2 Kronekele 26 - Tshwa Bible

Kuhlula ka Uzzia.

¹ Zonake a vanhu vontlhe va ka Juda va lo teka Uzzia, na hi ntangeni ya 16 wa malembe, va mu maha hosi xikhundleni xa raru wakwe Amazia.

² Hi yena a nga aka Elote a gi tlhelisela ka mufumo wa ka Juda, anzhako a hosi na yi etlele ni vadadani va yona.

³ Uzzia i wa hi ni 16 wa malembe a xikhati a nga sangula ku fuma; i lo fuma 52 wa malembe le Jerusalema. A vito ga nyine wakwe i wa hi Jekolia wa le Jerusalema.

⁴ I lo maha kululama mahlweni ka Jehova, khwatsi hi lezi a nga maha raru wakwe Amazia.

⁵ I lo chivirika ku hlota Nungungulu masikwini ya Zakaria loyi a nga wa pimisisa miwoniso ya Nungungulu; a masiku wontihe lawa a nga wa hlota Jehova, Nungungulu! lo mu katekisa.

⁶ I lo hlomisa yimpi a yalwa ni vaFilistia, a khungumula a ligingisi la Gate, ni ligingisi la Yabne, ni ligingisi la Axdode, zonake a aka miti lomu tikweni ga Axdode ni ga vaFilistia.

⁷ Nungungulu i lo mu vuna ku hlula vaFilistia ni vaArabia lava va akileko le Gur-Baali ni vaMeunime.

⁸ A va ka Amoni va lo luva ka Uzzia, a wudumo gakwe gi hangalaka gi chikela tlhelo ga Gipite, hakuva i wa kuma a ntamu wa hombe.

⁹ Uzzia i lo aka makhokhola le Jerusalema, hi le nyangweni yo gumesa ni le nyangweni ya le nkoveni ni le gwitsini a ma tiyisa.

¹⁰ I lo aka makhokhola le xiwuleni, a kela tihlowo tinyingi lomo, hakuva i wa hi ni tihomu to tala lomu mikoveni ni lomu tibaleni, ni varimi, ni varimi va zivina le zitsungeni za Karmeli, hakuva i wa ranza mitiro ya wurimo.

¹¹ Ni kambe Uzzia i wa hi ni butho ga zilwi, gi nga wa huma gi yalwa hi mitlawa yi hlayilweko hi Jeieli mutsali, na Maaseia a nduna, na yi rangelwa hi Hanania, a munwe wa tinduna ta hosi.

¹² A tsengo wa tontlhe tihosana ta tiyindlu ta vararu vabye, a vavanuna va tinhenha va wa hi 2,600.

¹³ A hasi kabye ku wa ni yimpi ya 307,500 wa vavanuna va nga walwa hi ntamu wa hombe va vikela hosi loku yilwa ni valala va yona.

¹⁴ Uzzia i lo hlomisa a vanhu vontlhe lavo va yimpi hi zitlhangu, ni matlhari, ni tingenge, ni mabhaji ya ziketse, ni mawura, ni maribye ya tifisga.

¹⁵ Le Jerusalema i lo maha a makina ma polilweko hi titlhari, ma vekiwa hehla ka makhokhola ni lomu magwitsini kasi ku phanda ha wona mipaxa ni maribye ya hombe. A wudumo gakwe gi lo hangalaka giya kule, hakuva i wa vunetelwa hi tindlela ti hlamalisako, kala a kuma ntamu.

A xionho xa Uzzia.

¹⁶ Makunu laha a nga wa hi ni ntamu, a mbilu yakwe yi lo ti kukumukisa kala a huma zineneni; i lo onhela Jehova Nungungulu wakwe hi ku enghena lomu tempeleni ya Jehova a hisa libani laha alatini ga libani.

¹⁷ Zonake mupristi Azaria i lo enghena a mu lanza na hi ni 80 wa vapristi va Jehova, a vavanuna va tinhenha.

¹⁸ Va lo tsimbetela hosi Uzzia, vaku kakwe: Uzzia, lowu a hi ntiro wa wena, a ku hisela Jehova a libani! Lowu i ntiro wa vapristi, a vana va Aroni, lava va nga vona va yimisilweko ku hisa libani. Huma lomu ndlwini yo basa, hakuva wena u onhile! Cima zi nga tava wudzunzo ka wena mahlweni ka Jehova Nungungulu. Ekso. 30:7; Mitse. 18:7

¹⁹ Uzzia 1 lo zangara, na a welele a xibya xo hisela kona libani; na a ha zangarela vapristi, ku lo woneka a hlokonho laha ximombyeni xakwe mahlweni ka vapristi kwalomo ndlwini ya Jehova, kusuhani ni alati ga libani.

²⁰ Mupristi wa hombe Azaria, ni vontlhe vapristi va lo mu cuwuka va wena lezaku i wa hi ni hlokonho laha ximombyeni xakwe, va mu humesa lahandle hi kuhatlisa; i lo huma hi kuhatlisa, hakuva Jehova i wa mu bile.

²¹ Hosi Uzzia i lova ni hlokonho kala sikwini ga kufa kakwe; hi kota ya hlokonho leyo, i lo tshama ndlwini ya vababyi, hakuva i lo valelwa a kuva a nga engheni ndlwini ya Jehova. Zonake a nʼwana wakwe Jotamu i lo fumela a yindlu ya hosi ni ku lamula a vanhu va tiko.

²² A zinwani zimaho za Uzzia zo sangula ni zo gumesa zi tsalilwe hi muprofeti Isaya nʼwana Amozi.

²³ Zonake Uzzia i lo etlela zinwe ni vararu vakwe, va mu lahla navo lomu xilahleni xa tihosi, hakuva va waku: I nani hlokonho. A nʼwana wakwe Jotamu i lo fuma xikhundleni xakwe.