2 Kronekele 31 - Tshwa Bible

A zileletelo za Hezekia.

¹ Makunu laha zontlhe lezi zi nga wa mbhetekile, vontlhe va ka Israeli lava va nga wa hi kona va lo suka vaya mitini ya va ka Juda va ya fayetela zifananiso, va tsema matshamu ya zifananiso za Axtarte, va khungumula matshamu ma tlakukileko ni maalati tikweni gontlhe ga va ka Juda ni ga ka Benjamini, ni ga ka Efraime, ni ga va ka Manasa kambe, va kala va mbheta zontlhe. Zonake vontlhe va ka Israeli va lo tlhelela mitini yabye.

² Hezekia i lo yimisa mitlawa ya vapristi ni va ka Levi lomu mitirweni yabye, munwe ni munwani hi ntiro wakwe, a vapristi ni vaLevi va wa fanele ku nyikela a munyikelo wa kuhiswa ni wa kubonga, ni ku khoma ntiro, ni ku dumisa Jehova, ni ku yimbelela lomu tinyangweni ta wugovelo ga Jehova. Levi 8:35; Mitse. 4:3

³ Ni kambe i lo yimisa a xiavelo xa hosi xi humako tshombeni yakwe, xi maha xa muphahlo wa kuhiswa wa mixo ni gambo, ni wa masabado ni wa kusanguleni ka hweti, ni wa mibuzo, khwatsi hi lezi zi tsalilweko nayweni wa Jehova.

⁴ Kambe i lo leletela a vanhu va tiko, a vaaki va Jerusalema, a ku nyika xiavelo xa vapristi ni vaLevi, xiva xiavelo xabye kasi va kuma ntamu ku namarela nayweni wa Jehova.

⁵ Zalezo laha a xileletelo na xi tiyisilwe, a va ka Israeli va lo humesa mihanzu yinyingi yo ranga ya mavele, ni ya vinya, ni ya mafura, ni ya wulombe, ni ya mihanzu yontlhe ya masimu; va lo neha mihanzu yinyingi ya za wukhume.

⁶ A va ka Israeli ni va ka Juda lava va akileko lomu mitini ya va ka Juda, vonawu va lo neha za wukhume ga zifuyo za hombe ni za zitsongwani, ni za wukhume ga zilo zi basiselweko Jehova Nungungulu wabye, va maha tinhulu ha zona.

⁷ Va lo sangula ku zi tsombanyisela hi hweti ya wunharu, va mbheta hi hweti ya wu 7.

⁸ Hezekia ni tihosana va lota va ta wona tinhulu leto, va bonga Jehova ni vanhu vakwe, a va ka Israeli.

⁹ Zonake Hezekia i lo wutisa a vapristi ni vaLevi xungetano hi tinhulu leto.

¹⁰ Azaria, a mupristi wa hombe wa yindlu ya ka Zadoke, i lo hlamula, aku kakwe: Kusukela xikhatini lexo va sanguleko ha xona, ku neha mihlengo lomu ndlwini ya Jehova, hi gile, hi xura, hi tlhela hi siya zinyingi, hakuva Jehova i katekisile a vanhu vakwe; ni lezi zi seleko hi zona zi teleko nguvu.

¹¹ Zonake Hezekia i lo leletela a kuva ku longiswa tikwaruto lomu ndlwini ya Jehova; va maha lezo.

¹² Va lo neha a mihlengo, ni za wukhume, ni zilo zi basisilweko hi kukholeka. Konania a muLevi i wa hi muhlayisi wa zona; a nakulobye Ximei i wa hi muvuni wakwe.

¹³ Jehieli na Azazia na Nahate na Asaheli na Jerimote na Jozabada na Eliela na Ixmakia na Mahate na Benaia, va wa hlawulwe a kuva vahlayisi na va hi lahasi ka Konania ni nakulobye Ximei, khwatsi hi kuleletela ka hosi Hezekia na Azaria, a murangeli wa yindlu ya Nungungulu.

¹⁴ Kore nʼwana Imna a muLevi, a muhlayisi wa nyangwa ya tlhelo ga Muhuma-gambo, i wa hi muhlayisi wa minyikelo leyi yi nyikelwako ka Nungungulu hi liranzo la matsenya, ni ku avela a mihlengo leyi yi nyikelwako ka Jehova ni zilo lezi zi basisilweko nguvu.

¹⁵ I wa lanzelwa hi Edeni, na Miniamini, na Jexua, na Xemaia, na Amaria, na Xekania, lava va nga wa vekilwe lomu mitini ya vapristi, na va hi vo tsumbeka ku avela vanakulobye, a vahombe ni vatsongwani, hi mitlawa yabye.

¹⁶ Ahandle ka vanana va vavanuna lava va tsalilweko hi mavito, kusukela ka va malembe manharu kuya mahlweni; vontlhe lava va enghenako ndlwini ya Jehova hi ntiro wa siku ginwe ni ginwani, kotisa mitiro yabye hi mitlawa yabye,

¹⁷ Ni lava va tsalilweko va vanana va vapristi, hi tiyindlu ta vararu vabye, a vaLevi va 20 wa malembe ni ku hunza; va ringanyiselwe mitiro yabye hi mitlawa yabye.

¹⁸ A tlhangano wontihe wu wa fanele ku tsaliwa ni vana vabye va vatsongwani, ni vasati vabye, ni vafana ni vanhanyana vabye, hakuva va wa tsumbekile a ku ti basisela ntiro lowo.

¹⁹ Kasike a vana va Aroni, a vapristi lava va akileko lomu masinwini, lomu matlhelweni ya miti yabye, ku wa hi ni vanhu lava va kumbukilweko hi mavito yabye va nga wa rumilwe ka muti ni muti, a ku nyikela xiavelo ka vontlhe vavanuna xikari ka vapristi, ni vontlhe va ka Levi lava va tsalilweko.

²⁰ Hi lezo Hezekia a nga wa maha lomu tikweni gontlhe ga va ka Juda; i lo maha kusasa ni kululama ni nongameto mahlweni ka Jehova Nungungulu wakwe,

²¹ Ni wihi ntiro a nga wu sangula wa yindlu ya Nungungulu, a wa nayo, ni wa zileletelo, kasi ku hlota Nungungulu wakwe, i lo ti tsitsirita hi mbilu yakwe yontlhe; hikwalaho i lo vuvuma.