2 Tihosi 10 - Tshwa Bible

¹ Makunu Ahabi i wa siyile 70 wa vafana le Samaria. Jehu i lo tsala mapapilo a ma rumela le Samaria ka vafumeli va le Jezreeli, ni ka masingalakati, ni ka vawundli va vana va Ahabi,

² aku: Hi xikhanzakanya xa lezi gi ta nga chikela papilo legi, nwina lava mu nga ni vana va hosi ya nwina, ni tikareta, ni mahaxi, ni makhokhola, ni matlhari,

³ cuwukani xikari ka vana va hosi ya nwina, mu hlawula wa nene ku hunza vontlhe, loyi a faneleko, mu mu veka xitshanwini xa raru wakwe, ni kuva mu lwela a yindlu ya hosi ya nwina.

⁴ Kanilezi vona va lo chava nguvu, vaku: Hambu tihosi timbiri a ti tiyangi mahlweni kakwe, hina hi nga zi kotisa kuyini a ku tiya mahlweni kakwe ke?

⁵ A muhlayisi wa yindlu ya hosi, ni nduna ya muti, ni masingalakati zinwe ni vawundli va vana va hosi va lo rumela mhaka ka Jehu, vaku: Hina hi malanza ya wena, hi ta maha zontlhe lezi u ta nga hi byela, kanilezi a hesi hi nga ta yi yimisa; maha lezi u zi ranzako.

⁶ I lo engeta a va tsalela a papilo ga wumbiri, aku: Loku nwina mu yima zinwe na mina, ni loku mu ingisa a gezu ga mina, tekani a tihloko ta vavanuna lava va nga vana va hosi ya nwina muta nato manziko hi xikhati xwalexi leno Jezreeli. A vana va hosi va wa hi 70, na va hi ka masingalakati ya muti lawa ma nga va wundla.

⁷ Makunu laha gi nga chikele a papilo lego ka vona, va lo teka a vana va hosi va xinuna, va va daya, 70 wabye, va khonela tihloko ta kona lomu xirunzwini va ti rumela kakwe le Jezreeli. Vala. 9:5

⁸ Ku lota a ntsumi wu ta mu tivisa ku ngalo: Va nehile tihloko ta vana va hosi. Yena aku: Ti veketeleni ti maha tinhulu timbiri laha nyangweni ya muti kala manziko ni mixo.

⁹ Ni mixo ya kona i lo huma a yima laho, aku ka vanhu vontlhe: Nwina mu lulamile! Hi mina nzi nga maha xikungo xa ku vukela a hosi ya mina, nzi mu daya. Kanilezi himani a nga daya vontlhe lava ke?

¹⁰ Pimani makunu lezaku cima ku hava ni ginwe gezu ga Jehova legi a nga gi wula xungetano hi yindlu ya Ahabi gi ta nga tsanzeka; ma wona, Jehova i mahile khwatsi hi lezi a nga wula hi nanza gakwe Elija.

¹¹ Zinghaho Jehu i lo daya vontlhe lava va nga wa sele va yindlu ya Ahabi le Jezreeli, ni madota yakwe wontihe, ni vamakabye vakwe vontlhe, ni vapristi vakwe vontlhe, ku nga sali ni munwe laho.

¹² I lo andlamuka aya le Samaria. Na a ha hi ndleleni, laha a nga chikela laha ndlwini leyi a varisi va tsombanako kona,

¹³ Jehu i lo tlhangana ni vanakulobye va Ahazia a hosi ya ka Juda, aku kabye: Hi nwina vamani? Vona va hlamula, vaku: Hi vanakulobye va Ahazia; hi relela a ku ya losetela a vana va hosi ni vana va muzinza.

¹⁴ Yena aku: Va khomeni na va ha hanya! Va lo va khoma va va daya laha kusuhani ni hlowo ya yindlu ya wukayelo; va wa hi 42 wa vavanuna, a ku na nga sala ni munwe.

¹⁵ A xikhati a nga suka hi laho, i lo tlhangana na Jehonadaba nʼwana Rekaba loyi a nga wata ku mu khinga. I lo mu losa aku kakwe: A mbilu ya wena ya xalala ha mina khwatsi hi mbilu ya mina yi xalalako ha wena ke? Jehonadaba i lo hlamula, aku: Ina, ya xalala! Jehu aku: Loku yi xalala, a hi khomane mandla! Va lo khomana mandla, zonake Jehu i lo mu kanzihisa kareteni yakwe. Jer. 35:6

¹⁶ Aku ngalo kakwe: A hi fambe hontlhe u ya wona lezi nzi pangamisako zona ka Jehova. Zinghaho i lo mu khileta kareteni yakwe.

¹⁷ Loku va chikele le Samaria, i lo daya vontlhe lava va nga wa sele va ka Ahabi, a va lovisa vontlhe khwatsi hi kuwula ka Jehova ka Elija.

¹⁸ Jehu i lo tsombanyisa a vanhu vontlhe, aku kabye: Ahabi i lo khozela Baali kutsongwani, kanilezi Jehu i ta mu khozela nguvu.

¹⁹ Hikwalaho nzi viteleni vontlhe vaprofeti va Baali, ni malanza yakwe wontihe, vata laha ni vapristi vakwe vontlhe, ku nga sali ni munwe; hakuva nzi lava ku maha muphahlelo wa hombe ka Baali. Loyi a vumalekako a nga ta hanya. Kanilezi lawo ma wa hi mano ya Jehu yo lava ku lovisa vontlhe vakhozeli va Baali.

²⁰ Jehu i te ngalo: Rambani a tlhangano wa hombe wo basa wa Baali. Va lo wu ramba.

²¹ Jehu i lo rumela a hungu lomu tikweni gontlhe ga ka Israeli, ga ku vitanisa vakhozeli va Baali; va lota, ku nga sali hambu ni munwe, va ta enghena lomu ndlwini ya Baali, yi tala nguvu.

²² Jehu i te ngalo ka muhlayisi wa yindlu ya tinguwo: Nyika tinguwo ka vakhozeli va Baali. I lo va nyika tinguwo leto.

²³ Jehu i lo enghena lomu ndlwini ya Baali na Jehonadaba nʼwana Rekaba, aku ka malanza ya Baali: Langutisisani khwatsi, ku nga dzuki kuva kona lomu lava va nga malanza ya Jehova; ku laveka ntsena lava va khozelako Baali.

²⁴ Va lo enghena a ku ya nyikela a miphahlelo ya kuhiswa; Jehu i wa yimisile a 80 wa vavanuna hi lahandle ka yindlu. I te kabye: Loyi a ta nga tsika a munwe wa lava nzi va nyikelako mandleni ya nwina a tsutsuma, a wutomi gakwe gi ta rihela ga munhu loye.

²⁵ Laha na va mbhetile ku nyikela muphahlelo wa kuhiswa, Jehu i te ngalo ka tinhenha ni ka tinduna: Enghenani mu va daya vontlhe! Ku nga poni ni munwe! A tinduna ni tinhenha ti lo va daya ti va hoxa lahandle, va suka vaya mutini wa yindlu ya Baali.

²⁶ Va lo humesela zifananiso lomu ndlwini ya Baali va zi hisa.

²⁷ Va lo khungumula a xifananiso xa Baali, va khungumula a yindlu ya Baali va maha a tala ha yona kala nyamutlha.

²⁸ Jehu i lo lovisisa lezo Baali xikari ka va ka Israeli.

²⁹ Hambu lezo, Jehu a nga tsikangi a zionho za Jeroboamu nʼwana Nebate, lezi a nga onhisa ha zona va ka Israeli, ma nga marole ya nzalama ma nga wa hi le Beteli ni le Dani.

³⁰ Jehova i te ngalo ka Jehu: Kota lezi u mahileko khwatsi mahlweni ka mina, ni kuva u mahile zontlhe zi nga mixuvo ya mina ka yindlu ya ka Ahabi, a vana va wena va ta tshama xitshanwini xa wuhosi ga ka Israeli, kala xizukulwana xa wumune.

³¹ Kanilezi Jehu a nga khatalelangi ku famba hi milayo ya Jehova Nungungulu wa ka Israeli. A nga tsikangi a zionho za Jeroboamu lezi a nga onhisa ha zona va ka Israeli.

³² Masikwini walawo Jehova i lo sangula ku hungula a tiko ga ka Israeli; Hazaeli i lo va hlasela lomu mimbhinganweni yabye yontlhe;

³³ kusukela Jordani hi le Mutsuwuka-gambo, tiko gontlhe ga le Gileade, va ka Gadi, ni va ka Rubeni, ni va ka Manasa, kusukela le Aroera legi gi nga le Congweni wa Amoni, na Gileade na Baxani.

³⁴ A zinwani lezi Jehu a zi mahileko, a mitiro ya ntamu, zi tsalilwe lomu bhukwini ga Matimu ya tihosi ta ka Israeli.

³⁵ Jehu i lo etlela zinwe ni vararu vakwe, va mu lahla lomu Samaria. Zonake Jehoahaza nʼwana wakwe i lo fuma xikhundleni xakwe.

³⁶ Jehu i lo fumela va ka Israeli le Samaria 28 wa malembe.