2 Kronekele 33 - Tshwa Bible

Manasa a fumela Juda.

¹ Manasa i wa hi ni 12 wa malembe a xikhati a nga sangula ku fuma; i lo fuma 55 wa malembe le Jerusalema,

² I lo maha kubiha mahlweni ka Jehova, a lanzela manyala ya matiko lawa Jehova a nga ma hlongola mahlweni ka va ka Israeli.

³ Hakuva yena i lo aka kambe a matshamu ma tlakukileko, lawa a raru wakwe Hezekia a nga wa ma khungumule; i lo engeta a aka a alati ga Baali, a maha zifananiso za Axtarte, a khizamela wontihe mabandla ya tilo a ma tirela.

⁴ I lo aka a maalati lomu ndlwini ya Jehova, leyi yena Jehova a nga ku ngalo: A vito ga mina gi ta tshama lomu Jerusalema kala kupinzuka. Deut. 12:5; 2 Sam. 7:10, 13

⁵ I lo aka a maalati ya wontihe mabandla ya tilo lomu ka mahubye mambiri ya yindlu ya Jehova.

⁶ Ni kambe i lo enghenisa a vanana vakwe va xinuna nzilweni, le nzhelelweni wa vanana va ka Hinome. I lo ti nyiketela ka vanyamusolo, ni ka vangoma, ni ka zitumbe, a hlengela zinwe ni lava va mimoya yo biha ni yaloyi; i lo maha kubiha ko hunzeleta mahlweni ka Jehova, a mu zangarisa.

⁷ I lo yimisa a xifananiso xi vatlilweko, lexi a nga xi maha yena, lomu ndlwini ya Nungungulu, leyi Nungungulu a ngaku ka Davida ni ka nʼwana wakwe Solomoni: Ndlwini leyi ni mutini lowu nzi wu hlawuleko xikari ka tontlhe tixaka ta va ka Israeli, nzi ta veka a vito ga mina kala kupinzuka.

⁸ Cima nzi nga ta ha susa kambe a mikonzo ya va ka Israeli lomu tikweni legi nzi gi hlawuleleko vararu va nwina, loku futsi va chivirika va maha zontlhe lezi nzi va leleteleko zona, va hlayisa yontlhe milayo, ni timhaka, ni ziyimiso, lezi zi leletelweko hi Mosi.

⁹ Makunu Manasa i lo hambukisa va ka Juda ni vanhu va le Jerusalema, va maha kubiha ku hunza ni matiko lawa Jehova a ma lovisileko mahlweni ka va ka Israeli.

¹⁰ Jehova i lo wulawula ka Manasa zinwe ni vanhu vakwe, kanilezi cima a va ingisangi.

¹¹ Hikwalaho Jehova i lo va nehela vanhu va ta va vukela, ti nga tinduna ta tiyimpi ta hosi ya Assiria, ti ta khoma Manasa, ti mu boha hi mangenje ya suku, va mu yisa le Babuloni. Deut. 28:36; 2 Tih. 20:17

¹² Laha a nga wa hi lomu tikhuruxwini, i lo khongela mahlweni ka Jehova Nungungulu wakwe, a ti koramisa nguvu mahlweni ka Nungungulu wa vadadani Vakwe.

¹³ Laha a nga wa khongela, Nungungulu i lo ingisa mukhongelo wakwe, a mu tlhelisela kambe Jerusalema mufunweni wakwe; hikwalaho Manasa i lo zi tiva lezaku Jehova hi yena Nungungulu.

¹⁴ Anzhako ka lezo i lo aka ligingisi la lehandle hi le Mupela-gambo wa muti wa Davida, hi tlhelo ga Gihoni le nzhelelweni, kala le nyangweni ya zidluwani, a renzelekela ha lona Ofeli, a li lehisa nguvu; i lo veka a tinduna ta tiyimpi lomu mitini yontlhe ya makhokhola ya va ka Juda.

¹⁵ I lo susa a vanungungulu va vamatiko lomu ndlwini ya Jehova, ni zifananiso, ni maalati wontihe lawa a nga wa ma akile xitsungeni xa yindlu ya Jehova ni Jerusalema, a zi hoxa lahandle ka muti.

¹⁶ I lo akisa a alati ga Jehova, a nyikela hehla ka gona a miphahlelo ya kurula ni ya kubonga, a leletela va ka Juda a ku khozela Jehova Nungungulu wa ka Israeli.

¹⁷ Kanilezi a vanhu a va tsikangi a ku phahlela lomu zitsungeni; ntsena lezaku va wa phahlela kona Jehova Nungungulu wabye.

¹⁸ A zinwani zimaho za Manasa, ni mukhongelo wakwe ka Nungungulu wakwe ni timhaka ta vawoni lava va wulawulileko ka yena vitweni ga Jehova Nungungulu wa ka Israeli, zi tsalilwe lomu bhukwini ga Matimu ya tihosi ta ka Israeli.

¹⁹ A mukhongelo wakwe ni ku hlamuliwa ka wona, ni kuonha kakwe, ni kuhambuka kakwe, ni wutshamu legi a akileko ka gona a matshamu ma tlakukileko, ni laha a nga yimisa kona a zifananiso za Axtarte, ni zifananiso zi vatlilweko, na a nga se ti koramisa, zi tsalilwe lomu ka matimu ya vawoni.

²⁰ Zinghaho Manasa i lo etlela ni vararu vakwe, va mu lahla lomu ndlwini yakwe. Zonake a nʼwana wakwe Amoni i lo fuma xikhundleni xakwe.

Amoni a fumela Juda.

²¹ Amoni i wa hi ni 22 wa malembe a xikhati a nga sangula ku fuma; i lo fuma malembe mambiri le Jerusalema.

²² I lo maha kubiha mahlweni ka Jehova, khwatsi hi lezi a mahileko a raru wakwe Manasa, a phahlela zifananiso zontlhe zi mahilweko hi raru wakwe, a zi khizamela.

²³ Cima a nga ti koramisangi mahlweni ka Jehova, kota a raru wakwe Manasa a nga wa ti koramisile; kanilezi i lo hunzeleta kuonheni.

²⁴ Zonake a malanza yakwe ma lo maha xikungo xo mu vukela, ma mu daya lomu ndlwini yakwe.

²⁵ Kanilezi a vanhu va ka Juda va lo daya vontlhe lava va nga maha xikungo xo vukela hosi Amoni; zonake a vanhu va tiko va lo yimisa nʼwana wakwe Josia a kuva hosi xikhundleni xakwe.