2 Kronekele 19 - Tshwa Bible

Jehoxafate a fumela hi nongameto.

¹ Jehoxafate a hosi ya ka Juda i lo tlhela hi kurula aya ndlwini yakwe le Jerusalema.

² Jehu nʼwana wa muprofeti Hanani i lo suka ku mu khinga; i te ngalo ka hosi Jehoxafate: A wa kubiha i fanele ku vunetelwa ke? U ranza lava va vengako Jehova ke? Hi kota ya lezo Jehova i ku zangarele.

³ Hambu lezo zi kona zilo zo saseka zi kumilweko ka wena, hakuva wena u susile a zifananiso za Axtarte lomu tikweni, u hlota Nungungulu hi mbilu yontlhe ya wena.

⁴ Jehoxafate i lo tshama Jerusalema; kanilezi i lo engeta a suka a fambafamba xikari ka vanhu kusukela le Berexeba kala le mugangeni wa ka Efraime, a wuyiseta a vanhu ka Jehova Nungungulu wa vadadani vabye.

⁵ I lo yimisa a Valamuli lomu tikweni, a mitini yontlhe ya makhokhola ya va ka Juda, ka muti ni muti. Deut. 16:18

⁶ I te ngalo ka Valamuli: Ti woneleni ka lezi mu ta nga zi maha, hakuva a mu lamuli hi ku rumiwa hi vanhu, kanilezi mu rumiwa hi Jehova; hikwalaho mu zinwe na yena kulamuleni ka nwina. Rom. 13:1

⁷ Makunu ngha mu chava Jehova, mu ti wonela ka lezi mu ta nga zi maha hakuva ku hava kukanganyisa ka Jehova Nungungulu wa hina, hambu ku cuwuka xiyimo xa munhu, ge hambu ku rengelelwa. Miti. 10:34; Rom. 2:11; Efe. 6:9

⁸ Le Jerusalema, Jehoxafate i lo yimisa va ka Levi, ni vapristi, ni tinduna ta tiyindlu ta vararu va ka Israeli ku lamula timhakeni ta Jehova, ni timhakeni ta timholova ta vanhu.

⁹ I lo va leletela, aku: Mu ta maha lezi hi ku chava Jehova, mu tsumbeka, ni timbilu ti basileko.

¹⁰ Kani hi yihi mhaka yi ta nga nehiwa ka nwina hi vanakuloni va akileko mitini yabye, loku ti hi timhaka ta kudaya, ni ta nayo, kutani ta zileletelo, ni ziyimiso, kutani ta kulaya, mu ta va khongotela, kasi va nga gohi ka Jehova, kasi mu nga vukelwi hi zanga ya Jehova ni vanakuloni. Mahani lezo kasi mu nga kumi nanzu,

¹¹ Hi loyi mupristi wa hombe Amaria, i yimisilwe hehla ka nwina a ku wulawula tontlhe timhaka ta Jehova; na Zebadia nʼwana Ixmaeli, a mufumeli wa yindlu ya ka Juda, i leletelwe tontlhe timhaka ta hosi; ni vahlayisi lava va ta nga mu vuna hi vona vaLevi. Tiyani hlana, mu tira! Jehova i tava zinwe ni vanhu va nene.