2 Samueli 16 - Tshwa Bible

¹ Laha Davida a nga wa hunzile kutsongwani hehla ka xitsunga, ku lota Ziba, a nanza ga Mefiboxete, mahlweni kakwe na hi ni timbongola timbiri na ti rwele 200 wa zibaba, ni 100 wa zitata za tisote ta mauva, ni 100 wa zikhekhetselo za mihanzu, ni karafawu ya vinya.

² A hosi yi te ngalo ka Ziba: Za yini lezi zilo? Ziba aku ngalo: A timbongola to khilelisa a va le ngangweni wa hosi, a zibaba ni mihanzu ya ximumu zi tava kuga ka majaha, ni vinya va tanwa lava va ta nga karala lomu xiwuleni.

³ A hosi yiku: I kwihi nʼwana wa hosi ya wena ke? Ziba aku: I sele le Jerusalema, hakuva i ngalo: Inyamutlha a yindlu ya ka Israeli yi ta nzi tlhelisela a mufumo wa dadani wa mina.

⁴ A hosi yi te ngalo ka Ziba: Cuwuka, zontlhe lezi zi nga hi za Mefiboxete za wena. Zonake Ziba i te ngalo: Hosi yanga! Ngha nzi kuma thomo mahlweni ka wena hosi ya mina.

⁵ Laha hosi Davida a nga chikela le Bahurima, ku lota wanuna loyi a nga hi xaka ngangweni wa ka Saule, a vito gakwe a nga hi Ximei nʼwana Gera; i lota na a kari a rukatela.

⁶ I lo hoxetela maribye ka Davida ni malanza yakwe wontihe, ni ka vontlhe vanhu, ni ka tinhenha tontlhe ti nga hi tlhelweni gakwe ga xinene ni ga xibhabha.

⁷ Lezi a nga kari a rukatela ha zona Ximei, i waku: Huma, huma munhu nziwena wa nkhata, munhu wa Beliali!

⁸ Jehova a tlhelisele hehla ka wena wontihe a nkhata wa yindlu ya ka Saule, leyi wena u fumako matshanwini ya yena, makunu Jehova i nyikele wukosi mandleni ya nʼwana wa wena Absalome. Inyamutlha wena u le tikhuruxwini, hakuva u munhu wa nkhata.

⁹ Zonake Abixai wa Zeruia i te ngalo ka hosi: Hi yini a mbyana leyi yi fileko yi rukatela a hosi ya mina? Nzi vumele nzi ya mu tsema hloko!

¹⁰ A hosi yi te ngalo: I mhaka muni nzi nga nayo na nwina vafana nzinwina va Zeruia? A rukatele, hakuva Jehova i mu byelile ku ngalo: Rukatela Davida. Himani a ta nga wula, aku: Hi yini u mahako lezo? 1 Tih. 2:8; Joh. 18:11

¹¹ Davida aku ka Abixai ni ka wontihe malanza yakwe: Languta, a nʼwana wa mina wo huma xiwunwini xa mina, i hlota wutomi ga mina; nguvunguvu a muBenjamini loyi i ta gi lavisisa hi ntamu! Mu tsikeni a rukatela, hakuva hi zalezo a nga byelwa hi Jehova.

¹² Kutani Jehova i ta cuwuka kuxaniseka ka mina, zonake a nzi nyika kurula hi kota ya kurukatela kakwe ka nyamutlha.

¹³ Zinghaho Davida ni vanhu vakwe va lo ti fambela ndlela yabye, yenawu Ximei i lo khoma ndlela yakwe a famba hi tlhelo ga xitsunga, a famba na a kari a rukatela, na hoxetela maribye, a paletela tsutsungwani.

¹⁴ A hosi ni vontlhe vanhu lava yi nga wa hi navo, va lo ya chikela Ayefime na va karele, va humula laho.

¹⁵ Kanilezi Absalome zinwe ni vontlhe vanhu, a vavanuna va ka Israeli va lota Jerusalema, na Ahitofeli i wa hi zinwe naye.

¹⁶ Zonake laho ku lota Huxai a muArke, a munghana wa Davida, a taku ka Absalome: Hosi a yi hanye, hosi a yi hanye!

¹⁷ Absalome aku ka Huxai: Xana hi lona liranzo la wena leli u ranzako munghana wa wena ha lona ke? Hi kuyini u nga kala ku famba ni munghana wa wena?

¹⁸ Huxai aku ka Absalome: Ahihi; kanilezi nzi lava ku khoza ka loyi a hlawulilweko hi Jehova ni vanhu, ni vontlhe va ka Israeli, nzi tshama naye.

¹⁹ Ni kambe, himani nzi ta nga mu khozela ke? A hi yena nʼwana wakwe ke? Kotisa lezi nzi nga wa tirela a raru wa wena, na wenawu nzi ta ku tirela.

²⁰ Zonake Absalome i te ngalo ka Ahitofeli: Hi nga wulani ga nwina wusungukati xungetano hi lezi hi ta nga maha!

²¹ Ahitofeli i te ngalo ka Absalome; Yana u ya enghena ka mindlukulu ya raru wa wena, leyi a yi siyileko ku hlayisa yindlu, kasi vontlhe va ka Israeli va ta zi tiva lezaku u mahile xikanya ka raru wa wena, zonake a mandla ya vontlhe lava va nga na wena ma ta tiyiswa.

²² Zinghaho va lo mu gwimbela tenda Absalome le hehla ka yindlu. Yena i lo ya enghena ka mindlukulu ya raru wakwe kuwoneni ka vontlhe va ka Israeli.

²³ Masikwini lawo, a timhaka leti ti nga wa wuliwa hi Ahitofeli ti wa fanana ni gezu ga Nungungulu. Ti wa hi lezo tontlhe timhaka ta Ahitofeli ka Davida ni ka Absalome.