2 Samueli 6 - Tshwa Bible

Kuyisiwa ka Arke le Jerusalema.

¹ Davida i lo engeta kambe a tsombanyisa tontlhe tinhenha ta ka Israeli, ti wa hi 30,000 wa vavanuna.

² Zonake Davida i lo suka zinwe ni vontlhe vanhu lava a nga hi navo, kusukela le Baali-Juda, va neha a arke ga Nungungulu legi gi vitwako hi vito ga Jehova wa tiyimpi, loyi a tshamako hehla ka makerubima. Ekso. 25:17; Jox. 15:9, 60

³ Va lo khonela a arke ga Nungungulu lomu kareteni ya yiswa, va gi humesa lomu ndlwini ya Abinadaba, leyi yi nga hi le xitsungeni; Uza na Ahio, a vana va Abinadaba, va lo fambisa a kareta leyo ya yiswa.

⁴ Va lo yi humesa lomu ndlwini ya Abinadaba leyi yi nga hi le xitsungeni zinwe ni arke ga Nungungulu, na Ahio i lo rangela mahlweni ka arke.

⁵ Davida ni yindlu yontlhe ya ka Israeli va wo yimbelela mahlweni ka Jehova hi tontlhe tixaka ta timbila ti mahiwako hi sinya ya fira, ni zitende, ni magubhu, ni tingomana, ni tinanga, ni zikoriyo.

⁶ Makunu laha va nga chikela nzhimbyeni wa Nakoni wa ku hulela kona, Uza i lo nawuluta a canja gakwe a khoma a arke ga Nungungulu, hakuva a tihomu ti wa lava kuwa.

⁷ Zonake a zanga ya Jehova yi lo vindlukela Uza, Nungungulu a muba kwalaho, hi kota ya matloti yakwe; hikwalaho i lofa laha kusuhani ni arke ga Nungungulu. Mitse. 4:15, 20

⁸ Davida i lozwa kubayiseka hi kota ya lezi Jehova a deleko Uza; hikwalaho i lo chula wutshamu lego ku Perezi-Uza kala legi siku.

⁹ A siku lego Davida i lo chava Jehova, aku: Makunu a arke ga Jehova gi ta tisa kuyini lomu ndlwini ya mina?

¹⁰ Hikwalaho Davida a nga ha zi kotangi ku yisa a arke ga Jehova lomu ndlwini yakwe, le mutini wa Davida. Kanilezi i lo gi yisa lomu ndlwini ya Obedi-Edome, a muGati.

¹¹ A arke ga Jehova gi lo tshama tihweti tinharu lomu ndlwini ya Obedi-Edome, a muGati, zonake Jehova i lo katekisa Obedi-Edomi ni yindlu yakwe yontlhe.

¹² Makunu va lo byela hosi Davida, vaku: Jehova i katekisile a yindlu ya Obedi-Edome ni zontlhe zilo zakwe hi kota ya arke ga Nungungulu. Zonake Davida i lo ya teka a arke ga Nungungulu lomu ndlwini ya Obedi-Edomi a gi heleketa mutini wa Davida hi litsako.

¹³ Loku lava va rweleko a arke ga Jehova va fambile ntlhanu ni ginwe makanzihelo i wo phahlela hi nkuzi ni role gi nonileko. 1 Tih. 8:5

¹⁴ Zonake Davida a kina hi ntamu wakwe wontihe mahlweni ka Jehova, na ambele a efode ya wukene.

¹⁵ Zinghaho Davida zinwe ni yindlu yontlhe ya ka Israeli, va lo neha a arke ga Jehova hi kukanyuluka ni guwa ga mipunzu.

¹⁶ Makunu laha a arke ga Jehova gi nga enghena lomu mutini wa Davida, Mikali wa Saule i lo cuwuka hi laha njhaneleni, a wona hosi Davida na a kari a ti nhenga a kina mahlweni ka Jehova, zonake i lo mu monya hi lomu mbilwini yakwe.

¹⁷ Va lo enghenisa arke ga Jehova lomu ka tenda legi Davida a nga wa gwimbela gona. Zonake Davida i lo nyikela munyikelo wa kuhiswa ni miphahlelo ya kurula mahlweni ka Jehova.

¹⁸ Makunu laha va nga wa gumesile ku nyikela minyikelo ya kuhiswa ni miphahlelo ya kurula, Davida i lo katekisa vanhu hi vito ga Jehova wa tiyimpi.

¹⁹ Zonake i lo avela zakuga ka vontlhe vanhu va ka Israeli, vavasati ni vavanuna; a nyika ka munwe ni munwani a xibaba xinwe ni xitluwu xa nyama, ni xikhekhetselo xa tisote ta mauva. Zonake vontlhe vanhu va phalaleka, loyi ni loyi a ti yela ndlwini yakwe.

²⁰ Zonake Davida i lo tlhelawu a ya katekisa a ngango wakwe. Mikali wa Saule i lo huma a mu khinga, aku; Mbudzunzo muni yi ti dzunzileko ha gona a hosi ya ka Israeli nyamutlha! Ko kala a funungula wutsumbu gakwe mahlweni ka zitiri za xisati za malanza yakwe khwatsi munhu a nga hiko na kupima.

²¹ Davida i te ngalo ka Mikali; Mina nzi wa kina mahlweni ka Jehova loyi a nzi hlawulileko wutshanwini ga raru wa wena ni yontlhe yindlu yakwe, a nzi yimisa a ku rangela a vanhu va Jehova, va nga va ka Israeli.

²² Nza ha ta ti koramisa nguvu nzi ti tsongahata kuwoneni ka mina nwinyi. Kanilezi mahlweni ka malanza ya xisati lawa u ma wulako, mina nzi ta dzunziwa.

²³ Mikali wa Saule i lo kala afa na nga belekangi nʼwana.