2 Kronekele 9 - Tshwa Bible

A muzinza wa le Xeba.

¹ Laha a muzinza wa le Xeba wu nga wa zwile hi wudumo ga Solomoni, wu lota le Jerusalema a ku ta ringa Solomoni hi ziwutiso zo binza; wu lota ni vanhu vo tala nguvu, ni makameli lawa ma nga wa rwele makha ni nzalama yo tala, ni maribye ya malongo. Wu lota ka Solomoni wu ta mu hlawutela lezi zi nga wa hi mbilwini ya wona. Mat. 12:42; Lu. 11:31

² Solomoni i lo mu hlamula zontlhe ziwutiso zakwe; a xi kona a nga tsanzeka Solomoni, i lo hlamula zontlhe.

³ Laha a muzinza wa le Xeba wu nga wonile a wutlhari ga Solomoni, ni yindlu leyi a yi akileko,

⁴ ni zakuga za meza yakwe, ni tiyindlu ta malanza yakwe, ni tiyindlu ta tinduna takwe, ni tinguwo tabye, ni vakhomi va zibya zakwe ni tinguwo tabye, ni ndlela leyi a kanzihako ha yona a kuya ndlwini ya Jehova, i wa hlamele,

⁵ a ku ngalo ka hosi: Hakunene lisine lezi nzi zi zwileko na nzi hi lomu tikweni ga mina, va bika hi kuwulawula ka wena, ni wutlhari ga wena!

⁶ Kanilezi a nzi kholwangi lezi va nga wa zi wula, kala lezi nzi ngata nzi ta zi wona hi mahlo ya mina. Makunu languta, cima a va nzi byelangi hambu khihlanya ga wutlhari ga wena; wena u hunza zontlhe lezi nzi zi zwileko.

⁷ Va katekile a vanhu va wena! Ma katekile a malanza ya wena lawa ma yimako mahlweni ka wena wontihe masiku mazwa wutlhari ga wena!

⁸ A khesiwe Jehova Nungungulu wa wena, loyi a xaleleko ha wena a ku ku yimisa xitshanwini xa wena xa wuhosi a kuva hosi, u tirela Jehova Nungungulu wa wena! Hakuva Nungungulu i ranzile va ka Israeli a ku va hlayisa kala kupinzuka; hikwalaho i yimisile wena a kuva hosi hehla kabye, kasi wa fela ku lulamisa timhaka ni ku va lamula.

⁹ I lo nyika hosi 120 wa titalenta ta nzalama, ni makha yo tala nguvu, ni maribye ya malongo. Ku wa nga ha hi kona a makha yo kota lawa a muzinza wa le Xeba a nga nyika hosi Solomoni.

¹⁰ A malanza ya Huramu ni ya Solomoni ma lo neha kambe a nzalama ya Ofira, ma neha ni tisinya ta alguma, ni maribye ya malongo.

¹¹ A hosi yi lo maha a zitsula za yindlu ya Jehova hi tisinya ta alguma, ni zitende, ni timbila ta vayimbeleli. A ku na ngava kona a tisinya ta ku nghaho lomu tikweni ga ka Juda.

¹² Hosi Solomoni i lo nyika a muzinza wa le Xeba zontlhe lezi a nga zi lava a zi kombela, ahandle ka zinyikiwo lezi a nga mu nyika zo ringana ni lezi a ngata nazo ku ta nyika hosi. Zonake i lo suka a famba tikweni gakwe ni malanza yakwe.

A titshomba ta Solomoni.

¹³ A kutika ka nzalama leyi yi nga wata ka Solomoni lembe ni lembe ku wa hi 666 wa titalenta ta nzalama.

¹⁴ Ahandle ka leyi yi nehilweko hi Vaxavi ni vaxivisi; ni tontlhe tihosi ta le Arabia, ni tinduna ta tiko, va lo neha ka Solomoni a nzalama ni siliva.

¹⁵ Hosi Solomoni i lo maha 200 wa zitlhangu za hombe za nzalama yi tlombilweko, a xitlhangu xinwe ni xinwani xi wa tlombiwa hi 600 wa maxekeli ya nzalama;

¹⁶ i lo maha kambe a 300 wa zitlhangu za zitsongwani za nzalama yi tlombilweko; xinwe ni xinwani xi wa mahiwa hi 300 wa maxekeli ya nzalama: zonake a hosi yi lo zi veka lomu ndlwini ya Khwati ga le Lebanoni.

¹⁷ A hosi yi lo maha kambe a xitshamu xa hombe xa wuhosi hi timhonzo ta tindlovu, a xi nameketela nzalama yo saseka.

¹⁸ A xitshamu lexo xa wuhosi xi wa hi ni 6 wa zikanzihelo, ni xikhegetelo xa nzalama xa mikonzo, lexi xi tlhanganisilweko ni xitshamu xa wuhosi. Ku wa hi ni mawoko matlhelweni mambiri ya xitshamu, ni tinghala timbiri ti wa yimile laha mawokweni mambiri.

¹⁹ Ni laha matlhelweni ya zikanzihelo ya ntlhanu ni xinwe ku wa yimile 12 wa tinghala. A ku na hosi yi nga ngha yi mahelwa xilo xa ku tano.

²⁰ A zibya zontlhe za Solomoni zonwa ha zona zi wa hi za nzalama, ni zontlhe zibya za yindlu ya Khwati ga le Lebanoni zi wa hi za nzalama yo saseka. A masikwini ya Solomoni a siliva yi wa nga hlayelwi nchumu.

²¹ Hakuva hosi Solomoni i wa hi ni mataro ma nga waya le Tarxixi zinwe ni malanza ya Huramu, na mata ma neha a nzalama, ni siliva, ni timhonzo ta tindlovu, ni tifenhe, ni mapavawu.

²² Zinghaho Solomoni i lo hunza tontlhe tihosi ta misava a kufuma ni wutlhari.

²³ Tontlhe tihosi ta misava ti lo lava ku wona Solomoni ni kuzwa wutlhari gakwe, legi Nungungulu a gi vekileko mbilwini yakwe.

²⁴ Loyi ni loyi i wa neha a zinyikiwo, a zibya za siliva ni za nzalama, ni tinguwo, ni matlhari, ni makha, ni mahaxi, ni timula; va lo maha lezo lembe ni lembe.

²⁵ Solomoni i wa hi ni 4,000 wa mipatswa ya mahaxi, ni tikareta; a vakhileli va mahaxi va wa hi 12,000. I lo va veka lomu mitini ya tikareta, ni le hosini le Jerusalema.

²⁶ I wa fumela tontlhe tihosi kusukela Congweni kala le tikweni ga vaFilistia, ni le mbhinganweni wa Gipite.

²⁷ Le Jerusalema a hosi yi lo maha siliva yi ku khwatsi maribye, ni tisinya ta tisedare ti tala ku khwatsi mikuwu ya lomu nyakeni.

²⁸ Solomoni i lo nehelwa mahaxi hi le Gipite ni ka matiko vontlhe.

²⁹ A yinwani mitiro ya Solomoni, a yo sangula ni yo gumesa, yi tsalilwe lomu bhukwini ga muprofeti Natani, ni lomu bhukwini ga ziprofeto za Ahija a muXiloni, ni lomu miwonisweni ya muprofeti Iddo, loyi a vumbileko timhaka ta Jeroboamu nʼwana Nebate.

³⁰ Solomoni i lo fumela va ka Israeli vontlhe lomu Jerusalema 40 wa malembe.

³¹ Zonake i lo etlela zinwe ni vararu vakwe, va mu lahla lomu mutini wa raru wakwe Davida. A nʼwana wakwe Rehoboamu i lo fuma xikhundleni xakwe.