2 Kronekele 23 - Tshwa Bible

Jehoiada a vukela Atalia.

¹ Hi lembe ga wuntlhanu ni mambiri, Jehoiada i lo tiya, a maha xivumelwano ni tinduna ta mazana: Azaria nʼwana Jehoramu, na Azaria nʼwana Obedi, na Maaseia nʼwana Adaia, na Elixafate nʼwana Zikri.

² Va lo enzela a tiko gontlhe ga ka Juda, va tsombanyisa va ka Levi va yontlhe miti ya va ka Juda, ni tihosana ta tiyindlu ta vadadani va ka Israeli vata le Jerusalema.

³ Wontihe tlhangano wu lo maha xivumelwano ni hosi lomu ndlwini ya Nungungulu. Jehoiada i te ngalo kabye: Hi loyi nʼwana wa hosi, loyi a faneleko ku fuma, khwatsi hi lezi Jehova a wulileko xungetano hi vana va Davida.

⁴ Makunu mu ta maha lezi: a xipanze xa nwina xa wunharu, nwina vapristi ni vaLevi lava mu enghenako ntirweni hi siku ga sabado mu ta rinzela tinyangwa;

⁵ a xinwani xipanze xa nwina xa wunharu xi tava lomu ndlwini ya hosi, a xinwani xipanze xa wunharu xi tava nyangweni ya Jesode; kanilezi a vanhu vontlhe va ta yima le tihubyeni ta yindlu ya Jehova.

⁶ Kanilezi ku nga engheni munhu lomu ndlwini ya Jehova ahandle ka vapristi ni va ka Levi lava va khozelako; lavo va ta enghena hakuva va basile. Kanilezi a vanhu vontlhe va ta hlayisa a zileletelo za Jehova.

⁷ Vontlhe va ka Levi va ta ranzela hosi na va welele matlhari yabye; ni wihi loyi a ta nga lava ku enghena lomu ndlwini, i ta dawa. Kanilezi nwina mu tava ni hosi loku yi enghena ni loku yi huma.

⁸ Zinghaho a vaLevi ni vontlhe va ka Juda va lo maha zontlhe kota kuleletela ka mupristi Jehoiada; munwe ni munwani i lo teka a vanhu vakwe lava va enghenako hi siku ga sabado ni lava va humako hi siku ga sabado, hakuva mupristi Jehoiada a nga tlhatlhangi a mitlawa leyi yi humako.

⁹ Mupristi Jehoiada i lo nyika ka tinduna ta mazana a tisupado, ni tingenge, ni zitlhangu lezi zi nga wa hi za hosi Davida, zi nga wa hi lomu ndlwini ya Nungungulu.

¹⁰ Zonake i lo yimisa vontlhe vanhu, ni loyi ni loyi na a welele a tlhari gakwe, kusukela tlhelo ga xinene ga yindlu kala tlhelo ga xibhabha kusuhani ni alati ni yindlu, va ranzela hosi.

¹¹ Zonake va lo humesa a nʼwana wa hosi, va mu tlhateka xidlodlo xa wuhosi hlokweni yakwe, va mu nyika ni Bhuku ga milayo; va lo mu wumbela a kuva hosi. Jehoiada zinwe ni vanhu va lo mu tota hi mafura, vaku: Ngha hosi yi hanya!

¹² Laha Atalia a ngazwa a guwa ga vanhu ga kutsutsuma-tsutsuma va dumisa hosi, i lota enghena ndlwini ya Jehova xikari ka vanhu.

¹³ I lo wona a hosi na yi yimile wutshanwini ga yona hi laha nyangweni, a tinduna ni vabi va mipunzu na va hi laha hosini; vontlhe vanhu va tiko va wa hi kutsakeni, na vaba mipunzu. A vayimbeleli kambe va wa hi ni timbila, va yimbelela tisimu ta kubonga. Zonake Atalia i lo hanzula a tinguwo takwe, aku: Kuhluwuka! Kuhluwuka!

¹⁴ Mupristi Jehoiada i lo vitana a tinduna ta mazana, a varangeli va yimpi, tita mahlweni, aku ka tona: Mu humeseni xikari ka vanhu, kasi ni wihi loyi a ta nga mu lanza a fela ku dawa hi tlhari! Hakuva mupristi i waku: Mu nga mu dayeli ndlwini ya Jehova!

¹⁵ Zonake va lo mu khoma, va mu yisa ndlwini ya hosi hi nyangwa ya mahaxi, va mu dayela lomo.

¹⁶ Jehoiada i lo maha xivumelwano xikari kakwe ni vanhu ni hosi, lezaku vona va tava vanhu va Jehova.

¹⁷ Zonake vontlhe vanhu va lo enghena lomu ndlwini ya Baali va yi khungumula, va fayetela ni maalati yakwe, ni zifananiso zakwe, va daya na Mattani a mupristi wa Baali mahlweni ka maalati yakwe.

¹⁸ Jehoiada i lo yimisa a vahlayisi lomu ndlwini ya Jehova vava lahasi ka vapristi va vaLevi, lava Davida a va xaxametileko hi mitlawa yabye lomu ndlwini ya Jehova, a ku nyikela a muphahlelo wa kuhiswa ka Jehova, khwatsi hi lezi ku tsalilweko nayweni wa Mosi, na va kari va tsaka va yimbelela, khwatsi hi lezi Davida a leleteleko.

¹⁹ I lo yimisa a vahlayisi va tinyangwa ta yindlu ya Jehova, kasi ku nga engheni a munhu loyi a nyenyezisilweko hi xilo xo kari.

²⁰ I lo teka a tinduna ta mazana, ni masingalakati, ni vafumeli va vanhu ni vanhu vontlhe va tiko, va relelisa a hosi yi huma ndlwini ya Jehova, va ya enghena ndlwini ya hosi hi nyangwa ya le hehla, va ya yi veka laha xitshanwini xa yona xa wuhosi.

²¹ A vanhu vontlhe va tiko va lo tsaka; ni muti wontihe wu wa hi kuruleni anzhako na va dele Atalia hi supado.