2 Kronekele 28 - Tshwa Bible

Ahaza a fumela Juda.

¹ Ahaza i wa hi ni 20 wa malembe a xikhati a nga sangula ku fuma; i lo fuma 16 wa malembe le Jerusalema. A nga mahangi kululama mahlweni ka Jehova khwatsi hi dadani wakwe Davida.

² Kanilezi i lo lanzela tindlela ta tihosi ta ka Israeli; i lo wumba zifananiso za vaBaali.

³ Ni kambe i lo hisa a tibani le nkoveni wa nʼwana Hinome, a hisa a vanana vakwe laha nzilweni, a lanzela mahanyela ya matiko lawa Jehova a nga ma hlongola mahlweni ka va ka Israeli. Deut. 18:10; Jer. 7:30

⁴ I lo nyikela miphahlelo, a hisa ni tibani lomu matshanwini ma tlakukileko ni lomu zitsungeni ni lahasi ka tisinya tontlhe to nyuka.

⁵ Hikwalaho Jehova Nungungulu wakwe i lo mu nyikela mandleni ya hosi ya Siria; a vaSiria va mu hlasela, va khoma a vanhu vakwe vo tala va va yisa le Damasku. I lo nyikelwa kambe mandleni ya hosi ya va ka Israeli a hlaselwa nguvu hi yena:

⁶ hakuva Peka nʼwana Remalia i lo daya 120,000 wa vavanuna hi siku ginwe lomu tikweni ga Va ka Juda, vontlhe va wa hi tinhenha; hi kota ya kuya va tiskileko Jehova Nungungulu wa vadadani vabye.

⁷ Zonake Zikri, a nhenha ya va ka Efraime, i lo daya Maaseia a nʼwana wa hosi, na Azrikamu a nduna ya yindlu ya hosi, na Elkana loyi a nga wa gamela hosi.

⁸ A va ka Israeli va lo khoma 200,000 wa vanhu xikari ka vanakulobye, a vavasati, a vafana ni vanhanyana, va va maha tikhumbi; va lo phanga titshomba tinyingi va ti neha le Samaria.

⁹ Kanilezi ku wa hi kona a muprofeti wa Jehova, a vito gakwe hi Odedi; i lo huma a khinga a yimpi leyi yi nga wa wuya Samaria, aku kabye: Jehova Nungungulu wa vadadani va nwina i zangarele va ka Juda a va nyikela mandleni ya nwina, mu va daya hi titsheku, leti ti chikeleko ni le tilweni.

¹⁰ Makunu lezi mu lava ku teka vanana lava va ka Juda ni va le Jerusalema mu va maha tikhumbi ta nwina ta xinuna ni ta xisati! Nwina a mu na nanzu mahlweni ka Jehova Nungungulu wa nwina ke?

¹¹ Makunu nzi ingiseni, mu tlhelisa a tikhumbi leti mu ti khomileko xikari ka vanakuloni, hakuva a zanga ya Jehova yi le hehla ka nwina.

¹² Zonake a vanwani xikari ka tihosana ta va ka Efraime, va nga Azaria nʼwana Johanani, na Berekia nʼwana Mexilemote, na Jehizkia nʼwana Xaluma, na Amasa nʼwana Hadlai, va lo vukela lava va nga wa wuya hi le yimpini;

¹³ vaku kabye: Mu nga enghenisi a tikhumbi leti lomu, hakuva mu lava ku hi engetela a zionho za hina ni milanzu ya hina mu hi vangela nanzu mahlweni ka Jehova; hakuva a nanzu wa hina ngwa hombe, ni zanga ya hombe yi kona hehla ka Israeli.

¹⁴ Zinghaho a vanhu va yimpi va lo siya tikhumbi ni muphango mahlweni ka tihosana ni mahlweni ka wontihe tlhangano.

¹⁵ A vavanuna lava mavito yabye ma kumbukilweko va lo suka va teka tikhumbi; lava va nga wa hi zimbyiri va lo va ambexa hi tinguwo ta muphango, va va nyika zilato, va va phamela, va va nwisa, va va tota mafura, a tikuveri tontlhe ti khiletwa timbongola, va va heleketa le Jeriko mutini wa micinzu ka vanakulobye. Zonake va lo tlhela vaya Samaria.

¹⁶ Xikhatini xwalexo hosi Ahaza i lo rumela xikombelo ka tihosi ta le Assiria, lezaku ti ta mu vunetela;

¹⁷ hakuva vonawu vaEdomi va lo ta engeta va hlasela Juda, va khoma vanwani va famba navo.

¹⁸ A vaFilistia kambe va lo hlasela a miti ya le nkoveni ni le Dzongeni ga tiko ga va ka Juda; va lo teka Bete-Xemexe, na Aijaloni, na Gederote, na Soko ni miti ya kona, na Timna ni miti ya kona, na Gimzo ni miti ya kona ni vaaki va yona.

¹⁹ Hakuva Jehova i kanzihele va ka Juda hi kota ya Ahaza a hosi ya va ka Israeli, hakuva i lo hambunyeta yontlhe milayo lomu tikweni ga ka Juda, a maha kubiha ka hombe a onhela Jehova.

²⁰ Na Tilgate-Pilnesera a hosi ya le Assiria i lo ta mu hlokisa, a mu maha nala wakwe, a nga mu nyenyeleteli.

²¹ Hakuva Ahaza i lo teka a za yindlu ya Jehova ni za yindlu ya wuhosi ni za tihosana, a zi nyikela ka hosi ya le Assiria, ni mihlengo; kanilezi a zi mu vunangi nchumu.

²² Hambu lezo a nga wa hi khombyeni i lo simamisa a onhela Jehova.

²³ Hakuva yena hosi Ahaza i lo phahlela ka vanungungulu va le Damasku lava va mu Wulileko, hakuva i waku: Khwatsi hi lezi a tihosi ta le Siria ti vunetelwako hi vanungungulu va tona, minawu nzi ta va tlhavela miphahlo kasi va fela ku nzi vunetelawu. Kanilezi va lo vuna a ku mu lovisa zinwe ni va ka Israeli.

²⁴ Ahaza i lo tsombanyisa a zibya za yindlu ya Nungungulu a zi fayetela, a vala tivati ta yindlu ya Jehova, zonake a ti akela a maalati matlhelweni wontihe ya Jerusalema.

²⁵ Ni lomu mitini yontlhe ya tiko ga ka Juda i lo aka matshamu ma tlakukileko kasi ku hisa tibani ka vanwani vanungungulu; hi kota ya lezo i zangarisa Jehova Nungungulu wa vadadani vakwe.

²⁶ A zinwani zimaho zakwe ni mitiro yakwe yontlhe yo sangula ni yo gumesa, zi tsalilwe lomu bhukwini ga matimu ya tihosi ta ka Juda ni ta ka Israeli.

²⁷ Ahaza i lo etlela zinwe ni vararu vakwe, va mu lahla laha mutini le Jerusalema, hakuva a va mu enghenisangi xilahleni xa tihosi ta ka Israeli. Zonake a nʼwana wakwe Hezekia i lo fuma xikhundleni xakwe.