2 Samueli 15 - Tshwa Bible

Absalome a vukela Davida.

¹ Anzhako ka lezo Absalome i lo ti longisela a kareta ni mahaxi, ni 50 wa vavanuna lava va nga tsutsuma mahlweni kakwe. 1 Tih. 1:5

² Absalome i wa vuka ni mixo a ya yima laha kusuhani ni ndlela ya nyangwa; loku a wona ni wihi munhu a yisako timhaka le hosini kasi ku ya lamulwa, Absalome i wo mu vitana aku kakwe: Uta hi ka wihi muti? Yena aku: A nanza ga wena gita hi ka yinwe ya tinyangwa ta ka Israeli.

³ Absalome aku kakwe: Wa wona, a timhaka ta wena ti sasekile, ti lulamile; kanilezi a ku na munhu le hosini a ta nga ku ingisa.

⁴ A engeta aku: Kaxa loku ku wo khwa hi mina nzi yimiswako kuva mulamuli wa lomu tikweni, ni wihi munhu a tako ni keco kutani timhaka ka mina, nzi wa ta mu lamula hi nongameto!

⁵ I waku loku munhu ata laha kusuhani kakwe a ta mu khizamela hi xichavo, i wa mu khoma hi mandla yakwe a mu pswopswa.

⁶ Absalome i wa maha lezo ka vontlhe va ka Israeli lava va tako hosini ku ta lamulwa; zinghaho Absalome i lo ti kokela timbilu ta vanhu va ka Israeli.

⁷ Makunu laha na ku hunzile mune wa malembe, Absalome i te ngalo ka hosi: Nzi kombela kuya le Hebroni nzi ya tatisa a xifungo xa mina lexi nzi xi mahileko mahlweni ka Jehova.

⁸ Hakuva a nanza ga wena, a xikhati lexi nzi nga wa tshamile le Gexura, tikweni ga Siria, nzi wa ti bohile hi kuhlambanya, nziku: Loku Jehova a nzi tlhelisa kambe nziya Jerusalema, mina nzi ta mu khozela. Gen. 28:20

⁹ A hosi yi te ngalo kakwe: Famba hi kurula. Zinghaho i lo suka aya le Hebroni.

¹⁰ Kanilezi Absalome i lo rumela mitsukano ka tontlhe tixaka ta ka Israeli, aku: Hi xikhanzakanya xa lezi mu ta ngazwa a kuvuma ka mpunzu, nwina mu ta ku ngalo: Absalome i fumile le Hebroni.

¹¹ Absalome i wa vitanile 200 wa vavanuna va le Jerusalema, a famba navo na va nga tivi nchumu hi mhaka leyo.

¹² Laha Absalome a nga wa ha nyikela miphahlelo, i lo vitanisa Ahitofeli a muGiloni, a nga wa hi munwe wa madota ya Davida, loyi a nga hi le mutini wakwe. A xikungo lexo xi lo sangula ku tiya, hakuva a vanhu va lo simama ku talelana ka Absalome.

¹³ Ku lota munhu ka Davida a ta mu bikela timhaka leto, aku: A timbilu ta vanhu va ka Israeli ti lanzela Absalome.

¹⁴ Davida i te ngalo ka malanza yakwe wontihe lawa a nga hi nawo le Jerusalema: Sukani hi tsutsuma, hakuva a nga kona a to pona ka Absalome. Hatlisani mu suka, hakuva a nga hi kamanyeta a hi vangela zikarato, a hlasela muti hi tisupado. Tis. 3:1

¹⁵ A malanza ma te ngalo ka hosi yabye: A malanza ya wena ma ta maha zontlhe lezi u zi lavako.

¹⁶ A hosi yi lo famba, yi lanzelwa hi nghamu ya yona yontlhe; kanilezi yi lo siya a 10 wa mindlukulu yi hlayisa a yindlu.

¹⁷ Zinghaho a hosi yi lo huma yi famba, yi lanzelwa hi vanhu vontlhe, va ya yima le Beti-Merake.

¹⁸ A malanza wontihe ma lo famba hi lomu matlhelweni yakwe; a vaKereti vontlhe, ni vaPeleti vontlhe; ni 600 wa vavanuna va nga wata hi le Gati, va lo famba mahlweni ka hosi.

¹⁹ Zonake a hosi yi te ngalo ka Itai a muGiti: Hi kuyini u famba na hina ke? Tlhela, u ta ya tshama ni loyi a nga hosi, hakuva wena u muluveli, ni kambe u ta tlhelela ka nwina.

²⁰ Lezi wa hi ku chikelako tolo, xana nzi ta ku teka nyamutlha u pepetseka na hina kontlhe lomo ke? Hakuva mina nziya laho nzi to ku kumawu. Teka vanakuloni u tlhela. Tipswalo ni zinene a zive na wena!

²¹ Itai i lo hlamula, aku ka hosi: Nzi hlambanya ha Jehova a hanyako ni hosi ya mina, kani hi kwihi laha a hosi yi ta ngava kona, a kufeni ni kuhanyeni, a nanza ga wena gi tava naye.

²² Davida i te ngalo ka Itai: Suka hi famba! Zonake Itai a muGiti i lo suka a tlhatuka zinwe ni vontlhe vanhu vakwe, ni vanana vakwe vontlhe lava a nga hi navo.

²³ A tiko gontlhe gi lo rila hi gezu ga hombe, ni vontlhe vanhu va nga wa hunza. Na yonawu hosi yi lo tlhatuka a xicongwana xa Kidroni, ni vontlhe vanhu va lo tlhatuka va famba hi ndlela yi cuwukako xiwuleni. Joh. 13:1

²⁴ Zadoki ni vontlhe vaLevi va lo famba naye, na va rwele a arke ga xivumelwano xa Nungungulu. Va lo veka a arke ga Nungungulu lahasi, kala a vanhu va mbhela ku huma lomu mutini, Abiatari i lo tlhatukawu.

²⁵ Zonake a hosi yi te ngalo ka Zadoki: Tlhelisa a arke ga Nungungulu le Jerusalema. Loku mina nzi kuma thomo mahlweni ka Jehova, i ta nzi tlhelisa a ya nzi kombisa gona ni yindlu yakwe.

²⁶ Kanilezi loku yena aku: A nza ha xalali ha wena, mina nzi kwalaha; a mahe ka mina kota kuranza kakwe.

²⁷ A hosi yi lo engeta yiku ka mupristi Zadoki; Hi nga wona, tlhelela mutini hi kurula, zinwe ni nʼwana wa wena Ahimaza; na Jonatani nʼwana Abiatari.

²⁸ Mina nzi tshama mapelweni laha xiwuleni kala nzi kuma a gezu ga le ka nwina.

²⁹ Zonake Zadoke na Abiatari va lo tlhelisa a arke ga Nungungulu giya le Jerusalema va ya tshama kona.

³⁰ Davida i lo kanziha xitsunga xa maOliva na a kari a rila, na fenengetile a hloko yakwe, na a nga ambalangi zilato; ni vanhu vontlhe lava a nga hi navo va lo fenengeta tihloko tabye va rila, na va kari va kanziha. Estere 6:12; Jer. 14:3

³¹ Va lo byela Davida; vaku: Ahitofeli i lomu xikari ka lava va yimako na Absalome. Davida i te ngalo: Jehova, hunzula wusungukati ga Ahitofeli giva wupumbu! Joba 5:12

³² Makunu laha Davida a nga chikele hehla ka xitsunga lexi a nga wa khozela ka xona Nungungulu, Huxai a muArke i lo ta tlhangana naye a bhaji gakwe na gi hanzulwe, na hi ni ntshuri hlokweni yakwe.

³³ Davida i te ngalo kakwe: Loku wena u famba zinwe na mina u ta nzi binzisa.

³⁴ Kanilezi loku wena u tlhelela mutini u ya ti wulela ka Absalome, uku: Wena hosi, mina nzi nanza ga wena! Khwatsi hi lezi ni kale nzi nga wa hi nanza ga raru wa wena, ni lezi nzi nanza ga wena. Loku u maha lezo u ta hi hlulele a wusungukati ga Ahitofeli.

³⁵ Mupristi Zadoke na mupristi Abiatari, va tava zinwe na wena. Kasi zontlhe lezi u ta nga zizwa lomu ndlwini ya hosi, u ta ya byela Zadoke na Abiatari.

³⁶ Languta, va na ni vana vabye va vambiri, Ahimaza nʼwana Zadoke na Jonatani nʼwana Abiatari; mu ta nzi rumela ha vona zontlhe lezi mu ta nga zizwa.

³⁷ Zonake Huxai, a munghana wa Davida, i lo tlhelela mutini; Absalome i lo enghena Jerusalema.