2 Tihosi 14 - Tshwa Bible

¹ Hi lembe ga wumbiri ga kufuma ka Joaxi nʼwana Jehoahaza a hosi ya ka Israeli, Amazia nʼwana Joaxi a hosi ya ka Juda i lo sangula ku fuma.

² I wa hi ni 25 wa malembe laha a nga sangula ku fuma, a fuma 29 wa malembe le Jerusalema. A vito ga nyine wakwe i wa hi Jehoiadina wa le Jerusalema.

³ I lo maha kululama mahlweni ka Jehova, kanilezi a nga ringanangi ni raru wakwe Davida; i lo maha zontlhe khwatsi hi lezi a raru wakwe Joaxi a mahileko.

⁴ Hambu lezo, a matshamu yo tlakuka a ma susiwangi; a vanhu va lo simamisa va hisa tibani lomu matshanwini ma tlakukileko.

⁵ Makunu laha a mufumo wu nga wa tiyisilwe mandleni yakwe, i lo daya a malanza yakwe lawa ma nga daya a hosi, a nga raru wakwe.

⁶ Kanilezi a nga dayangi a vanana va vadayi, khwatsi hi lezi ku tsalilweko bhukwini ga nayo wa Mosi, laha Jehova a leleteleko, aku: A vanana va nga dzuki va dawa hi kota ya vadadani, ni vadadani va nga dzuki va dawa hi kota ya vanana, hakuva munwe ni munwani i ta dawa hi kota ya zionho zakwe. Deut. 24:16; Ezek. 18:20

⁷ I lo daya 10,000 wa vavanuna va le Edomi, le Koveni wa Munyu; ka yona yimpi leyo i lo teka Sela a gi chula vito ga Jokteela kala nyamutlha.

⁸ Zonake Amazia i lo rumela mitsumi ka Joaxi nʼwana Jehoahaza wa Jehu, a hosi ya ka Israeli, aku: Ngone hi ta cuwukana!

⁹ Joaxi a hosi ya ka Israeli i lo rumela mitsumi ka Amazia a hosi ya ka Juda, aku: A muzwa lowu wu nga le Lebanoni wu lo rumela mhaka ka sinya ya sedare lowu wu nga le Lebanoni, wuku: Nyikela a nhanyana wa wena ka nʼwana wa mina a maha sati wakwe! Kanilezi a zihari za khwati lezi zi nga lomo Lebanoni zi lo hunza zi kanzihela muzwa lowo. Vala. 9:8

¹⁰ Wena u hlulile Edomi, makunu a mbilu ya wena ya ti kukumukisa; tsaka hi wudumo ga wena u tshama kaya ka wena! Hi kuyini u ti vuxela hlomulo, laha ka kuva u ta nga hluliwa wena zinwe na Juda ke?

¹¹ Kanilezi Amazia a nga ingisangi. Zinghaho Joaxi a hosi ya ka Israeli i lo kanziha. Yena na Amazia a hosi ya ka Juda va lo cuwukana le Bet-Xemexe, a tiko gi lumbako Juda.

¹² Juda i lo hluliwa mahlweni ka va ka Israeli, munwe ni munwani wabye a tsutsumela tendeni gakwe.

¹³ Joaxi a hosi ya ka Israeli i lo khoma Amazia a nʼwana Joaxi wa Ahazia a hosi ya ka Juda le Bet-Xemexe; i loya le Jerusalema a ya khungumula a ligingisi la Jerusalema kusukela laha nyangweni ya ka Efraime kala le nyangweni ya le khuzwini, 400 wa mikono.

¹⁴ I lo teka yontlhe nzalama ni siliva, ni zontlhe zibya lezi zi nga wa hi lomo ndlwini ya Jehova ni leyi yi nga hi lomu ndlwini ya hosi; i lo khoma ni vanwani vanhu a tlhela aya le Samaria.

¹⁵ A yinwani mitiro ya Joaxi ni lezi a zi mahileko, ni wunhenha gakwe, ni lezi a nga lwisa zona na Amazia a hosi ya ka Juda, zi tsalilwe lomu bhukwini ga Matimu ya tihosi ta ka Israeli.

¹⁶ Joaxi i lo etlela zinwe ni vararu vakwe, a lahliwa le Samaria ni tihosi ta ka Israeli, Jeroboamu a nʼwana wakwe a fuma xikhundleni xakwe.

¹⁷ Amazia nʼwana Joaxi a hosi ya ka Juda i lo hanya 15 malembe anzhako ka kufa ka Joaxi nʼwana Jehoahaza a hosi ya ka Israeli.

¹⁸ A yinwani mitiro ya Amazia yi tsalilwe lomu bhukwini ga Matimu ya tihosi ta ka Juda.

¹⁹ Va lo mu hleva va mu vukela le Jerusalema, a tsutsuma aya le Lakixe; va lo mu lanza kwaleyo Lakixe va ya mu dayela kona.

²⁰ Va lo ya mu rwala hi mahaxi, a ta lahliwa zinwe ni vararu vakwe le Jerusalema mutini wa Davida.

²¹ Vontlhe vanhu va ka Juda va lo teka Azaria, loyi a nga wa hi ni 16 wa malembe va mu maha hosi xikhundleni xa raru wakwe Amazia.

²² Yena i lo vuxeta Elati a gi tlelisela wuhosini ga ka Juda, anzhako ka lezo a hosi yi lo etlela ni vararu va yona.

Jeroboamu a fumela Israeli.

²³ Hi lembe ga wu 15 ga kufuma ka Amazia nʼwana Joaxi a hosi ya ka Juda, Jeroboamu nʼwana wa Joaxi a hosi ya ka Israeli i lo sangula ku fuma le Samaria; i lo fuma 41 wa malembe.

²⁴ I lo maha lezi zi bihileko mahlweni ka Jehova, a nga hunzuluki ka zontlhe zionho za Jeroboamu nʼwana Nebate, lezi a nga onhisa ha zona va ka Israeli.

²⁵ I lo vuxeta a mbhingano wa ka Israeli kusukela le nyangweni ya ndlela ya kuya le Hamate kala le bimbini ga Araba, khwatsi hi lezi Jehova Nungungulu wa ka Israeli a wulileko hi nomu wa nanza gakwe Jona nʼwana Amitai, a muprofeti loyi a nga wa hi wa le Gat-Hefera.

²⁶ Hakuva Jehova i wa wonile a mhango ya hombe nguvu ka Israeli, ni lezaku ku wa nga hi na wa ku sala, a va ntamu ni va tsongwani, ku wa nga hi na munhu wa ku hlanguta Israeli. Deut. 32:36

²⁷ Kanilezi Jehova i wa nga wulangi lezaku i ta fuvisa a vito ga ka Israeli lahasi ka tilo; i lo va tlhatlhisa hi canja ga Jeroboamu nʼwana Joaxi.

²⁸ A yinwani mitiro ya Jeroboamu ni zontlhe lezi a zi mahileko, ni wunhenha gakwe lomu yimpini, a ku tlhelisela kakwe va ka Israeli Damasku ni Hamate ga ka Juda, zi tsalilwe lomu bhukwini ga Matimu ya tihosi ta ka Israeli.

²⁹ Jeroboamu i lo etlela zinwe ni vararu wakwe, a tihosi ta ka Israeli. Zonake Zakaria a nʼwana wakwe i lo fuma xikhundleni xakwe.