2 Tihosi 12 - Tshwa Bible

Joaxi a fumela Juda.

¹ Joaxi i wa hi ntlhanu ni mambiri malembe laha a nga sangula ku fuma, hi lembe ga wuntlhanu ni mambiri ga kufuma ka Jehu; i lo fuma 40 wa malembe le Jerusalema. A vito ga nyine wakwe i wa hi Zibia wa le Berexeba.

² Joaxi i lo maha lezi zi sasekileko mahlweni ka Jehova masikwini yakwe wontihe, hakuva mupristi Jehoiada i wa mu gonzisa.

³ Hambu lezo, a matshamu ma tlakukileko a ma susiwangi; a vanhu va lo simama ku ya maha miphahlelo ni ku hisa tibani lomu matshanwini ma tlakukileko.

⁴ Joaxi i te ngalo ka vapristi: A mali yontlhe ya kubasa leyi yi nehiwako lomu ndlwini ya Jehova, yi nga mali ya munwe ni munwani loku vanhu va hlayiwa, ni mali yontlhe ya kutirulwa ka vanhu, leyi a mupristi munwe ni munwani a ta nga yi pima, ni mali yontlhe leyi a munhu ni munhu a ta nga yi neha hi kuranza ka mbilu yakwe lomu ndlwini ya Jehova; Ekso. 30:12; Levi 27:2; Deut. 16:10

⁵ a vapristi va ta teka a mali leyo, a munwe ni munwani a teka ka va ka kabye, va ta lemetela a yindlu, va lulamisa zontlhe lezi va ta nga zi kuma na zi onhekile ka yona.

⁶ Kanilezi hi lembe ga wu 23 ga kufuma ka Joaxi, a vapristi va wa nga se lemetela a tifa ta yindlu.

⁷ Zonake hosi Joaxi i lo vitana mupristi Jehoiada ni vanwani vapristi, aku kabye: Hi kuyini mu nga lulamisiko a yindlu ke? Hikwalaho mu nga ha teki a mali ya va ka nwina, kanilezi yi nyikeleni yi lulamisa a yindlu.

⁸ A vapristi va lo vumelana lezaku va nga ta ha teka a mali ya vanhu kambe, ni lezaku va nga ha ta lulamisa a yindlu.

⁹ Kanilezi mupristi Jehoiada i lo teka a nghaxa a yi bhoxa a nomu wa xikhubhunyeto xa yona, a yi veka kusuhani ni alati, hi tlhelo ga xinene loku ku engheniwa lomu ndlwini ya Jehova. A vapristi lava va hlayisako a nyangwa va wa enghenisa lomo yontlhe a mali leyi yi nga wa nehiwa ndlwini ya Jehova.

¹⁰ Laha va nga wona lezaku a mali yi tele lomu nghaxeni, a matsalani wa hosi i lo kanziha ni mupristi wa hombe, va ya hlaya a mali leyi yi nga wa kumekile lomu ndlwini ya Jehova, va yi veka zikhwameni.

¹¹ Laha na va pimile a mali leyo laha xikalwini, va lo yi nyikela mandleni ya vakhomi va ntiro, lava va rumako mitiro ya lomu ndlwini ya Jehova.

¹² Va lo hakhisa vavatli ni vaaki va yindlu, va xava ni minaneko yo aka ha yona, ni maribye ma vatlilweko, kasi ku lulamisa ha wona a tifa ta yindlu ya Jehova, ni ku hakhela yontlhe mitiro ya ku lulamisa a yindlu.

¹³ Kanilezi a va mahangi a tikopo ta siliva ni mikwana, ni zinamelo, ni mipunzu, hambu ni zibya zinwani za nzalama ni za siliva za yindlu ya Jehova, hi mali leyo yi nehilweko ndlwini ya Jehova,

¹⁴ hakuva va lo yi nyikela a vanhu lava va rangelako mitiro lezaku va lulamisa ha yona a yindlu ya Jehova.

¹⁵ Tlhatakumbiri, a vanhu lava va nga wa tsumbisile ku nyikela a mali ka lava va khomako a ntiro, va wa nga wutisiwi nchumu, hakuva vona venyi va wa maha zontlhe hi nongameto.

¹⁶ Kanilezi a mali ya miphahlelo ya milanzu, ni mali ya miphahlelo ya zionho yi wa nga nehiwi lomu ndlwini ya Jehova; yi wa hi ya vapristi. Levi 5:15; 7:7; Mitse. 5:9

¹⁷ Zonake Hazaeli a hosi ya le Siria i lo kanziha a yalwa na Gati, a teka muti lowo. Anzhako ka lezo i lo lava ku kanziha a yalwa ni Jerusalema.

¹⁸ Kanilezi Joaxi a hosi ya ka Juda i lo teka zontlhe a zibya za kubasa, lezi zi hlazekileko zi nga wa nyikelisisile hi Jehoxafate na Jehoramu na Ahazia, a vararu vakwe, lava va nga wa hi tihosi ta ka Juda, ni zinwani lezi yena a nga wa zi nyikelisisile, ni nzalama yontlhe leyi nga wa kumilwe lomu ka mabako ya yindlu ya Jehova, ni lomu ndlwini ya hosi; i lo teka zontlhe a zi rumela ka Hazaeli a hosi ya le Siria, a suka le Jerusalema.

¹⁹ A yinwani mitiro ya Joaxi ni zontlhe lezi a nga zi maha, zi tsalilwe lomu bhukwini ga Matimu ya tihosi ta ka Juda.

²⁰ A malanza yakwe ma lo mu hleva ma mu vukela, ma mu daya le ndlwini ya Milo ndleleni leyi yi yako le Sila.

²¹ A malanza lawa ma nga mu daya hi Jozakara wa Ximeate, na Jehozabada wa Xomera; va lo mu lahla zinwe ni vararu vakwe mutini wa Davida. A nʼwana wakwe Amazia i lo fuma xikhundleni xakwe.