2 Samueli 23 - Tshwa Bible

A timhaka to gumesa ta Davida.

¹ Leti hi timhaka to gumesa ta Davida: A gezu ga Davida nʼwana Jese, I gezu ga munhu a tlakusilweko. Ga a totilweko wa Nungungulu wa Jakobe, Ga muyimbeleli a ranzekako wa ka Israeli.

² A Moya wa Jehova wu wulawulile ha mina, A mhaka yakwe yi lomu lirimini la mina. Mat. 22:43; 2 Ped. 1:21

³ Nungungulu wa ka Israeli i wulile, A Ribye ga ka Israeli gi te ngalo ka mina: Loyi a fumelako vanhu hi kululama, A mufumeli loyi a chavako Nungungulu,

⁴ I fanana ni wuronga loku gambo gi tsuwuka, Ni mixo leyi yi nga hiko na marefu; A kuwoninga ka gona anzhako ka kuna ka vula, Ku milisa a byanyi ga misava. Vala. 5:31

⁵ Xana a yi lezo a yindlu ya mina mahlweni ka Nungungulu ke? Hakuva i mahile xivumelwano xa pinzukelwa na mina, Lexi xi longiselweko khwatsi, xi tiyiswa. Wa kulisa a kuhanyiswa ka mina kontlhe ni kutsaka ka mina kontlhe.

⁶ Kanilezi a vakubiha va ta fanana ni mizwa yi hoxiwako, Leyi yi nga khomiwiko hi mandla;

⁷ Loyi a yi khumbako i fanele kuva ni xiketse kutani mbingo wa tlhari, Zonake yi hisiwa hi nzilo kwalaho.

A tinhenha ta Davida.

⁸ Lawa hi mavito ya tinhenha ta Davida: Joxeb-Baxebete a muTakemoni, a nduna ya tinhenha; ywaloye i wa hi Adino a muEzne a nga vukela 800 wa vavanuna, a va daya hi xikhati xinwe.

⁹ Anzhako kakwe ku wa hi Eleazari nʼwana Dodai a nʼwana wa muAhohe, a munwe wa tinhenha leti ti nga wa hi na Davida laha va nga khozisa a vaFilistia lava va nga wa tshombene a kulwa, ni va ka Israeli va tlhelele nzhako.

¹⁰ I lo suka a hlasela a vaFilistia kala a canja gakwe gi karala gi namarela laha ka supado; Jehova i lo va mahela kuhlula ka hombe lego siku. Ni nzhako ka Eleazari a vanhu va lo wuyela ntsena ku ta phanga.

¹¹ Anzhako kakwe ku wa hi Xama nʼwana Age a muHarare. A vaFilistia va wa tsombene va maha butho laho ku nga wa hi ni simu ga tinyawa, ni vanhu va wa panzanyekile va chava vaFilistia.

¹² Kanilezi yena i lo yima xikari ka simu a gi lwela, a hlasela vaFilistia. Na Jehova i lo tira a kuhlula ka hombe.

¹³ A tinduna tinharu ta tinhenha leti ta 30, ti lo chikela ka Davida hi xikhatini xa kuhula le muhumeni wa le Adullama, na yimpi ya vaFilistia yi govile le koveni wa le Refaime.

¹⁴ Ka lexo xikhati Davida i wa hi le khokholeni, ni butho ga vaFilistia gi wa rinzele le Betlehema.

¹⁵ Davida i lo navela, aku: Himani a ta nga nzi nyika a mati ya hlowo leyi yi nga le nyangweni ya Betlehema nzinwa ke?

¹⁶ Zonake a tinhenha tinharu ti lo tsemakanya hi laha xikari ka mabutho ya maFilistia ti yakha mati le hlobyeni ya le Betlehema, yi nga hi laha nyangweni ya muti, ti ma neha ka Davida.

¹⁷ Kanilezi i lo ta ala kunwa, a ma chulula mahlweni ka Jehova, aku: O Jehova, a zive kule na mina a kuva nzi maha zo kota lezi! Ina nzi nganwa a nkhata wa vavanuna lava va nyikeleko wutomi gabye ke? Hikwalaho yena a nga nwangi. Lezo zi lo mahiwa hi tinhenha tinharu.

¹⁸ Abixai a nakulobye wa Joabe nʼwana Zeruia, i wa hi wa hombe ka lava vanharu. I lo tlakusa a tlhari gakwe alwa ni 300 wa vavanuna a va daya; zonake i lova ni vito ga hombe xikari ka lava vanharu.

¹⁹ I lo dzunziwa xikari ka lava vanharu, a maha nduna yabye, kanilezi i wa nga ecani ni lava vanharu vo sangula.

²⁰ Na Benaia nʼwana wa Jehoida nʼwana wa nhenha ya le Kabzeeli, loyi a nga wa hi munhu wa hombe hi mitiro yakwe; i lo daya a vana vanharu va Arieli le Moabi. I lo relela kambe a ya daya a nghala lomu xikari ka rinzi, ku wa hi siku ga xirami xa hombe.

²¹ I lo daya ni muGipite, a lirorombola la wanuna. Hambu lezi a muGipite a nga hi ni tlhari canjeni gakwe, yena i loya kakwe na a hi ni nhonga basi, a ya wutla a tlhari canjeni gakwe a mu daya ha gona yena nwinyi.

²² Lezi hi lezi Benaia nʼwana Jehoiada a zi mahileko: i wa hi ni vito xikari ka tinhenha leti tinharu.

²³ I lo zwala wudumo ku hunza lava va 30, kanilezi a nga ecanangi ni lava vo sangula va vanharu. Davida i lo mu yimisa a kuva nduna ya hubye gakwe.

²⁴ Asaheli a nakulobye wa Joabe i wa hi munwe wa lava va 30 na Elhanana nʼwana Dodo wa le Betlehema.

²⁵ Xama a muHarode, Elika a muHarode;

²⁶ Helezi a muPalte, Ira nʼwana Ikexa a muTekoa;

²⁷ Abiezera a muAnatoti; Mebunnai a muHuxate,

²⁸ Zalmoni a muAhohe; Maharai a muNetofate;

²⁹ Heleba nʼwana Baana a muNetofate; Ittai nʼwana Ribai, a munhu wa le Gibea, wa vana va ka Benjamini;

³⁰ Benaia a muPiratoni; Hiddai wa le zicongwaneni za le Gaaxa;

³¹ Abi-Alboni a muArbate; Azmavete a muBarkume;

³² Eliaba a muXaalboni, Bene-Jaxeni, Jonatani;

³³ Xama a muHarare; Ahiama nʼwana Xarare a muArare;

³⁴ Elifeleti nʼwana Ahasibai wa Maakete; Eliama nʼwana Ahitofeli a muGiloni;

³⁵ Hezro a muKarmeli; Paarai a muArbite;

³⁶ Igali nʼwana Natani wa le Zoba; Bani a muGadi;.

³⁷ Zeleke a muAmoni, na Naharai a muBeerote a muweleli wa matlhari ya Joabe wa Zeruia.

³⁸ Ira a muItri; Garebe a muItri;

³⁹ Uria a muHiti. Va wa hi 37 wa vavanuna ku patsa vontlhe.