2 Samueli 4 - Tshwa Bible

A kufa ka Ixboxete.

¹ Makunu laha a nʼwana Saule a nga zwile lezaku Abneri i file le Hebroni, a mandla yakwe ma lo mbhela ntamu, ni vontlhe va ka Israeli va lo karateka nguvu.

² Nʼwana Saule i wa hi ni tinduna timbiri, a yinwe ya kona ku wa hi Baana, a yinwani ku wa hi Rekabe, a vana va Rimmoni a muBeerote wa vanana va ka Benjamini; hakuva a muti wa ka Beerote kambe wu wa hlayelwa ka ka Benjamini.

³ Zonake a va ka Beerote va lo chavela le Gittaime, laho va akileko kona kala nyamutlha lezi. Neh. 11:33

⁴ Makunu Jonatani nʼwana Saule i wa hi ni mufana a nga lamele milenge. Yena i wa hi ni ntlhanu wa malembe a xikhati lexo ku nga chikela a mahungu ya Saule na Jonatani, na mata hi le Jezreeli; a muwundli wakwe i lo mu teka a tsutsuma naye. Makunu laha va nga wa hatlisisa ku tsutsuma, a nwanana i lowa, a si lamata. Ni vito gakwe i wa hi Mefiboxete.

⁵ A vanana va Rimmoni a muBeerote, Rekabe na Baana, va lo ya enghena lomu ndlwini ya Ixboxete xikhatini lexi a mumu wu hisako, yena na a etlele a humuta.

⁶ Va lo enghena lomu xikari ka yindlu va ku khwatsi vo nusa mavele, kwalaho va si mu tlhava rumbu. Zonake Rekabe na Baana va lo pfowola.

⁷ Laha va nga enghena lomu ndlwini, va lo mu kuma na a ti nawule laha mubhedini wakwe, va si mu gwaza afa, va mu tsema nhamu va teka hloko yakwe va famba nayo wusiku gontlhe hi ndlela ya le Araba.

⁸ Va lo neha a hloko ya Ixboxete ka Davida le Hebroni, va taku ka hosi: Languta a hloko ya Ixboxete nʼwana Saule, a nala wa wena loyi a nga wa hlota wutomi ga wena. Inyamutlha Jehova i photele a hosi ya hina ka Saule ni pswalo wakwe!

⁹ Davida i lo hlamula Rekabe ni nakulobye Baana, a vana va Rimmoni a muBeerote, aku: Nzi hlambanya ha Jehova a hanyako, loyi a tlhatlhisileko muhefemulo wa mina makhombyeni wontihe,

¹⁰ laha a munhu wo kari a nga taku ka mina: Languta Saule i file, a ti maha ntsumi wa mahungu ma nene mahlweni ka mina, nzi lo mu khoma nzi mu daya le Ziklagi, nzi mu chachazela a mahungu yakwe.

¹¹ Ku ta kuyini loku a vakubiha va dele a munhu a lulamileko lomu ndlwini yakwe laha mubhedini wakwe, nzi nga ta lava a nkhata wakwe mandleni ya nwina, nzi mu lovisa laha misaveni ke?

¹² Davida i lo ruma majaha yakwe a kuva va va daya, va va tsema mawoko ni milenge, va ya va hayeka mbhirini ya tiva ga le Hebroni. Kanilezi a hloko ya Ixboxete va lo yi teka va ya yi lahla xilahleni xa Abneri le Hebroni.