba.

¹⁷ Hi lembe ga wu 39 ga kufuma ka Azaria a hosi ya ka Juda, Menahema nʼwana Gadi i lo sangula ku fumela Israeli; i lo fuma 10 wa malembe le Samaria.

¹⁸ I lo maha lezi zi bihileko mahlweni ka Jehova, a nga zi tsiki wontihe masiku ya kuhanya kakwe a zionho za Jeroboamu nʼwana Nebate, lezi a nga onhisa ha zona va ka Israeli.

¹⁹ Ku lota Pule a hosi ya le Asiria a ku ta vukela tiko ga ka Israeli. Zonake Menahema i lo nyika Pule 1,000 wa titalenta ta siliva, kasi a fela ku mu vunetela ku tiyisa wuhosi lomu mandleni yakwe.

²⁰ Menahema i lo kupisa a mali leyo lomu tikweni ga ka Israeli, kasi ku nyika a hosi ya Asiria; vontlhe vanhu vo fuma, munwe ni munwani i lo humesa 50 wa maxekeli. Zinghaho a hosi ya Asiria yi lo tlhela yi famba, a yi salangi lomu tikweni ga ka Israeli.

²¹ A yinwani mitiro ya Menahema ni zontlhe lezi a zi mahileko, zi tsalilwe lomu bhukwini ga Matimu ya tihosi ta ka Israeli.

²² Menahema i lo etlela zinwe ni vararu vakwe, zonake a nʼwana wakwe i lo fuma xikhundleni xakwe.

²³ Hi lembe ga wu 50 ga kufuma ka Azaria a hosi ya ka Juda, Pekahia nʼwana Menahema i lo sangula ku fuma lomu tikweni ga ka Israeli; i lo fuma malembe mambiri le Samaria.

²⁴ I lo maha lezi zi bihileko mahlweni ka Jehova. A nga tsikangi zionho za Jeroboamu nʼwana Nebate, lezi a nga onhisa ha zona va ka Israeli.

²⁵ Peka, a nʼwana wa nduna yakwe Remalia, i lo mu hleva, a mu vukela a mu gwaza le Samaria lomu ndlwini ya wuhosi, na hi na Argoba, na Arie, zinwe ni 50 wa vavanuna va le Gileade. Zinghaho i lo mu daya, a fuma yena xikhundleni xakwe.

²⁶ A yinwani mitiro ya Pekahia ni zontlhe a zi mahileko, zi tsalilwe lomu bhukwini ga Matimu ya tihosi ta ka Israeli.

²⁷ Hi lembe ga wu 52 ga kufuma ka Azaria a hosi ya ka Juda, Peka nʼwana Remalia i lo sangula ku fuma lomu tikweni ga ka Israeli; i lo fuma 20 wa malembe le Samaria.

²⁸ I lo maha lezi zi bihileko mahlweni ka Jehova. A nga tsikangi a zionho za Jeroboamu nʼwana Nebate lezi a nga onhisa ha zona va ka Israeli. 1 Tih. 12:28

²⁹ Masikwini ya Peka hosi ya ka Israeli, Tiglate-Pilesera a hosi ya le Asiria i lota a ta teka Ijoni, na Abelabete-Maaka, na Janoa, na Kedexe, na Hazora, na Gileade, na Galile, ni gontlhe a tiko ga ka Naftali, a va khoma va maha tikhumbi a va fambisa le Asiria.

³⁰ Zonake Hoxea nʼwana Ela i lo maha mahlevo a vukela Peka, nʼwana Remalia a mu daya, a fuma xikhundleni xakwe hi lembe ga wu 20 ga kufuma ka Jothamu nʼwana Uzzia.

³¹ A yinwani mitiro ya Peka ni zontlhe lezi a zi mahileko, zi tsalilwe lomu bhukwini ga Matimu ya tihosi ta ka Israeli.

Jothamu a fumela Juda.

³² Hi lembe ga wumbiri ga kufuma ka Peka nʼwana Remalia a hosi ya ka Israeli, Jothamu nʼwana Uzzia a hosi ya ka Juda i lo sangula ku fuma.

³³ I wa hi ni 25 wa malembe laha a nga sangula ku fuma; i lo fuma 16 wa malembe le Jerusalema. A vito ga nyine wakwe i wa hi Jeruxa wa Zadoke.

³⁴ I lo maha kululama mahlweni ka Jehova; i lo maha zontlhe lezi a zi mahileko raru wakwe Uzzia.

³⁵ Ntsena lezaku a matshamu ma tlakukileko a ma susiwangi. A vanhu va lo simamisa va nyikela miphahlelo ni ku hisa tibani lomu matshanwini ma tlakukileko. I lo aka a nyangwa ya le hehla ya yindlu ya Jehova.

³⁶ A yinwani mitiro ya Jothamu ni zontlhe lezi a zi mahileko, zi tsalilwe lomu bhukwini ga Matimu ya tihosi ta ka Juda.

³⁷ Masikwini walawo Jehova i lo rumela Rezini a hosi ya le Siria na Peka nʼwana Remalia a ku ya vukela Juda.

³⁸ Jothamu i lo etlela zinwe ni vararu vakwe, a lahliwa zinwe navo le mutini wa raru wakwe Davida. Zonake a nʼwana wakwe i lo fuma xikhundleni xakwe.