2 Samueli 11 - Tshwa Bible

Davida na Batexeba.

¹ Hi lembe gi gamelako, hi xikhati lexi a tihosi ti yako yimpini, Davida i lo rumela Joabe zinwe ni malanza yakwe, ni vontlhe vanana va ka Israeli, a ku ya hlasela a vanana va ka Amoni; va loya vimbezela Raba, kanilezi Davida i wa sele le Jerusalema.

² Kute hi ginwani siku, laha gambyeni, Davida a vuka hi laha mubhedini wakwe, a fambafamba le hehla ka langwa la yindlu ya hosi, zonake na hi le langweni i lo wona a wasati na kari a hlamba; a wasati loye i wa sasekile nguvu.

³ Davida i lo rumela vanhu a ku ya wutisa hi loye wasati, zonake vaku kakwe: A hi yena Batexeba, a nhanyana wa Elima, a sati wa Uria a muHiti ke?

⁴ Davida i lo rumela a mitsumi a ku ya mu teka; i lota kakwe a ta etlela naye; hakuva i wa ti basisile kungahlazekeni kakwe. Zonake i lo tlhela aya ndlwini yakwe. Levi 15:19

⁵ A wasati loye i lo xura nyimba. I lo rumela ka Davida a ta mu byela, aku: Nzi na ni nyimba,

⁶ Zonake Davida i lo rumela mhaka ka Joabe; aku: Rumela Uria a muHiti ka mina. Zalezo Joabe i lo rumela Uria a muHiti ka Davida.

⁷ Uria i lota kakwe, zonake Davida i lo mu wutisa lezaku o yini Joabe, ni lezaku a vanhu va tshamisa kuyini, ni lezaku a yimpi yi fambisa kuyini.

⁸ Davida i te ngalo ka Uria: Yana le ndlwini ya wena u ya hlamba mikonzo ya wena. Uria i lo huma ndlwini ya hosi; i lo lanzelwa hi zinyikiwo na zi huma ndlwini ya hosi.

⁹ Kanilezi Uria i lo ya etlela laha nyangweni ya hosi zinwe ni wontihe malanza ya hosi yakwe; a nga chikelangi le ndlwini yakwe.

¹⁰ Zonake Davida i lo byeliwa lezaku: Uria a nga chikelangi le ndlwini yakwe. Davida aku ka Uria: Kasi a ku wuyi hi le kuenzeni ke? Hi yini u nga chikeliko le ndlwini ya wena ke?

¹¹ Uria i lo hlamula Davida aku: A arke, ni va ka Israeli, ni va ka Juda, va tshamile mixaxeni, zinwe ni nwinyi wa mina Joabe, ni malanza ya hosi ya mina, va govile le handle; xana mina nzi ta enghena lomu ndlwini ya mina, nziga, nzinwa, nzi etlela ni sati wa mina ke? Nzi hlambanya ka wena ni muhefemulo wa wena wu hanyako, cima nzi nga ta maha lezo zilo!

¹² Davida i te ngalo ka Uria: Tshama laha inyamutlha kambe, manziko nzi ta ku tlhelisa u famba. Zinghaho Uria i lo tshama le Jerusalema lego siku ni siku gi gamelako.

¹³ Zonake Davida i lo mu vitanisa, kasi a fela ku taga ni kunwa mahlweni kakwe, a mu maha a popiwa. Kanilezi laha gambyeni i lo huma a ya etlela laha mubhedini wakwe zinwe ni malanza ya hosi yakwe, a ngayi le ndlwini yakwe.

¹⁴ Makunu laha mixweni Davida i lo tsala a papilo goya ka Joabe, a gi rumela hi canja ga Uria.

¹⁵ Lomu ka papilo i lo tsala aku: Yisa Uria laha a yimpi yi hisako kona, mu mu tsika laho kasi a fela ku gwaziwa afa.

¹⁶ Laha Joabe a nga wa cuwukisisile a muti, i lo yisa Uria laha a nga ku wona lezaku laha ku na ni vavanuna va tinhenha.

¹⁷ Zonake a vavanuna va muti va lo huma a ku talwa na Joabe; laho ku lo dawa vanwani vanhu va malanza ya Davida, yenawu Uria a muHiti i lo dawa.

¹⁸ Zonake Joabe i lo rumela vanhu a ku ya bikela Davida mahungu wontihe ya yimpi, a leletela kambe a tsumi, aku:

¹⁹ Laha u ta nga mbheta ku hlawutela hosi mahungu ya yimpi,

²⁰ loku a hosi yi zangara, yiku ka wena: Hi kuyini mu tshinela laha kusuhani ka muti muiwa ke? Mu wa nga zi tivi lezaku va ta mu fula na va hi laha khurisini ke?

²¹ Kasi himani a nga daya Abimeleki nʼwana Jerubbexete? A hi wasati a nga hoxa a ribye ga xigayo na hi laha khurisini, zonake afa kwale Tebeza ke? Hi kuyini mu tshinela laha kusuhani ka khurisi ke? Zonake mu ta mu byela lezi: A nanza ga wena Uria a muHiti i filewo. Vala. 9:53

²² A ntsumi wu lo suka wu famba. Laha wu nga chikela, wu lo hlawutela Davida zontlhe lezi Joabe a mu rumileko zona.

²³ A ntsumi wu te ngalo ka Davida: A vavanuna lavo va wa hi vukele hi ntamu; hi tlhangene navo lahandle, zonake hi va susumeta kala laha nyangweni.

²⁴ Makunu a vaweleli va mawura va lo fula a malanza ya wena na va hi le hehla ka khurisi; a malanza ya hosi manyingi ma file, ni nanza ga wena Uria a muHiti i filewo.

²⁵ Zonake Davida i te ngalo ka ntsumi: U ta ya byela Joabe lezaku: Lezo zilo ngha zi nga ku karati, hakuva a supado yi daya loyi ni loyi; tiyisa a yimpi muiwa ni muti lowo, u wu hahlula. Hi zalezo u ta ya mu tiyiseta.

²⁶ Laha a sati wa Uria a ngazwa lezaku a nuna wakwe i file, i loba nkosi a hlaluka nuna wakwe.

²⁷ Laha a nga gumesile a xirilo, Davida i lo mu vitanisa, a ta mu amukela lomu ndlwini yakwe a maha sati wakwe, a beleka naye a nisanyana. Kanilezi a mhaka leyi Davida a yi mahileko yi wa bihile mahlweni ka Jehova.