2 Tihosi 11 - Tshwa Bible

Kudawa ka Atalia.

¹ Laha Atalia, a nyine wa Ahazia, a wona lezaku a nʼwana wakwe i file, i lo suka a hihirita vontlhe va yindlu ya wuhosi.

² Kanilezi Jehoxeba, a nhanyana wa hosi Joramu nakulobye wa Ahazia, i lo nyemukisa Joaxi nʼwana Ahazia, a mu susa xikari ka vana va hosi lava va nga wa dawetelwa, a ya mu fihla ni muwundli wakwe lomu ndlwini ya kuetlela. Va lo fihlela Atalia, hikwalaho a nga mu dayangi.

³ I lo tshama naye na a mu fihlile lomu ndlwini ya Jehova ntlhanu ni ginwe malembe, Atalia na a fumela a tiko ga ka Juda.

⁴ Hi lembe ga wu 7, Jehoiada i lo vitana a tinduna ta mazana ta vaKereti ni varinzeli, a ta enghena zinwe navo lomu ndlwini ya Jehova; i lo maha xivumelwano navo, a va hlambanyisa lomu ndlwini ya Jehova, a va kombisa a nʼwana wa hosi,

⁵ I lo va leletela, aku; Mu ta maha lezi: a xipanze xa wunharu xa nwina lava mu enghenako ntirweni wa sabado, xi tava xa ku rinzela a yindlu ya hosi.

⁶ A xinwani xipanze xa wunharu xi ta yima laha nyangweni ya Sura; a xinwani xa wunharu xi ta yima le nyangweni hi le nzhako ka varinzeli; mu ta rinzela a yindlu lezaku ku nga engheni munhu.

⁷ Kasike nwina mitlawa mimbiri ya vontlhe lava va enghenako ntirweni wa siku ga sabado, mu ta rinzela a yindlu ya Jehova kusuhi ni hosi.

⁸ Mu ta renzelekela a hosi, munwe ni munwani wa nwina na khomile matlhari yakwe; ni wihi loyi a enghenako lomu tixaxeni, i ta dawa. Mu tava ni hosi loku yi enghena ni loku yi huma.

⁹ A tinduna ta mazana ti lo maha zontlhe lezi mupristi Jehoiada a nga wa leletele zona kabye. Munwe ni munwani i lo teka a ntlawa wakwe, vontlhe lava va enghenako ntirweni wa siku ga sabado, ni lava va humako hi lomu ntirweni wa siku ga sabado, va lota ka mupristi Jehoiada.

¹⁰ A mupristi i lo nyika ka tinduna ta mazana a matlhari ni zitlhangu, lezi zi nga wa hi za hosi Davida zi nga wa hi lomu ndlwini ya Jehova.

¹¹ A varinzeli va lo yima ni matlhari yabye, kusukela tlhelweni ga xinene ga yindlu kala tlhelweni ga xibhabha, kusuhani ni alati ni yindlu, va renzelekela a hesi.

¹² Zonake i lo humesa a nʼwana wa hosi, a mu tlhateka a xidlodlo, a mu nyika bhuku ga Wukustumunyu; va lo mu maha hosi, va mu tota hi mafura, va phakatela mandla yabye, vaku: A yi hanye, a hosi! Ekso. 25:16; Deut. 17:18

¹³ Laha Atalia a ngazwa a guwa ga varangeli ni vanhu, i lota lomu ndlwini ya Jehova.

¹⁴ I lo lunguza a wona a hosi na yi yimile laha wutshanwini gi tlakukileko, khwatsi hi nayo wa kona, a tinduna ni vabi va mipunzu na va yimile hi laha hosini, a vanhu vontlhe va tiko na va tsaka, vaba mipunzu. Zonake Atalia i lo hanzula a tinguwo takwe, aba huwa, aku: Mahlevo, mahlevo!

¹⁵ Mupristi Jehoiada i lo leletela a tinduna ta yimpi, aku ka tona: Mu humeseni lomu tixaxeni; loyi a mu lanzako mu dayeni hi tlhari, hakuva mupristi i waku va nga dzuka va mu dayela lomu ndlwini ya Jehova.

¹⁶ Zinghaho va lo mu hendlela a ndlela va mu tsika a hunza, a famba hi nyangwa yo enghena mahaxi a ya chikela lomu ndlwini ya hosi, a si dawelwa kwalaho.

¹⁷ Jehoiada i lo maha xivumelwano xikari ka Jehova ni hosi ni vanhu, lezaku vona va tava vanhu va Jehova, a maha kambe xikari ka hosi ni vanhu.

¹⁸ A vanhu vontlhe va tiko va loya ndlwini ya Baali va ya yi khungumulela, va fayetela maalati yakwe, ni zifananiso zakwe, va daya Matani a mupristi wa Baali mahlweni ka maalati. Zonake a mupristi i lo yimisa a vahlayisi va yindlu ya Jehova.

¹⁹ I lo teka a tinduna ta mabutho, ni vaKereti, ni varinzeli, ni vanhu vontlhe va relelisa a hosi hi le ndlwini ya Jehova, va ya enghena lomu ndlwini ya hosi hi ndlela ya nyangwa ya varinzeli, zonake Joaxi i lo tshama xitshanwini xa wuhosi.

²⁰ Zinghaho vontlhe vanhu va lo tsaka, ni muti wu lo rula. Atalia va lo mu daya hi supado lomu ndlwini ya hosi.