2 Pedro 2 - Tshwa Bible

A vaprofeti ni vagonzisi va mawunwa.

¹ Kanilezi ku wa humelela ni vaprofeti va mawunwa xikari ka vanhu, kota lezi ku ta nga huma xikari ka nwina a vagonzisi va mawunwa, lava va ta nga enghenisa hi tlhelo a gonzo yi lovisako, va kaneta hambu ni Hosi leyi yi nga va xava, va ti nehela a kulobyiswa loku ku hatlisako. Deut. 13:1; Mat. 24:11; Fil. 3:19

² Vanyingi va ta lanzela a mahanyela yabye ya wubhayi, lava a ndlela ya zinene yi ta nga wulawulwa hi kubiha hi kota ya vona.

³ Hi ku navela kufuma, va ta bhinzula ha nwina hi magezu ya kukanganyisa; kanilezi a kukoneka kabye ka kale a ku hlweli, ni kulobyiswa kabye a ku etleli. Deut. 32:35; Tit. 1:11; Juda 4, 15

⁴ Hakuva Nungungulu a nga tsetselelangi a tingelosi leti ti nga onha, kanilezi i lo ti hoxa Gehena, a ti valela marinzini ya munyama, a kuva ti gongiwa kala kulamulweni. Joba 4:18; Lu. 8:31; Joh. 8:44

⁵ Ni tiko ga kale a nga gi tsetselelangi, hambu lezi a nga hlayisa Noa, a mukaneli wa kululama, zinwe ni vanwani va ntlhanu ni vambiri, laha a nga neha a ntalo hehla ka tiko ga lava va nga chaviko Nungungulu. Gen. 7:1, 7; 1 Ped. 3:19

⁶ I lo lamula a miti ya Sodoma ni Gomora a kuva yi lobyisiwa, yi maha khuma, a yi yimisa a kuva xikombiso ka lava va ta nga kala va nga hanyeli Nungungulu. Gen. 19:24; Mitse. 26:10

⁷ Kanilezi i lo hlanguta Loti loyi a lulamileko, loyi a nga xaniseka hi kota ya mahanyela ya wubhayi ga vakubiha. Gen. 19:16

⁸ Hakuva a munhu loyi a lulamileko, a akileko xikari ka vona, i lo karateka moyeni wakwe wo lulama masiku wontihe, hi ku wona ni kuzwa a mitiro yabye ya kubiha.

⁹ A Hosi ya zi kota ku hlanguta kuringweni lava va chavako Nungungulu, ni ku khoma a vangalulamangiko va tsayiswa kala sikwini ga kulamulwa; Tis. 34:17; 1 Kor. 10:13

¹⁰ kanilezi i maha lezo nguvunguvu hi vona lava va fambako hi ka nyama kumbilukeleni ko nyenyeza, va kanyisa a wuhosi ga le hehla. Kota lezi va nga ni wurena va ti kukumukisa, a va chavi a ku rukatela a zivangwa zi ngangamelako. Juda 4, 7, 8

¹¹ Kanilezi a tingelosi, hambu lezi ti va hunzako hi wunhenha ni ntamu, a ti va lamuli hi kurukatela mahlweni ka Hosi.

¹² Kanilezi lava va ta dawa khwatsi hi zihari zi nga hiko na kupima, zivangwa zi pswalilweko kasi ku khonʼwa zi lobyiswa, na va rukatela lezi va nga zi tiviko, va ta lova kuboleni kabye, Jer. 12:3

¹³ va lahlekelwa hi nzhiho lowu va nga wu tirela hi ku maha kubiha. Va alakanya lezaku litsako ku maha wudakwa laha hlikanhini. Va hi mahala ni makhwanga, va lonzola mibuzweni yabye ya liranzo loku va kari vaga na nwina. Rom. 13:13; Fil. 3:19; Juda 12

¹⁴ Va na ni mahlo ma teleko hi wubhayi, a va kolwi hi kuonha. Va kucetela a mihefemulo leyi yi nga tiyangiko. A timbilu tabye ti tolovela a mahlokoti; a vanana va rukatelweko.

¹⁵ Na va tsikile a ndlela yo lulama, va lo penga va lanzela a ndlela ya Balami nʼwana Beori, loyi a nga ranza a nzhiho wa ku maha kubiha; Mitse. 22:5, 21, 23

¹⁶ kanilezi i lo kawukwa hi kota ya xihambuko xakwe: a mbongola leyi yi nga wulawuliko yi lo dzuka yi wulawula hi gezu ga wumunhu, yi alela a muprofeti kuhungukeni kakwe.

¹⁷ A vanhu lava tihlowo ti nga hiko na mati, marefu ma susumetwako hi bhubhutsa; va hlayiselwe a munyama lowu wa ntima. Juda 12, 13

¹⁸ Hakuva hi ku wulawula a timhaka ta matshanza leti ti nga nyawuliko, va xengetela hi kunavela ka nyama ni wubhayi, a vanhu lava va ha ponako ka lava va hanyako kuhambukeni; Miti. 2:40; Juda 16

¹⁹ va va tsumbisa a kutlhatlheka, kasi vona wutsumbu tikhumbi ta kubola; hakuva a munhu i khumbi ya lezi a hlulwako ha zona. Joh. 8:34; Rom. 6:16; Gal. 5:13

²⁰ Hakuva loku va ponile a kunyenyezeni ka tiko, hi ku tiva a Hosi ni Muhanyisi Jesu Kristu, zonake va engeta va phaswa ha kona va hlulwa, a tshamela gabye go gumesa gi bihile ku hunza legi go ranga. Mat. 12:45; Maheb. 10:26

²¹ Hakuva ngha ku hi chukwana ka vona loku va wa nga tivangi a ndlela ya kululama, a ku hunza lezaku na va yi tivile va tlhelela nzhako, va tsika a xileletelo xo basa lexi va nyikilweko xona.

²² Ku humelele ka vona kota lisine la vingu legi gi nge ngalo: A mbyana yi tlhelele mahlateni ya yona, ni khumba legi gi hlazilweko gi tlhela gi ya puluwunza nzhopeni. Mav. 26:11