2 Samueli 19 - Tshwa Bible

Davida a tlhelela Jerusalema.

¹ Zonake va lo ya byela Joabe, vaku: A hosi yi le hlomulweni, yi hlaluka Absalome.

² A kuhlula ka siku lego ku lo hunzuka ku maha xirilo ka vontlhe vanhu, hakuva a siku lego a vanhu va lozwa lezaku a hosi yi le hlomulweni hi kota ya nʼwana wa yona.

³ A vanhu va lo enghena mutini lego siku hi kunyanima, khwatsi mbanhu va nyanimako hi kuva ni tingana ta ku tsutsuma le yimpini.

⁴ A hosi yi lo fenengeta a nghohe ya yona, yi rila yiku: Nʼwana wa mina Absalome! Absalome nwananga, nwananga!

⁵ Zonake Joabe i lo ya enghena lomu ndlwini ya hosi, aku: Inyamutlha wena u wisile tingana wontihe malanza ya wena lawa ma ponisileko wutomi ga wena legi siku, ni wutomi ga vafana va wena ni ga vanhanyana va wena, ni wutomi ga vavasati va wena, ni wutomi ga mindlukulu ya wena.

⁶ Wena u ranza lava va ku vengako, u venga lava va ku ranzako, hakuva inyamutlha u tlhamusele lezaku a tinduna ni malanza a hi nchumu ka wena; hakuva mina nza zi tiva lezaku inyamutlha loku Absalome a wa hanyile, hina hontlhe ngha hi file nyamutlha, hi lezo zi nga ta ngha zi saseka mahlweni ka wena.

⁷ Hikwalaho huma u ya wulawula u tangalisa timbilu ta malanza ya wena; hakuva nza hlambanya ha Jehova lezaku, loku wena u nga humi lahandle, cima u nga ta sala ni munhu munwe wusiku legi. Lezo zi tava mhango ya hombe ka wena ku hunza tontlhe ti-mhango leti ti ku humeleleko kusukela wusweni ga wena kala lezi.

⁸ Zonake a hosi yi lo suka yi ya tshama laha nyangweni; zonake va lo byela vontlhe vanhu, vaku: Langutani, a hosi yi tshamile laha nyangweni. Zonake vontlhe va lota mahlweni ka hosi. Kanilezi va ka Israeli va wa panzanyekile, loyi ni loyi a ti yela kaya kakwe.

⁹ A tixaka tontlhe ta ka Israeli ti wo kanetisana, tiku: A hosi yi hi hlangutile mandleni ya valala va hina; i hi ponisile mandleni ya vaFilistia. Makunu i tsutsumile lomu tikweni hi ku chava Absalome;

¹⁰ Absalome loyi hina hi mu totileko hi mu yimisa hehla ka hina, yena i file le yimpini; makunu hi yini mu nga xuxiko a khungo ga ku tlhelisa a hosi yi wuya ke?

¹¹ Zonake hosi Davida i lo rumela mhaka ka mupristi Zadoke na mupristi Abiatari, aku: Wulawulani ka masingalakati ya ka Juda, muku: Hi yini mu ta ngava vasali va lenzhako a ku neha hosi le ndlwini ya yona? Hakuva a magezu ya vontlhe va ka Israeli ma tile ka hosi.

¹² Nwina mu vanakulori, mu marambu ya mina ni nyama ya mina; hi yini mu ta nga maha vasali va lenzhako a ku wuyisa hosi?

¹³ Mu ta ku ngalo ka Amasa: Kasi wena aku marambu ya mina ni nyama ya mina ke? Nungungulu a nzi tsayise makunu ni ku engetela, loku wena u nga yimisiwi a kuva nduna ya yimpi mahlweni ka mina kala kupinzuka wutshanwini ga Joabe.

¹⁴ Lezo i lo hunzula a timbilu ta vontlhe vanhu va ka Juda ti ku khwatsi i mbilu ya munhu munwe, zonake va lo rumela mhaka ka hosi, vaku ka yona: Tlhela u wuya, wena ni malanza ya wena wontihe.

¹⁵ Zonake a hosi yi lo tlhela yi wuya, yi ta chikela Jordani; ni va ka Juda va lota le Gilgali a ku ta tlhangana ni hosi, ni ku ta tlhatukisa hosi tlhatukweni wa Jordani.

¹⁶ Ximei wa Gera, a muBenjamini wa le Baharima, i lo hatlisa a relela ni vanhu va ka Juda a ku ya tlhangana na hosi Davida.

¹⁷ I wa hi ni 1,000 wa vanhu va ka Benjamini; na Ziba, a nanza ga yindlu ya Saule, i wa hi ni vafana vakwe va 15, ni 20 wa malanza yakwe; va lo ta tlhatuka Jordani kuwoneni ka hosi.

¹⁸ Zonake a xitataro xi lo tlhatuka xi ya teka a ngango wa hosi, ni ku ya maha lezi zi sasekileko kuwoneni ka yena. Zonake Ximei nʼwana Gera i lo ta ti wisa mahlweni ka hosi laha a hosi na yi tlhatukile Jordani, aku ka yona:

¹⁹ Nwinyi wa mina, u nga nzi vekeli nanzu, u nga alakanyi a mona wa nanza ga wena wa siku legiyani a hosi ya mina yi nga huma lomu Jerusalema, lezaku a hosi yi nga zi veki lomu mbilwini ka yona!

²⁰ Hakuva a nanza ga wena ga zi tiva lezaku nzi onhile, hikwalaho inyamutlha nzi tile ku ta rangela yontlhe a yindlu ya ka Josefa, na mina nzi relele kasi ku ta khinga a hosi ya mina.

²¹ Kanilezi Abixai wa Zeruia i lo hlamula, aku: Kasi Xemei a nga ta dawa lezi a nga rukatela a totilweko wa Jehova ke?

²² Davida aku: Mahungu muni nzi nga nawo na nwina, vafana nzi nwina va Zeruia? Hakuva inyamutlha nwina mu lava ku hambana na mina. Cima ku nga ta dawa munhu nyamutlha lomu ka va ka Israeli. Nzo kala nzi nga zi tivi mina lezaku inyamutlha nzi yimisilwe a kuva hosi lomu ka va ka Israeli ke?

²³ Zonake a hosi yi te ngalo ka Ximei: Cima u nga tafa! A hosi yi lo hlambanya ka yena.

²⁴ Na Mefiboxete nʼwana Saule i lota ku ta khinga hosi; i lota na a nga ambexangi mikonzo yakwe, hambu ni ku xamula xilevu xakwe, hambu ku hlaza tinguwo takwe kusukela lego siku a hosi yi nga famba ha gona kala lezi a hosi yi wuyileko hi kurula.

²⁵ Makunu laha a nga wa tile le Jerusalema a ku ta tlhangana ni hosi, a hosi yi te ngalo kakwe: Mefiboxete, hi kuyini u nga kala ku famba na mina?

²⁶ Yena aku: Hosi yanga, a nanza ga mina gi lo nzi khohlisa. Hakuva a nanza ga wena gi wa te ngalo: Nzi ta va byela va nzi gabhatselela a mbongola nzi khilela nzi famba ni hosi, hakuva a nanza ga wena gi nga xilema,

²⁷ kanilezi yena i hlevile a nanza ga wena ka hosi ya mina. Kanilezi a hosi ya mina i khwatsi i ngelosi ya Nungungulu.

²⁸ Hambulezo, maha kota kuranza ka wena, hakuva a yindlu yontlhe ya dadani wa mina, mbanhu va yimelweko hi kufa mahlweni ka hosi ya mina, kasi lezo wena u enghenisile a nanza ga wena xikari ka lava va gako mezeni ya wena! Kusasa muni nzi ta nga ku lava? Nza ha ta rilela yini kambe ka hosi?

²⁹ A hosi yi te ngalo kakwe: Hi kuyini wa ha wulako lezo ke? Mina nzi sina rizi wulile lezaku: Wena na Ziba mu ta panzelana a simu hi laha xikari.

³⁰ Mefiboxete aku: A teke gontlhe, lezi a hosi ya mina yi wuyileko hi kurula lomu ndlwini ya yona.

³¹ Zonake Barzillai a muGileade i lota hi le Rogelima a ta tlhatuka zinwe ni hosi a mu heleketa le tlhatuko wa Jordani.

³² Makunu Barzillai i wa khosahele nguvu; i wa hi ni 80 wa malembe. I wa yisile timbuva ka hosi xikhati lexo a hosi yi nga ha hi le Mahanaime, hakuva i wa fumile nguvu.

³³ A hosi yi te ngalo ka Barzillai: A hi fambe hontlhe; mina nzi ta ya ku wundla le Jerusalema.

³⁴ Barzillai i te ngalo ka hosi: Mangani a masiku ya wutomi ga mina, lezo u nge ngalo a nzi tlhatuke nziya Jerusalema zinwe ni hosi?

³⁵ Inyamutlha nzi na ni 80 wa malembe; xana nza ha ta zi kota ku hambanyisa zo saseka ni zo biha ke? Xana a nanza ga wena gi ta zi kota a kuzwa a kunanziha ka lezi a ta ngaga ni ka lezi a ta nganwa ke? A nanza ga wena gi ta mahela yini a nzhwalo kambe ka hosi ya mina ke?

³⁶ A nanza ga wena gi ta so tlhatuka Jordani zinwe ni hosi basi; hi kuyini a hosi yi nzi chachazela kota lezo ke?

³⁷ Vumela a nanza ga wena gi tlhela gi famba, nzi ya fela mutini wa mina ni le xilahleni xa dadani wa mina ni mamani wa mina. Kanilezi Kimhame a nanza ga wena hi loyi, i ta tlhatuka zinwe ni hosi ya mina, u ta mu mahela lezi zi nga mbilwini ya wena.

³⁸ Zonake a hosi yi te ngalo: Kimhame a fambe na mina, nzi ta mu mahela lezi zi sasekileko mahlweni ka wena; ni zontlhe lezi u ta nga zi wula ka mina, nzi ta ku mahela zona.

³⁹ Laha vontlhe va nga wa tlhatukile Jordani, yonawu hosi yi lo tlhatuka; zonake a hosi yi pswopswa Barzillai, yi mu katekisa, a tlhela aya kaya kakwe.

⁴⁰ A hosi yi lo hunza le Gilgali; na Kimhame i lo famba zinwe naye. A vanhu vontlhe va ka Juda ni khihlanya ga vanhu va ka Israeli, va lo tlhatukisa hosi.

⁴¹ Zonake vontlhe vavanuna va ka Israeli va lota ka hosi va ta ku ngalo ka yona: Hi kuyini a vamakabye va hina a va ka Juda va nga ta ku teka voce, va tlhatukisa hosi ni ngango wa yona le Jordani ni vontlhe vanhu va Davida ke?

⁴² Vontlhe vavanuna va ka Juda va lo hlamula a vavanuna va ka Israeli vaku: Hi lezi a hosi i xaka ga hina; makunu hi kuyini lezo zi mu holovisako ke? Hi loga nchumu xa le ka hosi ke? Hi bhinzule nchumu ha zona ke?

⁴³ Zonake vontlhe vavanuna va ka Israeli va lo hlamula a vavanuna va ka Juda, vaku: Hi na ni khume ga ziavelo ka hosi, hambu hi ka yena Davida ha mu hunza; hi kuyini mu hi kanyisa ke? Ku wa nga hi hina hi nga fanele ku ranga hi wula a gezu ga ku wuyisa hosi ke? A magezu ya vavanuna va ka Juda ma lova ya ntamu ku hunza magezu ya va ka Israeli.