2 Tihosi 1 - Tshwa Bible

A kula ka Ahazia.

¹ Makunu laha Ahabi a nga file, a vaMoabi va lo hluwuka va vukela va ka Israeli.

² Ahazia i lowa hi laha njhaneleni ya yindlu yakwe le xitezi, leyi yi nga wa hi le Samaria; i lo babya. Zonake i lo rumela a mitsumi aku ka yona: Fambani mu ya wutisa ka Baali-Zebuba, a nungungulu wa va le Ekroni, kasi nza fela ku tiva lezaku xana nzi ta hanya ka wubabyi legi.

³ Kanilezi a ngelosi ya Jehova yi te ngalo ka Elija a muTixebeti: Suka u ya tlhangana ni mitsumi ya hosi ya le Samaria, uku ka yona: Hi lezaku a ku na Nungungulu lomu tikweni ga ka Israeli, lezi u yako ku ya wutisa ka Baali-Zebuba, a nungungulu wa le Ekroni ke?

⁴ Hikwalaho Jehova i ngalo: Cima u nga ta vuka ka legi sango u etleleko ka gona, u tafa hakunene. Zonake Elija i lo suka.

⁵ A mitsumi yi lo tlhela yiya ka Ahazia. Yena i te ngalo ka yona: Hi kuyini mu tlhelako mu wuya ke?

⁶ Vona va te ngalo kakwe: Ku lota munhu a ta tlhangana na hina, aku: Tlhelani mu famba ka hosi ya nwina leyi yi mu rumileko, mu yaku ka yona: Jehova i ngalo: Xana lomu tikweni ga ka Israeli ko va hava Nungungulu, lezi u rumako ku ya wutisa ka Baali-Zebuba a nungungulu wa le Ekroni ke? Hikwalaho cima u nga ta vuka ka legi sango u etleleko ka gona, u tafa.

⁷ Ahazia i te ngalo kabye: A munhu loyi mu nga tlhangana naye a mu byela timhaka leto, ngwa kuyini ke?

⁸ Vona va te ngalo kakwe: Munhu a ambeleko a kumba wa woya na bohile a bhandi ga bhebhe xiwunwini xakwe. Yena i te ngalo: Hi Elija a muTixebeti. Zak. 13:4; Mat. 3:4

⁹ Zonake a hosi yi lo rumela a nduna ka Elija, na yi hi ni 50 wa vanhu. Yi lo kanziha yiya kakwe yi ya mu kuma na a tshamile le hehla ka xitsunga; zonake yiku kakwe: Munhu wa Nungungulu, a hosi yi ngalo: Relela uta!

¹⁰ Elija i lo hlamula aku ka nduna: Loku nzi hi munhu wa Nungungulu, ngha a nzilo wu relela hi le tilweni wu ta ku hisa ni vanhu va wena va ntlhanu wa makume. A nzilo wu lo relela hi le tilweni wu ta mu hisa zinwe ni vanhu vakwe va ntlhanu wa makume. Lu. 9:54

¹¹ Ahazia i lo engeta kambe a rumela yinwani nduna na yi hi ni 50 wa vanhu; yonawu yi lo ya wula ka Elija, yiku: Munhu wa Nungungulu, a hosi yi ngalo: Hatlisa u relela!

¹² Elija i lo hlamula aku kabye: Loku nzi hi munhu wa Nungungulu, ngha a nzilo wu relela hi le tilweni wu ta ku hisa ni vanhu va wena va ntlhanu wa makume. A nzilo wa Jehova wu lota hi le tilweni, wu ta mu hisa zinwe ni vanhu vakwe va ntlhanu wa makume.

¹³ Ahazia i lo engeta a rumela a nduna ya wunharu zinwe ni 50 wa vanhu. Ni nduna ya wunharu laha yi nga wa kanzihile yi lo ta chikela yi khizama hi madzolo ya yona mahlweni ka Elija, yi mu khongotela, yiku: Munhu wa Nungungulu, ponisa wutomi ga mina ni ga vanhu lava va ntlhanu wa makume, a malanza ya wena!

¹⁴ Languta, ku humile a nzilo hi le tilweni wu ta hisa a tinduna to ranga ta timbiri zinwe ni mitlawa ya tona ya 50 wa vanhu kada nduna. Kanilezi makunu ponisa wutomi ga mina!

¹⁵ Zonake a ngelosi ya Jehova yi te ngalo ka Elija: Relela u famba naye, u nga mu chavi! Elija i lo suka a relela naye vaya le hosini.

¹⁶ Zonake Elija i te ngalo ka yona: Jehova i ngalo: U kala u ruma mitsumi yi ya wutisa ka Baali-Zebuba a nungungulu wa le Ekroni, kasi lomu tikweni ga ka Israeli a ku na Nungungulu wa kuva u wutisa hi vito gakwe ke? Hikwalaho cima u nga ta vuka ka legi sango u etleleko ka gona, u tafa.

¹⁷ Ahazia i lofa khwatsi hi kuwula ka Jehova hi nomu wa Elija; zonake Jehoramu i lo fuma xikhundleni xakwe hi lembe ga wumbiri na Jehoramu nʼwana Jehoxafate a hosi ya ka Juda, hakuva yena i wa nga hi na nʼwana wa mufana.

¹⁸ A yinwani mitiro ya Ahazia leyi a yi mahileko yi tsalilwe lomu bhukwini ga Matimu ya tihosi ta ka Israeli.