2 Kronekele 30 - Tshwa Bible

A Pasika ga Hezekia.

¹ Hezekia i lo rumela mhaka ka vontlhe va ka Israeli ni va ka Juda, a tsalela kambe ni va ka Efraime ni va ka Manasa, a va ramba a kuta ndlwini ya Jehova le Jerusalema, va ta maha a Pasika ga Jehova Nungungulu wa va ka Israeli.

² A hosi zinwe ni tinduna ta yona ni tlhangano wontihe, va lo tiyisa le Jerusalema lezaku a Pasika gi ta mahiwa hi hweti ya wumbiri; Ekso. 12:2; Mitse. 9:10

³ hakuva va wa nga zi koti ku yi maha lexo xikhati hi kota ya lezi, a vapristi lava va nga wa ti basisile a tsengo wabye wu wa nga eneli, hambu ni vanhu va wa nga se nga tsombana le Jerusalema.

⁴ A timhaka leto ti wa sasekile mahlweni ka hosi ni mahlweni ka wontihe tlhangano.

⁵ Zinghaho va lo yimisa xikungo lexo xa ku tivisa lomu tikweni gontlhe ga ka Israeli, kusukela le Berexeba kala le Dani, lezaku vata le Jerusalema a ku ta maha Pasika ga Jehova Nungungulu wa ka Israeli, hakuva ku wa hunzile malembe yo tala na va nga yi mahangi, khwatsi hi lezi ku layilweko.

⁶ Zinghaho a mitsukano yi lo fambafamba lomu tikweni gontlhe ga va ka Israeli ni ga va ka Juda ni mapapilo ya hosi ni ya tinduna takwe, va hlawutela kota kuleletela ka hosi, vaku: Va ka Israeli, tlhelelani ka Jehova Nungungulu wa Abrahama na Isaka na Israeli, kasi yenawu a fela ku tlhelela ka misalela leyi yi ponileko xikari ka nwina mandleni ya tihosi ta vaAssiria. Mal. 3:7

⁷ Mu nga mahi kota lezi va mahileko vararu va nwina ni vanakuloni lava va ti tsimbetelako ka Jehova Nungungulu wa vadadani vabye, kala va ti nyikela timhangweni khwatsi hi lezi mu zi wonako.

⁸ Makunu nwina mu nga nonohisi tinhamu ta nwina, khwatsi hi vadadani va nwina; khomani a canja ga Jehova, muta ndlwini yakwe yo basa a yi basisileko kala kupinzuka, mu ta khozela Jehova Nungungulu wa nwina, kasi a zanga yakwe yo tshisa yi fela ku Suka ka nwina.

⁹ Hakuva loku nwina mu tlhelela ka Jehova, a vanakuloni ni vana va nwina va tava ni thomo mahlweni ka lava va va khomileko va yiswa wukhumbini, va ta wuyiswa lomu tikweni legi, hakuva Jehova Nungungulu wa nwina i tele hi tipswalo ni wuxinji; cima a nga ta mu fularela loku mu tlhelela ka yena.

¹⁰ Zinghaho a mitsukano yi lo famba ka muti ni muti lomu tikweni ga ka Efraime ni ga ka Manasa kala va chikela le Zebuloni; kanilezi va lo va hleka va va tseketsela.

¹¹ Hambu lezo, a vanwani va ka Axeri ni va ka Manasa ni va ka Zebuloni va lo ti koramisa vata Jerusalema.

¹² A canja ga Jehova gi wa hi zinwe ni vanhu va tiko ga ka Juda, gi va nyika a mbilu yinwe ya ku maha khwatsi hi lezi a hosi ni tihosana va leleteleko hi gezu ga Jehova.

¹³ Ku lo tsombana a vanhu vo tala le Jerusalema a ku ta maha mubuzo wa zibaba zi nga hiko na comelo hi hweti ya wumbiri; wu wa hi mutlhangano wa hombe nguvu,

¹⁴ Va lo sangula ku susa a maalati lawa ma nga wa hi le Jerusalema, va susa ni maalati ya ku hisela tibani, va ma hoxa le xicongwaneni xa Kidroni.

¹⁵ Zonake va lo tlhava a Pasika hi siku ga 14 ga hweti ya wumbiri. A vapristi ni va ka Levi va wa hi ni tingana, va ti basisa wutsumbu gabye, va neha a minyikelo ya kuhiswa ndlwini ya Jehova.

¹⁶ Va lo yima wutshanwini gabye khwatsi hi lezi ku leletelweko nayweni wa Mosi, a munhu wa Nungungulu. A vapristi va nwatsekela a nkhata lowu va nga wu amukela mandleni ya va ka Levi.

¹⁷ Hakuva ku wa hi ni vanhu vo tala laha tlhanganweni lava va nga kala va nga ti basisangi; hikwalaho a va ka Levi va lo va tlhavela a miphahlelo ya Pasika na va basisela Jehova vontlhe lava va nga hlazekangiko.

¹⁸ Hakuva a wunyingi ga vanhu va tiko, va ka Efraime ni va ka Manasa ni va ka Isakari ni va ka Zebuloni, va wa nga ti basisangi; kanilezi va gile a Pasika na ku nga hi ku lanzela lezi zi tsalilweko. Hakuva Hezekia i lo va khongelela, aku:

¹⁹ Jehova wa wuxinji, a tsetselele vontlhe lava va tiyisileko timbilu tabye a ku hlota Nungungulu Jehova, a Nungungulu wa vadadani vabye, hambu loku a nga basiswangi hi ku faneleko lomu ndlwini ya ku basa.

²⁰ Jehova i lo ingisa Hezekia, a tsetselela vanhu.

²¹ A va ka Israeli lava va nga wa hi le Jerusalema va lo maha mubuzo wa zibaba zi nga comelwangiko lomu ka ntlhanu wa masiku ni mambiri, na va tsakile nguvu; ni va ka Levi zinwe ni vapristi va lo dumisa Jehova hi wucenje ga hombe siku ni siku, va yimbelela ka Jehova,

²² Hezekia i lo wulawula timhaka to tangalisa ka vaLevi vontlhe lava va va tlharihileko ntirweni wa kukhozela Jehova. Va loga lezi zi leletelweko ntlhanu wa masiku ni mambiri, na va kari va tlhava miphahlo ya kubonga, na va dumisa Jehova Nungungulu wa vadadani vabye.

²³ Wontihe a tlhangano wu lo maha xikungo xa kuva va maha kambe a mubuzo ka manwani masiku ya ntlhanu ni mambiri; zinghaho va lo wu maha hi kutsaka hi manwani masiku ya ntlhanu ni mambiri.

²⁴ Hakuva Hezekia, a hosi ya va ka Juda, i wa nyikile a tlhangano 1,000 wa tikuzi, ni 7,000 wa tiyivu; ni kambe a tihosana ti wa nyikile a tlhangano 1,000 wa tikuzi, ni 10,000 wa tiyivu; a vapristi vanyingi va lo ti basisa.

²⁵ Wontihe tlhangano wa va ka Juda, ni vapristi ni vaLevi, ni vontlhe lava va humako tikweni ga ka Israeli ni valuveli va kona, ni vaaki va lomu tikweni ga ka Juda, va lo tsaka.

²⁶ Ku wa hi ni kutsaka ka hombe lomu Jerusalema, hakuva kusukela masikwini ya Solomoni nʼwana Davida, a hosi ya va ka Israeli, a ku na ngava ni zilo zo kota lezo lomu Jerusalema.

²⁷ Zonake a vapristi va nga vaLevi, va lo suka va katekisa vanhu, ni gezu gabye gi lo ingiswa; a mukombelo wabye wu lo chikela wutshanwini ga Jehova go basa le tilweni.