2 Kronekele 25 - Tshwa Bible

Amazia a fumela Juda.

¹ Amazia i lo sangula ku fuma na hi ni 25 wa malembe; i lo fuma 29 wa malembe le Jerusalema. A vito ga nyine wakwe i wa hi Jehoadani wa le Jerusalema.

² I lo maha kululama mahlweni ka Jehova, kanilezi na ku nga hi hi mbilu yakwe yontlhe.

³ Makunu laha a wuhosi gakwe gi nga wa tiyile, i lo daya malanza yakwe tawa ma nga wa dele hosi, a dadani wakwe.

⁴ Kanilezi a nga dayangi a vana vabye; i lo ingisa kuleletela ka nayo wu nga bhukwini ga Mosi, kotisa kuleletela ka Jehova, aku: A vadadani va nga ta dawa hi kota ya vanana, ni vanana va nga ta dawa hi kota ya vararu; kanilezi a munhu ni munhu i ta dawa hi xionho xakwe. Deut. 24:16; Ezek. 18:20

⁵ Ni kambe Amazia i lo tsombanyisa va ka Juda, a xaxameta hi tiyindlu ta vararu vabye a tinduna ta matala, ni tinduna ta mazana lomu tikweni gontlhe ga ka Juda ni ga ka Benjamini, a hlaya vontlhe kusukela ka tava va nga ni 20 wa malembe kuya mahlweni, a kuma 300,000 wa vavanuna va milangelwa, va zi kotako ku hloma yimpi, va khoma matlhari ni zitlhangu.

⁶ Zonake i lo ramba a 100,000 wa tinhenha ta ka Israeli, a va hakhisa a 100 wa titalenta ta siliva.

⁷ Kanilezi ku lota a munhu wa Nungungulu a taku kakwe: Ngha yimpi ya ka Israeli yi nga fambi zinwe na wena, hakuva Jehova a nga zinwe ni va ka Israeli ni vontlhe va ka Efraime!

⁸ Loku u famba navo, hambu loku u hi ni ntamu, Nungungulu i ta ku wisa lahasi mahlweni ka valala va wena, hakuva Nungungulu i na ni ntamu ku vuna ni ku wisa lahasi.

⁹ Amazia i te ngalo ka munhu wa Nungungulu: Nzi ta maha yini hi titalenta leti ta 100 nzi ti nyikeleko ka yimpi ya va ka Israeli? A munhu wa Nungungulu i lo hlamula, aku: Jehova i ta ku nyika zo tala nguvu ku hunza lezo.

¹⁰ Zonake Amazia i lo hambanyisa a yimpi ya ka Efraime lezaku yi tlhela yiya kabye. Kanilezi va lo tlhela vaya kaya na va va zangarele nguvu va ka Juda.

¹¹ Amazia i lo tiya hlana a rangela a vanhu vakwe, vaya le nkoveni wa Munyu va ya hlasela 10,000 wa vavanuna va vaSeire.

¹² A vavanuna va ka Juda va lo khoma 10,000 wa vavanuna va va yisa le xitsungeni xa ribye, va ya va hoxa lahasi, va va chinza vontlhe, bhi!

¹³ Kanilezi a tlawa wa vavanuna lava a nga va tlhelisa, a kuva a nga fambi navo yimpini, va lo ya hlasela a miti ya ka Juda kusukela le Samaria kala le Bete-Horoni, va hlasela 3,000 wa vanhu, va teka muphango wa hombe nguvu.

¹⁴ Makunu laha Amazia a nga wuya hi le ko ya hlasela va ka Edomi, i lo wuya ni vanungungulu va va ka Seire, a ta va maha vanungungulu vakwe, a va khizamela, a va hisela tibani.

¹⁵ Hikwalaho Jehova i lo zangarela Amazia, a mu rumela muprofeti a yaku kakwe: U va lavela yini vanungungulu va lava vanhu, lava va nga ponisangiko a vanhu vabye mandleni ya wena?

¹⁶ Khwatsi hi lezi a nga wa wulawula naye, a hosi yi te ngalo kakwe: Hi ku yimisile a kuva ginwe ga masungukati ya hosi ke? Suka u famba! U laʼku dawelwa yini ke? Zonake muprofeti i lo Suka, aku: Nza wona lezaku Nungungulu i xuvile ku ku lovisa hi kota ya zilo lezi u zi mahileko; a ku ingisangi a gezu ga mina.

¹⁷ Amazia a hosi ya va ka Juda i lo tsema khungo, a rumela mhaka ka Joaxi nʼwana Jehoahaza wa Jehu, a hosi ya va ka Israeli, aku kakwe: Ngone hi ta wonana, hi cuwukana hi mahlo!

¹⁸ Joaxi hosi ya va ka Israeli yi lo rumela mhaka ka Amazia hosi ya va ka Juda, aku kakwe: A muzwa wa le Lebanoni wu lo rumela mhaka ka sinya ya sedare yi nga le Lebanoni, wuku: Nyikela a nhanyana wa wena ka mufana wa mina a maha sati wakwe! Makunu laho ku lo hunza a zihari za khwati za le Lebanoni zi wu kanzihela.

¹⁹ Wena u ngalo: Languta, mina nzi hlulile va ka Edomi, hikwalaho a mbilu ya wena yi na ni matshanza, ya ti kukumukisa; tshama kaya ka wena! Hi kuyini wa ti lavelako mhango ya ku lobyiswa, wena ni vaJuda ke?

²⁰ Kanilezi Amazia cima a nga mu ingisangi, hakuva ku wa hi xilo xi nga wata hi ka Nungungulu, kasi a fela ku Va lovisa hi kota ya lezi va nga ti lavela vanungungulu va ka Edomi.

²¹ Zinghaho Joaxi hosi ya va ka Israeli i lo kanziha; yena na Amazia hosi ya va ka Juda va lolwa le Bete-Xemexe, tikweni ga ka Juda.

²² A va ka Juda va lo hluliwa hi va ka Israeli, va panzanyeka, loyi ni loyi a tsutsumela kaya kakwe.

²³ Joaxi hosi ya ka Israeli i lo khoma Amazia hosi ya ka Juda, nʼwana Joaxi, wa Jehoahaza le Bete-Xemexe, a mu yisa le Jerusalema; i lo khungumula a ligingisi la Jerusalema kusukela laha nyangweni ya ka Efraime kala laha nyangweni ya gwitsi. A kuleha ka lomu ku khungumelweko ku wa hi 400 wa mikono.

²⁴ I lo teka yontlhe nzalama ni siliva, ni zontlhe zibya lezi zi nga wa hi ndlwini ya Nungungulu, lezi zi nga wa hi ka Obedi-Edomi, ni wukosi ga yindlu ya hosi, a khomela ni vanhu a tlhelela le Samaria.

²⁵ Amazia nʼwana Joaxi hosi ya va ka Juda, i lo hanya 15 wa malembe anzhako ka kufa ka Joaxi nʼwana Jehoahaza, hosi ya va ka Israeli.

²⁶ A zinwani zimaho za Amazia zo sangula ni zo gumesa zi tsalilwe lomu ka bhuku ga Matimu ya tihosi ta ka Juda ni ta ka Israeli.

²⁷ Kusukela xikhatini lexo Amazia a nga fularela Jehova, ku lo bohiwa xikungo le Jerusalema xa ku mu vukela; zonake i lo chavela le Lakixe. Kanilezi va lo rumela vanhu va mu lanza kwale Lakixe, va ya mu daya.

²⁸ Va lo mu rwala hi mahaxi va ta mu lahla zinwe ni vadadani vakwe mutini wa va ka Juda.