2 Samueli 12 - Tshwa Bible

¹ Zonake Jehova i lo ruma Natani aya ka Davida, a yaku ngalo: Ku wa hi kona a vanhu vambiri va muti munwe; a munwe i wa fumile, a munwani i wa hi xisiwana.

² Loyi wo fuma i wa fuyile tihomu ni tiyivu to tala nguvu;

³ kanilezi loyi wa xisiwana i wa fuyile xiyivana xinwe basi, xa kuva a nga no xi xava a xi wundla, xi kula lomu ndlwini yakwe ni vana vakwe; xi waga kuga kakwe, xi nwela lomu gombeni ga nwinyi wa xona, xi etlela xifuveni xakwe, xi ku khwatsi xinhanya-tana xakwe.

⁴ Makunu ku lo chikela mupfhumba ka munhu loyi wo fuma; zi lo mu binza a ku teka a xifuyo xitsongwani hambu xa hombe ka lezi zakwe a dayela mupfhumba loye a mu enzeleko. Zonake i lo ya teka a xiyivana xa xisiwana a daya xona, a nyika mupfhumba wakwe loyi a mu enzeleko.

⁵ Davida i lo zangara nguvu a zangarela munhu loye, aku ka Natani: Nzi hlambanya hi Jehova a hanyako, a munhu loye a mahileko lezo i fanele kufa!

⁶ Yena i ta rihela a xiyivana hi ku wuyetilweko ka mune, hi kota ya lezi a mahileko lezo zilo, hakuva yena a nga na tipswalo. Ekso. 22:1

⁷ Zonake Natani i te ngalo ka Davida: A munhu loye hi wena! Jehova Nungungulu wa ka Israeli i te ngalo: Nzi ku totile a kuva hosi hehla ka va ka Israeli, nzi ku tlhatlhisa mandleni ya Saule.

⁸ Nzi ku nyikile a yindlu ya hosi ya wena, nzi veka vasati va hosi ya wena xifuveni xa wena, nzi ku nyika a yindlu ya ka Israeli ni ya ka Juda; ni loku lezo zi wa hi zitsongwani, ngha nzi ku engetele xihi ni xihi,

⁹ Hi kuyini u xanza a mhaka ya Jehova hi ku maha lezi zi bihileko mahlweni kakwe ke? U dele Uria a muHiti hi tlhari, u tlhela u mu tekela ni sati wakwe a maha wa wena; u mu daya ni tlhari ga vanana va ka Amoni.

¹⁰ Hikwalaho a supado cima yi nga ta huma lomu ndlwini ya wena, hambu ni siku ginwe, hakuva u nzi kanyisile hi ku teka a sati wa Uria a muHiti u mu maha wa wena.

¹¹ Jehova i ngalo: Languta nzi ta vuxa a makhombo lomu ndlwini ya wena. Nzi ta ku tekela vasati va wena nzi va nyikela ka munwani, a etlela navo ni hlikanhi. Deut. 28:30; 2 Sam. 16:21, 22

¹² Hakuva u zi mahile le xihundleni, kanilezi mina nzi ta zi tira laha hlikanhini, kuwoneni ka vontlhe va ka Israeli.

¹³ Zonake Davida i te ngalo ka Natani: Nzi onhile ka Jehova. Kanilezi Natani i te ngalo ka Davida: Jehova i susile xionho xa wena; cima u nga tafa;

¹⁴ kanilezi, lezi u tsanwisileko Jehova, u vekela xivango ka valala vakwe hi mhaka leyi, a nwanana loye u belekelweko yena hakunene i tafa.

¹⁵ Zonake Natani i lo suka a famba kaya. Jehova i loba a xinwanana lexi xi belekilweko hi sati wa Uria a belekela Davida; xi lo babya nguvu.

¹⁶ Kanilezi Davida i lo khongelela xinwanana ka Nungungulu, a yila a ngagi zakuga, a enghena lomu ndlwini yakwe a etlela lahasi wusiku gontlhe.

¹⁷ A masingalakati ya yindlu yakwe ma lo suka maya kakwe, ma ya mu khongotela lezaku a vuka, kanilezi i lo ala, a nga vumeli ni kuga navo zakuga.

¹⁸ Makunu hi siku ga wuntlhanu ni mambiri, a xinwanana xi lofa; a malanza ya Davida ma lo chava ni ku ya mu byela hi kufa ka xinwanana, hakuva va waku: Laha a xinwanana xi nga wa ha hanya hi wa wulawula naye a nga hi ingisi; makunu hi ta tiya ku ya mu bikela lezaku a xinwanana xi file ke? A nga ti maha za hava.

¹⁹ Kanilezi Davida i lo wona lezaku a malanza yakwe ma hlevelana; i lo zi pima lezaku a xinwanana xi file. I lo wutisa malanza yakwe, aku: Xana a xinwanana xi file ke? Vona vaku: Ina, xi file!

²⁰ Zonake Davida i lo vuka lahasi, a hlamba, a tola, a ambala tinwani tinguwo, a enghena lomu ndlwini ya Jehova a ya khozela. I lo tlhela aya ndlwini yakwe a ya kombela lezaku va mu phamela zakuga aga.

²¹ A malanza yakwe maku kakwe: Za kuyini u mahako? A xikhati lexi a nwanana a nga ha hanya, u wa yila u ngagi zakuga, u rila, kanilezi loku a nwanana a file, wo vuka uga zakuga!

²² Yena aku; Laha a xinwanana xi nga wa ha hanya, nzi wa yila, nzi rila, hakuva nzi waku; Ahati kani Jehova i ta nzi zwela wuxinji a hanya nwanana!

²³ Kanilezi makunu yena i file; nzi ta yilela yini nzi tsika kuga? Nzi ta zi kota ku mu wuyisa ke? Hi mina nzi ta nga mu lanzela; yena a nga ta ha wuya kambe ka mina.

²⁴ Davida i lo chavelela sati wakwe Batexeba; i loya kakwe a ya etlela naye, a beleka a nwanana loyi Davida a nga mu chula vito ga Solomoni. Jehova i lo mu ranza, 1 Kro. 22:9; Mat. 1:6

²⁵ a rumela a mhaka hi nomu wa muprofeti Natani, a ya mu chula a vito ga Jedidia, hi kota ya Jehova. Davida a teka a muti wa Raba.

²⁶ Makunu Joabe i lolwa na Raba wa vana va ka Amoni, a teka a zinza.

²⁷ Zonake Joabe i lo rumela a mitsumi ka Davida, aku: Nzi lwile na Raba, nzi khozisa a muti wa mati.

²⁸ Makunu tsombanyisa a vanhu lava va seleko u ranzela muti, u wu teka, hakuva loku nzi wu teka mina, wu nga vitanwa hi vito ga mina.

²⁹ Davida i lo tsombanyisa vontlhe vanhu, aya le Raba a yalwa nawo, a wu teka.

³⁰ Yena i lo teka xidlodlo laha hlokweni ya hosi ya kona; a kubinza ka xona ku wa hi talenta ya nzalama, na xi hi ni maribye ya malongo. Zonake xi lo tlhatekwa hlokweni ya Davida; i lo teka muphango wa hombe lomu mutini.

³¹ I lo humesa a vanhu lava va nga wa hi lomo a va veka masahweni, ni lomu mitirweni ya zihloka za ziketse, a va wumbisa zitini; i lo maha zalezo ka yontlhe miti ya vanana va ka Amoni. Zonake Davida i lo tlhelela Jerusalema ni vanhu vakwe vontlhe.