2 Kronekele 34 - Tshwa Bible

A zileletelo za Josia.

¹ Josia i wa hi ni 8 wa malembe a xikhati a nga sangula ku fuma; i lo fuma 31 wa malembe le Jerusalema.

² I lo maha kululama mahlweni ka Jehova, a famba hi tindlela ta dadani wakwe Davida, a nga humangi ka tona aya xibhabheni ge hambu xineneni.

³ Hakuva hi lembe ga wu 8 ga kufuma kakwe, na ha hi muswa, i lo sangula ku hlota Nungungulu wa dadani wakwe Davida. Hi lembe ga wu 12 ga kufuma kakwe i lo sangula ku basisa va ka Juda ni va le Jerusalema, a susa a tiyindlu ta matshamu ma tlakukileko, ni zifananiso za Axtarte, ni zifananiso zi vatlilweko ni lezi zi wumbilweko.

⁴ Va lo khungumula maalati ya Baali mahlweni yakwe, va fayetela ni mifananiso ya gambo leyi yi nga wa hi hehla ka wona, a fayetela ni zifananiso za Axtarte, ni zifananiso zi vatlilweko ni lezi zi wumbilweko, a zi maha tsutsungwani a wu xwanyela lomu zilahleni za lava va nga wa zi khozela.

⁵ I lo hisa marambu ya vapristi lomu ka maalati yabye, a basisa vaJuda ni Jerusalema.

⁶ Lomu mitini ya ka Manasa ni ya ka Efraime ni ya ka Simeoni, kala le Naftali, kwalomu marumbini ya kona ka matlhelo wontihe, i lo khungumulela maalati,

⁷ a fayetela zifananiso za Axtarte, ni zifananiso zi vatlilweko a zi maha tsutsungwani, a tsema zifananiso za gambo lomu tikweni gontlhe ga ka Israeli; zonake i lo tlhelela Jerusalema.

⁸ Makunu hi lembe ga wu 18 ga kufuma kakwe, i lo ruma Xafani nʼwana Azalia, na Maaseia a nduna ya muti, na Joa nʼwana Joahaza a mutsali wa timhaka, a ku basisa vanhu ni yindlu ya Jehova Nungungulu wakwe.

⁹ Vona va lota ka Hilkia a mupristi wa hombe va ta nyikiwa mali leyi yi nga wa nehiwa lomu ndlwini ya Nungungulu, leyi a vaLevi, a vahlayisi va nyangwa, va nga wa yi hlengeletele mandleni ya va ka Manasa ni va ka Efraime, ni ka yontlhe misalela ya ka Israeli, ni ya ka Juda, ni ya ka Benjamini, ni vanhu va le Jerusalema.

¹⁰ Va lo yi nyikela mandleni ya lava va khomileko ntiro, lava va yimisilweko a kuva vahlayisi va ntiro lomu ndlwini ya Jehova, a ku yi sasisa ni ku yi aketa.

¹¹ Va lo yi nyikela ka vavatli ni vaaki, kasi ku xava maribye ma vatlilweko, ni tisinya ta mitiro ya ku akisa ni ku sasisa, ni ta zipimbitsi za tiyindlu leti ti nga wa tsemelelwe hi tihosi ta ka Juda.

¹² A vavanuna lavo va lo tira hi kutsumbeka. A vahlayisi vabye ku wa hi Jahate, na Obadia, a vaLevi xikari ka vana va Merari; na Zakaria, na Mexulamu, a vazukulu va Kohate, a ku susumeta ntiro. A vaLevi vontlhe va wa tiva ku yimbelela hi wucenje.

¹³ Vonawu va wa hi vahlayisi va varwali va minzhwalo, ni vatirisi va vontlhe lava va khomako ntiro wa tontlhe tixaka ta mitiro; lomu xikari ka vaLevi ku wa hi ni vatsali, ni vahloti, ni vahlayisi va tinyangwa.

A kukumiwa ka Bhuku ga Nayo.

¹⁴ Laha na va ha humesa a mali leyi yi nga wa nehilwe lomu ndlwini ya Jehova, mupristi Hilkia i lo thumba a Bhuku ga Nayo wa Jehova lowu wu nyikilweko hi Mosi.

¹⁵ Hilkia i lo hlamula aku ka Xafani a mutsali: Nzi thumbile a bhuku ga nayo lomu ndlwini ya Jehova; Hilkia i lo nyikela a bhuku ka Xafani.

¹⁶ Xafani i lo neha a bhuku ka hosi, a ta yi byela lezaku: Zontlhe lezi u nga leletela malanza ya wena ma zi mahile.

¹⁷ Va humesile a mali leyi yi kumilweko ndlwini ya Jehova, va yi nyikela mandleni ya vatirisi va mitiro ni vakhomi va yona.

¹⁸ Ni kambe Xafani a mutsali i te ngalo ka hosi: Mupristi Hilkia i nzi nyikile a bhuku. Zonake Xafani i lo gi gonza mahlweni ka hosi.

¹⁹ Laha a hosi yi nga wa zwile a timhaka ta nayo, yi lo hanzula a tinguwo ta yona.

²⁰ Yi lo leletela Hilkia na Ahikamu nʼwana Xafani, na Abdoni nʼwana Mika, na Xafani a mutsali, na Asaya a nanza ga hosi, yiku:

²¹ Fambani mu ya nzi wutisela ka Jehova, mu wutisela ni misalela ya ka Israeli ni ya ka Juda xungetano ni timhaka ta bhuku legi gi thumbilweko, hakuva a zanga ya Jehova hehla ka hina nja hombe nguvu, hakuva a vadadani va hina a va hlayisangi a timhaka ta Jehova ni ku maha zontlhe kota lezi zi tsalilweko bhukwini legi.

²² Zinghaho Hilkia ni lava va hlawulilweko hi hosi va loya ka Hulda a muprofeti wa xisati, a kata Xaluma nʼwana Tokhate wa Hasra, a muhlayisi wa tinguwo, a nga wa akile Jerusalema hi tlhelo ginwani ga muti, va lo ya mu hlawutela timhaka leto.

²³ Yena i te ngalo kabye: Lezi a wulako Jehova Nungungulu wa ka Israeli i ngalo: Fambani mu ya byela a munhu loyi a nga mu ruma kuta laha ka mina, muku:

²⁴ Jehova i ngalo: Nzi ta neha a hlomulo hehla ka wutshamu legi ni hehla ka vanhu va kona, yontlhe a nzhukano leyi yi tsalilweko lomu bhukwini legi va gi gonzileko mahlweni ka hosi ya ka Juda. Levi 26:14; Deut. 28:15

²⁵ Hakuva vona va nzi tsikile, va ya hisela vanwani vanungungulu a tibani, va nzi zangarisa hi mitiro yontlhe ya mandla yabye; hikwalaho a zanga ya mina ya vurela legi wutshamu; cima yi nga ta timeka.

²⁶ Kanilezi hi tlhelo ga hosi ya ka Juda leyi yi mu rumileko ku ta wutisa ka Jehova, mu ta ya wula lezi ka yona: Jehova Nungungulu wa ka Israeli, xungetano ni timhaka u ti zwileko, i ngalo:

²⁷ Kota lezi a mbilu ya wena yi olovileko, u ti koramisa mahlweni ka Nungungulu a siku legi u ngazwa a timhaka takwe xungetano ni wutshamu legi ni vanhu va kona, u hanzula a tinguwo ta wena u rila mahlweni ka mina, mina nzi ku zwile, ku wula Jehova.

²⁸ Nzi ta ku tlhanganyisa ni vararu va wena, u lahliwa nkeleni wa wena; a mahlo ya wena ma nga ta wu wona wontihe a hlomulo lowo nzi ta nga wu neha wutshanwini legi ni ka vanhu va gona. Va lo yisa timhaka leto ka hosi.

²⁹ Zonake a hosi yi lo tsombanyisa wontihe masingalakati ya ka Juda ni ya Jerusalema;

³⁰ yi kanziha le ndlwini ya Jehova zinwe ni vahombe vontlhe va ka Juda ni vaaki va le Jerusalema, ni vapristi, ni vaLevi, ni vanhu vontlhe, vahombe ni vatsongwani; yi lo gonza tindleveni ta vanhu vontlhe a timhaka tontlhe ta bhuku ga xivumelwano legi gi thumbilweko lomu ndlwini ya Jehova.

³¹ A hosi yi lo yima wutshanwini ga yona yi maha xivumelwano mahlweni ka Jehova ku lanzela Jehova ni ku hlayisa milayo yakwe, ni wukustumunyu gakwe, ni zileletelo zakwe, hi mbilu yakwe yontlhe, ni muhefemulo wakwe wontihe, ni ku lanzela a timhaka ta xivumelwano leti ti tsalilweko lomu bhukwini.

³² I lo enghenisa lomu ka xivumelwano vontlhe lava va nga wa hi le Jerusalema, ni lomu tikweni ga ka Benjamini; a vanhu va le Jerusalema va lo lanzela a xivumelwano xa Nungungulu wa vadadani vabye.

³³ Josia i lo susa a manyala wontihe ya matiko wontihe ya vanana va ka Israeli, a maha vontlhe lava va nga wa hi tikweni ga ka Israeli va khozela Jehova Nungungulu wabye. Masikwini yakwe wontihe cima a va fularelangi Jehova Nungungulu wa vadadani vabye.