2 Kronekele 35 - Tshwa Bible

A Pasika ga Josia.

¹ Josia i lo maha a Pasika ga Jehova le Jerusalema. Va lo tlhava a Pasika lego hi siku ga 14 ga hweti yo sangula.

² I lo yimisa vapristi mitirweni yabye, a va tiyisa ntirweni wa yindlu ya Jehova.

³ I lo byela vaLevi lava va basisilweko va Jehova, a vagonzisi va va ka Israeli, aku: Enghenisani a arke go basa ndlwini leyi yi akilweko hi Solomoni nʼwana Davida, a hosi ya ka Israeli; ku nga ha ta kuva ni nzhwalo kambe makatleni ya nwina. Makunu khozelani Jehova Nungungulu wa nwina, ni vanhu vakwe, a va ka Israeli.

⁴ Ti longiseleni hi tiyindlu ta vadadani va nwina, hi mitlawa ya nwina, kota lezi ku tsalilweko hi Davida a hosi ya ka Israeli ni nʼwana wakwe Solomoni;

⁵ mu yima wutshanwini go basa hi tinyangwa ta tiyindlu ta vadadani ni ta vanakuloni, a vanana va vanhu, mu lanzela a mitlawa ya mingango ya vadadani va vaLevi.

⁶ Tlhavani Pasika, mu ti basisa, mu gi longisela vanakuloni, mu maha khwatsi hi mhaka ya Jehova leyi yi nyikilweko hi Mosi.

⁷ Josia i lo nyika a vanana va vanhu 30,000 wa tiyivu ni timbuti, kasi ku maha ha tona a Pasika ga vontlhe lava va nga wa hi kona laho, ni 3,000 wa tihomu ti humako zifuyweni za hosi.

⁸ A tihosana ti lo nyikela ka vanhu ni ka vapristi ni vaLevi, a minyikelo ya kuranza kabye: Hilkia, na Zakaria, na Jehieli, a tihosana ta yindlu ya Nungungulu, va lo nyika vapristi 2,600 wa tiyivu, ni 300 wa tihomu, kasi ku maha ha zona a Pasika.

⁹ Ni kambe Konania, na Xemaia, na Netaneli, ni vanakulobye, na Haxabia, na Jeieli, na Jozabada, a tihosana ta vaLevi, va lo nyika vaLevi 5,000 wa tiyivu, ni 500 wa tihomu kasi ku maha ha zona Pasika.

¹⁰ Makunu laha a ntiro wu nga wa lulamisilwe, a vapristi va lo yima matshanwini yabye, a vaLevi va yima hi mitlawa yabye, kota kuleletela ka hosi.

¹¹ Zonake va lo tlhava a Pasika, a vapristi na va kari va nwatsekela a nkhata lowu va wu amukelako mandleni ya vaLevi, a vaLevi vona va kari va sunzuwulela.

¹² Va lo veka tlhelweni a minyikelo ya kuhiswa, kasi va fela ku nyikela ka mitlawa ya tiyindlu ta vadadani va vana va vanhu, a kuva va ta nyikela ka Jehova, khwatsi hi lezi ku tsalilweko lomu bhukwini ga Mosi; va lo maha zalezo hi tihomu kambe.

¹³ Va lo woca a Pasika kota a zileletelo za yona, va bhika a nyama yi basisilweko lomu timbiteni, ni lomu mabhoteni, ni lomu mapanini, va hatlisa va yi yisa ka vanhu. Ekso. 12:8

¹⁴ Anzhako ka lezo va lo ti longisela a nyama vona wutsumbu zinwe ni vapristi, hakuva a vapristi, a vana va Aroni va wa tira ku nyikela a munyikelo wa kuhiswa ni mafura kala wusikwini, hikwalaho a vaLevi va lo ti longisela vona zinwe ni vapristi, a vana va Aroni.

¹⁵ A vayimbeleli, a vana va Asafa, va wa hi wutshanwini gabye, khwatsi hi kuleletela ka Davida, na Asafa, na Hemani, na Jedutuni a muwoni wa hosi, ni vahlayisi va tinyangwa va wa hi lomu tinyangweni tontlhe; a va sukangi mitirweni yabye, hakuva a vanakulobye, a vaLevi, va va longisele Pasika.

¹⁶ Zinghaho a ntiro wontihe wa ku khozela Jehova wu lo longiselwa lego siku wa ku maha a Pasika, ni ku nyikela a minyikelo ya kuhiswa laha alatini ga Jehova, khwatsi hi lezi hosi Josia a leleteleko.

¹⁷ Ni vanana va ka Israeli lava va nga hi kona, va loga Pasika hi lexo xikhati, va maha ni mubuzo wa zibaba zi nga hiko na comelo ntlhanu wa masiku ni mambiri.

¹⁸ Kusukela masikwini ya muprofeti Samueli cima a ku mahiwangi a Pasika go fanana ni lego lomu tikweni ga va ka Israeli; hambu lomu xikari ka tihosi ta ka Israeli, a ku na ngava ni yinwe hosi leyi yi nga maha a Pasika go fanana ni legi Josia ni vapristi ni vaLevi va gi mahileko, zinwe ni vaJuda ni vontlhe va ka Israeli lava va nga wa hi kona zinwe ni vanhu va le Jerusalema.

¹⁹ A Pasika legi gi mahilwe hi lembe ga wu 18 ga kufuma ka Josia.

A kufa ka Josia.

²⁰ Anzhako ka zontlhe lezo, laha Josia na longisile a yindlu ya Jehova. Neko, a hosi ya le Gipite, i lo kanziha le Karxemixe hi le Eufrate, a ku yalwa; na Josia i lo huma a ku yalwa naye.

²¹ Kanilezi i lo rumela mitsumi kakwe, aku: I mhaka muni yi nga kona xikari ka mina na wena hosi ya ka Juda ke? Mina a nzi telangi ku talwa na wena nyamutlha, kanilezi nzi tele a yindlu leyi nzi lwako nayo; Nungungulu i ngalo maha xihatla. Tsika ku hlomelana ni Nungungulu loyi a nga ka mina, kasi a nga ku lovisi.

²² Kanilezi Josia a nga hunzulukangi a tlhela; cima a nga ingisangi a timhaka ta Neko, leti ti humako hi le nonwini wa Nungungulu. I lota a ku talwa le nkoveni wa Megido.

²³ A vaweleli va mawura va lo fula hosi Josia; a hosi yiku ka malanza ya yona: Nzi humeseni, hakuva nzi khuvazilwe nguvu.

²⁴ Zinghaho a malanza yakwe ma lo mu tlakula ma mu humesa lomu kareteni va mu khilelisa ka yinwani kareta yakwe, va mu yisa Jerusalema. I lofa, a lahliwa xilahleni xa vadadani vakwe. A vaJuda vontlhe ni va le Jerusalema va loba nkosi va rila Josia. Zak. 12:11

²⁵ Jeremia i lo chula lisimu lo rila Josia; a vayimbeleli va xinuna ni va xisati va lo wulawula a timhaka to rila Josia lomu tisinwini tabye kala nyamutlha. Va lo ti maha xileletelo lomu ka va ka Israeli. A timhaka leto ti tsalilwe lomu bhukwini ga tisimu ta Mikosi.

²⁶ A zinwani a zimaho za Josia ni wukhozeli gakwe, khwatsi hi lezi a lanzeleko a timhaka ta nayo wa Jehova,

²⁷ ni mitiro yakwe yo sangula ni yo gumesa, zi tsalilwe lomu bhukwini ga Matimu ya tihosi ta ka Israeli ni ta ka Juda.