2 Samueli 5 - Tshwa Bible

Davida a fumela vontlhe va ka Israeli.

¹ A tixaka tontlhe ta ka Israeli ti lota ka Davida le Hebroni, ti taku: Hina hi marambu ya wena ni nyama ya wena.

² Hambu xikhatini xa kale, na Saule a ha fuma, hi wena u nga wa humesa ni ku wuyisa lomu ka Israeli. Jehova i te ngalo ka wena: Hi wena u ta nga risa a vanhu va mina va ka Israeli, uva hosi lomu ka va ka Israeli.

³ Zinghaho wontihe masingalakati ya va ka Israeli ma loya hosini le Hebroni, zonake hosi Davida i lo maha navo xivumelwano le Hebroni mahlweni ka Jehova; va lo wumbela Davida a kuva hosi hehla ka va ka Israeli.

⁴ Davida i wa hi ni 30 wa malembe laha a nga sangula ku fuma, hilezo i lo fuma 40 wa malembe.

⁵ Le Hebroni i lo fumela Juda 7 wa malembe ni 6 wa tihweti. Le Jerusalema i lo fumela va ka Israeli vontlhe ni va ka Juda 33 wa malembe.

⁶ A hosi yi loya ni vanhu va yona Jerusalema va yalwa ni vajebusi, a vaaki va tiko. Kanilezi vona va te ngalo ka Davida: Cima u nga ta zi kota ku enghena lomu, hakuva hambu zikhumu ni zilema zi ta ku hlongola. Lezo va wa alakanya lezaku Davida a nga ta enghena tikweni lego. Jox. 15:63; Vala. 1:21

⁷ Kanilezi Davida i lo hlula, a teka a khokhola ga Zioni, wu nga wona muti wa Davida.

⁸ A siku lego Davida i te ngalo: Kani hi mani a ta nga hlalela vajebusi kala a chikela le zibukeni za mati, a hlasele zilema ni zikhumu lezi zi vengiwako hi Davida! Hikwalaho ku nga huma a vingu gaku: A zikhumu ni zilema cima zi nga ta enghena lomu ndlwini.

⁹ Davida i lo aka lomo khokholeni, a gi chula ku ngalo i muti wa Davida. I lo aka ka wontihe matlhelo kusukela Milo kala lomu nzeni ka gona.

¹⁰ Davida i lo enzeleka a kula, na Jehova Nungungulu wa tiyimpi a hi zinwe naye.

¹¹ Zonake Hiramu a hosi ya le Tire i lo rumela mitsumi ka Davida zinwe ni tisinya ta sedare, ni vavatli ni vaaki a ku ta aka a yindlu ya Davida.

¹² Davida i lo zi pima lezaku Jehova i mu yimisile a kuva hosi ya ka Israeli, i tlakusile mufumo wakwe hi kota ya vanhu vakwe va ka Israeli.

¹³ Makunu laha Davida a nga: wa tile le Jerusalema, na a suka hi Hebroni, i lo engeta kambe a teka mindlukulu ni vasati, a engeta a pswalelwa vafana ni vanhanyana.

¹⁴ Lawa hi mavito ya lava a nga pswalelwa le Jerusalema: Xammua, na Xobaba, na Natani, na Solomoni;

¹⁵ na Ibhara, na Elixua, na Nefega, na Jafia;

¹⁶ na Elixama, na Eliada, na Elifelete.

¹⁷ Makunu a vaFilistia va lozwa lezaku Davida i totilwe kuva hosi ya ka Israeli, zonake vontlhe vaFilistia va lo kanziha a ku ya hlota Davida. Davida i lo zizwa, a relela aya khokholeni.

¹⁸ A vaFilistia va lo ta mbambamela le koveni wa le Refaime.

¹⁹ Zonake Davida i lo wutisa ka Jehova, aku: Nzi kanziha nzi yalwa ni vaFilistia ke? U ta va nyikela mandleni ya mina ke? Jehova i lo hlamula, aku: Kanziha uya, hakuva hakunene nzi ta nyikela vaFilistia mandleni ya wena.

²⁰ Davida i lota le Baali-perazimu. I lo va hlasela leyo, aku ngalo: Jehova i hangalasile valala va mina ku fanana ni mati loku ma phuxuka ma hangalaka. Hikwalaho i lo chula wutshamu lego aku Baali-perazimu. Isa. 28:21

²¹ Vona va lo siya ni zifananiso zabye, zonake Davida ni vanhu vakwe va lo zi teka.

²² A vaFilistia va lo engeta kambe vata, va ta mbambamela le koveni wa le Refaime.

²³ Loku a wutisile kambe ka Jehova, Jehova i te: U nga kanzihi; kanilezi renzeleka hi lenzhako kabye, u ta ya tlhangana navo le tisinyeni ta timora.

²⁴ Makunu laha u ta ngazwa a guwa ga kufamba le hehla ka tisinya ta timora, u ta huma hi ntamu, hakuva xikhatini xwalexo Jehova i mu rangele mahlweni ku ya hlasela tiyimpi ta vaFilistia.

²⁵ Davida i lo maha khwatsi hi lezi Jehova a mu leleteleko, zonake va lo hlasela vaFilistia kusukela le Geba kala le Gezera.