2 Kronekele 3 - Tshwa Bible

Kuakwa ka tempeli.

¹ Zonake Solomoni i lo sangula ku aka a yindlu ya Jehova le Jerusalema, laha xitsungeni xa Moria, laha Jehova a nga woneka ka raru wakwe Davida, le nzhimbyeni wa Ornani a mujebusi, a wutshamu gi longisilweko hi Davida.

² I lo sangula ku aka hi siku ga wumbiri ga hweti ya wumbiri ya lembe ga wumune ga kufuma kakwe.

³ A tipimo ta ziseketelo lezi Solomoni a nga wa zi akile za yindlu ya Nungungulu, hi leti: a kuleha hi lipimo la kale, ku wa hi 60 wa mikono, a kuanama ku wa hi 20 wa mikono.

⁴ A nyangwa leyi yi nga wa mahlweni ka yindlu: a kuanama ka yona ku wa hi 20 wa mikono, ku fanana ni kuanama ka yindlu; a kutlakuka ka yona ku wa hi 120 wa mikono. Nzeni ka yona i wa nameketele nzalama yo saseka.

⁵ I lo fulela a yindlu leyo ya hombe hi mapulango ya tisinya ta kipres a wuya a nameketela a nzalama yo saseka, a tlhela a sasisela hi ku kehlela a micinzu ni tiketani.

⁶ I lo bombisa a yindlu hi maribye yo saseka. A nzalama ya kona yi wa hi ya le Parvaime.

⁷ Zonake a yindlu, ni timhanze, ni zipimbitsi, ni khurisi, ni tivati i lo zi nameketela nzalama, a tlhela a kehlela makerubima lomu makhurisini.

⁸ I lo aka ni yindlu ya kubasabasa: a kuleha ka yona ku wa ringana ni kuanama ka yona, ku wa hi 20 wa mikono; ni kuanama ka yona ku wa hi 20 wa mikono. I lo yi nameketela a nzalama yo saseka ya tsengo wa 600 wa titalenta.

⁹ A kutika ka tikhokho ku wa hi 50 wa maxekeli ya nzalama. Ni tikwarutu ta le hehla i lo ti nameketela nzalama.

¹⁰ Lomu ndlwini ya kubasabasa i lo maha makerubima mambiri ma kehletelweko, ma nameketelwa nzalama.

¹¹ A kuleha ka tipapa ta wona ku wa hi 20 wa mikono. A lipapa linwe li wa chikela le khurisini ga yindlu, a kuleha ka lona na li hi ntlhanu wa mikono; ni linwani lipapa la ntlhanu wa mikono li wa tlhangana ni la ginwani kerubima,

¹² a linwe lipapa la ginwani kerubima la ntlhanu wa mikono li chikela ka ginwani khurisi ga yindlu; a linwani la ntlhanu wa mikono li chikela tipapeni la ginwani kerubima.

¹³ A kunavalata ka tipapa ta makerubima lawo ku lo tlhavinyetana ku maha 20 wa mikono, na ma yimile hi mikonzo ya wona, a tinghohe ta wona na ti cuwukile a yindlu.

¹⁴ I lo maha a veli yo valala ni kuzirila ni kupswhuka, hi wukene go saseka, a tsala a makerubima laha ka yona. Ekso. 26:30

¹⁵ Le mahlweni ka yindlu i lo maha timhanze timbiri leti kuleha ka tona ti nga wa hi 35 wa mikono; a tihloko leti ti nga wa hi hehla ka tona ti hi ntlhanu wa mikono.

¹⁶ I lo maha tiketani ta wutshamu ga kubasabasa, a ti veka ni le tichokeni ta timhanze. I lo maha a 100 Wa mapomegranada lomu ka tiketani.

¹⁷ Zonake i lo yimisa a timhanze le mahlweni ya yindlu, yinwe hi tlhelo ga xinene a yinwani hi tlhelo ga xibhabha; leyi ya tlhelo ga xinene i lo yi chula vito ga Jakina, a ya tlhelo ga xibhabha a yi chula vito ga Boazi.