2 Samueli 20 - Tshwa Bible

Xeba a vukela Davida.

¹ Makunu ku lo humelela a nyamijiri wa wanuna, a vito a nga hi Xeba nʼwana Bikiri a muBenjamini. I loba mpunzu, aku: Hina a hi na xiavelo ka Davida, ge hambu tshomba ka nʼwana wa Jese! Va ka Israeli, munwe ni munwani wa nwina a fambe tendeni gakwe!

² Zonake a vavanuna va ka Israeli va lo hambana na Davida va lanzela Xeba nʼwana Bikiri; kanilezi a vavanuna va ka Juda va lo namarela ka hosi yabye, kusukela le Jordani kala le Jerusalema.

³ Davida i loya le ndlwini yakwe le Jerusalema. Zonake a hosi yi lo teka a khume ga mindlukulu leyi a nga yi siyile yi hlayisa a yindlu, yi lo va valela lomu ndlwini lomu va nga hlayiswa kona, yi va phamela zakuga, kanilezi a yi enghenangi ka vona. Va wa valelwe kala a siku ga kufa kabye, va lo hanya ku fana ni lava va felweko.

⁴ Zonake a hosi yi te ngalo ka Amasa: Nzi tsombanyisela a vavanuna va ka Juda hi masiku manharu, wenawu uta laha.

⁵ Amasa i lo ya tsombanyisa a vavanuna va ka Juda, kanilezi i lo hlwela, gi hunza a siku legi a yimisilweko.

⁶ Davida i te ngalo ka Abixai: Makunu Xeba nʼwana Bikiri i ta hi xanisa ku hunza Absalome! Hikwalaho teka malanza ya hosi ya wena mu mu hlongola, a nga kala a kuma a miti ya makhokhola a pona a mahlweni ka hina.

⁷ Zonake a vavanuna va Joabe va lo mu lanza, zinwe ni maKereti, ni maPeleti, ni tontlhe tinhenha; va lo huma lomu Jerusalema a ku ya hlongola Xeba nʼwana Bikiri.

⁸ Na va hi laha kusuhani ni ribye ga hombe gi nga hi le Gibeoni, Amasa i lo ta chikela mahlweni kabye; Joabe i wa ambele a nguwo ya kulwa, hehla ka yona na ku bohilwe a supado hi lomu xiwunwini xakwe, na yi hi lomu kocelweni wa yona; laha a nga wa famba yona yi lowa lahasi.

⁹ Zonake Joabe i te ngalo ka Amasa: Makweru, wa hanya ke? Joabe i lo khoma xilevu xa Amasa hi canja ga xibhabha a kuva a mu pswopswa.

¹⁰ Kanilezi Amasa a nga xiyisisangi a supado leyi yi nga hi lomu canjeni ga Joabe; zonake Joabe i lo tlhava rumbu ha yona, ma su kubuka lahasi marumbu yakwe. A nga ha engetangi a mu tlhava ga wumbiri; zalezo Amasa i lofa. Zonake Joabe ni nakulobye Abixai va lo hlongolisa Xeba nʼwana Bikiri.

¹¹ A ginwe ga majaha ya Joabe i lo yima laha kusuhani na Amasa, aku: Loyi a xalaliswako ha Joabe ni loyi a yimelako Davida, a lanzele Joabe!

¹² Amasa i lo phorongelana ni nkhata wakwe laha ndleleni leyi a nga wele ka yona. Laha a munhu loyi a nga wona lezaku vontlhe vanhu vata va yima laho, i lo susa Amasa laha ndleleni a mu yisa lomu khwatini, a ya mu fenengela hi nguwo; i lo maha lezo laha a nga wona lezaku vontlhe lava va chikelako laho vo ta yima.

¹³ Laha a nga wa susilwe laha ndleleni vontlhe va lo hunza va lanzela Joabe va hlongola Xeba nʼwana Bikiri.

¹⁴ Xeba i lo tsemakanya tontlhe tixaka ta ka Israeli a ya chikela le Abela-Bete-Maaka, ni vontlhe vaBera va lo tsombana va mu lanza.

¹⁵ Zonake a vanhu va Joabe va lo mu ranzela le mutini wa Abela-Bete-Maaka, va maha xitsuletsule xi khegela laha khurisini ga muti; vontlhe lava va nga hi na Joabe va lolwa ni ku khungumula a khurisi.

¹⁶ Zonake a wasati wo tlhariha i lo vitana na hi le mutini, aku; Zwanani, zwanani! Byelani Joabe muku: Tshinela hi laha kusuhani nzi ta wulawula na wena.

¹⁷ Laha a nga tshinela ka yena, a wasati i te ngalo: Hi wena Joabe? Yena aku: Hi mina. Aku kakwe: Ingisa a timhaka ta nanza ga wena! Yena aku: Nza ingisa.

¹⁸ Yena aku: A kale ka matiko va wa tolovele ku wula lezaku: Wutisani wusungukati ka Abela, va hetisa mhaka kwalaho.

¹⁹ Hi lava va rurileko ni vo tsumbeka ka va ka Israeli, wena u lava ku lovisa a muti lowu wu nga mamani wa mune ka vaIsraeli. Hi yini u lavako ku khadamula a tshomba ya Jehova ke?

²⁰ Joabe i lo hlamula, aku: A kuve kule na mina a kuva nzi khadamula kutani ku lovisa.

²¹ A mahungu a ma fambisangi lezo; kanilezi hi munhu loyi wa le xitsungeni xa ka Efraime, a vito a nga Xeba nʼwana Bikiri, a vukeleko hosi Davida. Nzi nyikeni yena ntsena, nzi ta suka laha mutini. A wasati aku ka Joabe: Languta, a hloko yakwe yi ta hoxiwa ka wena hi le hehla ka khurisi.

²² Zinghaho a wasati i loya ka vontlhe vanhu hi wutlhari gakwe; zonake va lo tsema a hloko ya Xeba nʼwana Bikiri va yi hoxa ka Joabe. Zonake Joabe i loba mpunzu; va lo hangalaka mahlweni ka muti, loyi ni loyi a ti yela tendeni gakwe. Yenawu Joabe i lo tlhelela ka hosi le Jerusalema.

²³ Makunu Joabe i wa hi nduna ya yontlhe yimpi ya ka Israeli, na Benaia wa Jehoiada i wa yimisilwe hehla ka maKereti ni maPeleti.

²⁴ Adorama i wa hi nduna ya mitiro, na Jehoxafate nʼwana Ahiluda i wa hi muhlayisi wa lezi zi tsalilweko.

²⁵ Xeva i wa hi mutsali, Zadoke na Abiatari va wa hi vapristi.

²⁶ Ira a mu Jaira yenawu i wa hi mupristi wa Davida.