2 Kronekele 29 - Tshwa Bible

Hezekia a basisa tempeli.

¹ Hezekia i lo sangula ku fuma na hi ni 25 wa malembe; i lo fuma 29 wa malembe le Jerusalema. A vito ga nyine wakwe i wa hi Abija nʼwana Zakaria.

² I lo maha kululama mahlweni ka Jehova a lanzela tindlela tontlhe ta raru wakwe Davida.

³ Hi lembe go ranga ga kufuma kakwe, hi hweti yo sangula, i lo vulula a tivati ta yindlu ya Jehova, a ti lulamisa.

⁴ I lo vitana a vapristi ni va ka Levi, a va tsombanyisa wutshanwini go anama hi tlhelo ga Muhuma-gambo.

⁵ Aku kabye: Nzi ingiseni nwina vaLevi! Ti basiseni makunu, mu basisa ni yindlu ya Jehova Nungungulu wa vararu va nwina, mu humesa a zilo za manyala lahandle ka wutshamu go basa!

⁶ Hakuva a vadadani va hina va gohile, va maha kubiha mahlweni ka Jehova Nungungulu wa hina, va mu tsika va hunzuluka tinghohe tabye va nga cuwuki a yindlu ya Jehova, va yi fularela.

⁷ Va valile ni tivati ta nyangwa ya hombe, va tima tikandiya; cima a va hisangi tibani, hambu ni ku nyikela muphahlo wa kuhiswa laha wutshanwini go basa ga Nungungulu wa ka Israeli.

⁸ Hikwalaho Jehova i zangarele Juda ni Jerusalema, a va nyikela kundlengandlengisweni, va hlokiswa ni ku chepetwa, khwatsi hi lezi mu zi wonako hi mahlo ya nwina. Deut. 28:25

⁹ Hi kota ya lezo a vararu va hina va delwe hi matlhari; ni vafana ni vanhanyana va hina ni vasati va hina va le wukhumbini.

¹⁰ Makunu mina nzi xuva ku maha xivumelwano na Jehova, Nungungulu wa ka Israeli, kasi a zanga yakwe yo chaviseka ya suka ka hina.

¹¹ Makunu vana vanga, mu nga mahi mihoni, hakuva Jehova i mu hlawule a ku yima mahlweni kakwe mu mu khozela, ni kuva malanza yakwe mu mu hisela tibani.

¹² Zonake a vaLevi va lo Suka; hi Mahate nʼwana Amasai, na Joeli nʼwana Azaria, a vana va vaKohate; a vana va Merari hi Kixi nʼwana Abdi, na Azaria nʼwana Jehalelela; a va ka Gerxoni hi Joa nʼwana Zimma, na Edeni nʼwana Joa;

¹³ a va ka Elizafana hi Ximri na Jeueli; a va ka Asafa hi Zakaria na Matania;

¹⁴ a va ka Hemani hi Jehueli na Ximei; a va ka Jedutuni hi Xemaia na Uzieli.

¹⁵ Va lo tsombanyisa vanakulobye, va ti basisa, zonake vata khwatsi hi kuleletela ka hosi, kota kuwula ka Jehova, va ta basisa a yindlu yakwe.

¹⁶ A vapristi va lo enghena lomu ndlwini ya Jehova va yi basisa; va lo humesa a chaka gontlhe gi kumekileko lomu ndlwini ya Jehova gita laha hubyeni ga yindlu ya Jehova, zonake a va ka Levi va lo gi teka va ya gi hoxa le handle le xicongwaneni xa Kidroni.

¹⁷ Va lo sangula a ntiro wa ku basisa hi siku go ranga ga hweti yo sangula, hi siku ga wu 8 ga hweti va lo enghena lomu nyangweni ya Jehova; va lo basisa a yindlu ya Jehova hi 8 wa masiku. Zonake hi siku ga 16 ga hweti leyo yo sangula, va lo mbheta.

¹⁸ Zonake va lo enghena lomu ndlwini ya hosi Hezekia, vaku: Hi phuhunhile yontlhe yindlu ya Jehova ni alati ga miphahlo, ni zontlhe a zibya za gona, ni meza ya zibaba za xikombiso, ni zontlhe zibya za yona.

¹⁹ Ni zontlhe zibya lezi zi nga nyenyeziswa hi hosi Ahaza xikhatini xa kufuma xakwe, laha yena a nga wa ti alisa, hina hi zi lulamisile hi zi basisa; zi le mahlweni ka alati ga Jehova.

²⁰ Zonake hi siku gi gamelako, hosi Hezekia i lo vuka ni mixo a tsombanyisa a tihosana ta muti, a kanziha le ndlwini ya Jehova.

²¹ Va lo neha 7 wa tikuzi, ni 7 wa tihamba, ni 7 wa tiyivana, ni 7 wa timhongo, va maha miphahlelo ya ku susa zionho za mufumo ni za wutshamu go basa, ni za ka Juda. A hosi yi lo leletela a vapristi, a vana va ka Aroni, a ku zi tlhava laha alatini ga Jehova. Levi 4:14

²² Zinghaho va lo tlhava tikuzi, a vapristi va hlengeletela a nkhata va nwatsekela ha wona a alati; va lo tlhava tihamba kambe va nwatsekela a alati hi nkhata wa kona; va tlhava tiyivana va nwatsekela kambe a alati hi nkhata wa kona. Levi 8:15, 19, 24; Maheb. 9:21

²³ Va lo neha kambe a timhongo ta muphahlelo wa kuonha laha mahlweni ka hosi ni mahlweni ka tlhangano, va tlhateka a mandla yabye hehla ka tona.

²⁴ Zonake a vapristi va lo ti tlhava, a nkhata wa tona va chela hehla ka alati, kasi ku maha a nzhiho wa zionho ni kuva muphahlo wa zionho za vanhu vontlhe va ka Israeli, hakuva a hosi yi lo leletela lezaku a muphahlo wa kuhiswa ni wa zionho wu ta nyikelelwa vontlhe va ka Israeli.

²⁵ I lo yimisa vaLevi lomu ndlwini ya Jehova, na va hi ni tingoma, ni zitende ni timbila, khwatsi hi kuleletela ka Davida na Gadi a muwoni wa hosi, na muprofeti Natani, hakuva a xileletelo xi wata hi ka Jehova hi vaprofeti vakwe.

²⁶ A vaLevi va lo yima na va hi ni wucenje ga Davida, a vapristi na va hi ni mipunzu.

²⁷ Hezekia i lo leletela ku nyikela muphahlo wa kuhiswa laha alatini; laha va nga sangula ku wu nyikela, va lo sangula ku yimbelela lisimu la Jehova hi mipunzu, vaba kambe ni wucenje ga Davida a hosi ya ka Israeli.

²⁸ Wontihe tlhangano wu lo khizama na ku kari ku yimbelelwa lisimu, na ku biwa mipunzu, zontlhe zi simama kala muphahlo wu mbhela.

²⁹ Laha va nga wa mbhetile ku nyikela muphahlo wa kuhiswa, a hosi zinwe ni vanhu vontlhe va lo korama va khozela.

³⁰ Tlhatakumbiri, hosi Hezekia zinwe ni tihosana va lo byela vaLevi a ku dumisa Jehova hi timhaka ta Davida na Asafa a muwoni; va lo yimbelela zalezo va dumisa na va tsakile, va korama va khozela.

³¹ Zonake Hezekia i lo wulawula, aku: Kota lezi mu ti nyikeleko ka Jehova, makunu tshinelani mu neha a miphahlelo ni minyikelo ya kubonga lomu ndlwini ya Jehova! Wontihe tlhangano wu lo neha a miphahlelo ni minyikelo ya kubonga; a vanyingi lava va nga wa zi ranza va lo nyikela muphahlo wa kuhiswa.

³² A tsengo wa minyikelo ya kuhiswa leyi yi nyikelweko hi tlhangano, ku wa hi 70 wa tihomu, ni 100 wa tihamba, ni 200 wa tiyivana, zontlhe lezi zi wa hi za munyikelo wa kuhiswa wa Jehova.

³³ A minyikelo ya kubonga ku wa hi 600 wa tihomu ni 3,000 wa tihamba.

³⁴ Kanilezi a vapristi va wa hi vatsongwani; va lo tsanzeka ku sunzuwula zontlhe lezi zi nga wa hi za miphahlo ya kuhiswa. Hikwalaho va lo vuniwa hi vanakulobye, a va ka Levi, kala va mbheta a ntiro, va wuya a vapristi va ti basisa, hakuva a vaLevi va wa lulamile timbilu ku hunza vapristi kutibasiseni kabye.

³⁵ A miphahlo ya kuhiswa yi wa tele nguvu, zinwe ni mafura ya miphahlo ya kurula, ni zakunwa za miphahlo ya kuhiswa. Zinghaho a ntiro wa ku khozela wa yindlu ya Jehova wu lo lulamiswa.

³⁶ Hezekia zinwe ni vanhu vontlhe va lo tsaka, hakuva Nungungulu i wa chelile a moya wo saseka ka vanhu va tiko, hakuva a xilo lexo xi mahilwe hi xitshuketi.