2 Kronekele 18 - Tshwa Bible

Jehoxafate na Ahabi va vukela Ramote-Gileade.

¹ Makunu Jehoxafate i wa hi ni titshomba ni wudumo ga hombe nguvu; i lo maha wuxaka na Ahabi hi ku tekana.

² Anzhako malembe yo kari i lo relela aya ka Ahabi le Samaria; Ahabi i lo tlhavela Jehoxafate ni vanhu vakwe a tiyivu ni tihomu to tala nguvu; i lo mu kucetela ku kanziha aya naye le Ramote-Gileade.

³ Ahabi a hosi ya ka Israeli i te ngalo ka Jehoxafate a hosi ya ka Juda: Hi ngaya zinwe le Ramote-Gileade ke? Jehoxafate a hlamula, aku: Nzi kotisa wena, ni vanhu va mina va ta kotisa vanhu va Wena; hi tava zinwe na wena yimpini.

⁴ Jehoxafate i te ngalo ka hosi ya ka Israeli: Hi nga ranga hi ku wutisa a gezu ga ka Jehova nyamutlha.

⁵ Zonake a hosi ya ka Israeli yi lo tsombanyisa vaprofeti, 400 wa vavanuna, aku kabye: Xana hi hloma a yimpi hi yalwa na Ramote-Gileade, kutani nzi ngayi ke? Vona vaku kakwe: Famba, hakuva Nungungulu i ta va nyikela canjeni ga hosi.

⁶ Kanilezi Jehoxafate i te ngalo: Kasi a ku na muprofeti wa Jehova hi nga zi kotako ku wutisa ka yena ke?

⁷ A hosi ya ka Israeli yi hlamula, yiku ka Jehoxafate: KU sele munhu munwe loyi hi faneleko ku wutisa ha yena ka Jehova, kanilezi mina nza mu venga, hakuva cima a nga nzi profeteli zo saseka; kanilezi i nzi profetela zo biha wontihe masiku. A muprofeti wa kona hi Mikaia nʼwana Imla. Jehoxafate i te ngalo: Hosi ngha yi nga wuli lezo.

⁸ Zonake a hosi ya ka Israeli yi lo vitana a nanza yiku ka gona: Hatlisa u ya vitana Mikaia nʼwana Imla.

⁹ Makunu a hosi ya ka Israeli na Jehoxafate a hosi ya ka Juda va wa tshamile, loyi ni loyi xitshanwini xakwe xa wuhosi, na va ambele tinguwo ta wuhosi, laha hubyeni ya nyangwa ya Samaria, vontlhe vaprofeti na va kari va profeta mahlweni kabye.

¹⁰ Zonake Zedekia nʼwana Kenaana i lo ti mahela timhonzo ta ziketse, a ku ngalo: Hi timhonzo leti wena u ta nikinya vaSiria kala u va lovisa.

¹¹ Zinghaho vontlhe vaprofeti va lo profetisa zalezo, vaku: Kanziha uya le Ramote-Gileade, u ta ya hlula, hakuva Jehova i ta va nyikela canjeni ga hosi.

¹² A nanza legi gi nga ya vitana Mikaia gi lo wulawula naye, giku: Languta, a vaprofeti va wulile hi nomu munwe a mhaka yo saseka ka hosi; hikwalaho ngha ya wenawu mhaka yi fanana ni yabye, u wulawula kusasa!

¹³ Mikaia i lo hlamula, aku: Nzi hlambanya ha Jehova a hanyako; lezi yena a ta nga wula ka mina, hi zalezo nzi ta nga wula zona!

¹⁴ Laha a nga wa tile ka hosi, a hosi yi te ngalo kakwe: Wena-ke Mikaia, hi hloma yimpi hi yalwa le Ramote-Gileade, kutani hi ngayi ke? Yenawu i te ngalo: Kanzihani mu ya vuvuma; va ta nyikelwa mandleni ya nwina!

¹⁵ A hosi yi te ngalo kakwe: Kala rini na nza ha ku byela ku wulawula zinene ka mina vitweni ga Jehova ke?

¹⁶ Mikaia aku: Mina nzi lo wona va ka Israeli vontlhe na va hangalakile zitsungeni kotisa tiyivu ti nga hiko na murisi, Jehova na aku: A vanhu lava a va na nwinyi; munwe ni munwani a tlhele aya ndlwini yakwe!

¹⁷ A hosi ya ka Israeli yi te ngalo ka Jehoxafate: A nzi ku byelangi lezaku yena a nga profeti kusasa ha mina, kanilezi kubiha ntsena ke?

¹⁸ Mikaia i te ngalo: Zwanani-ke a gezu ga Jehova! Mina nzi lo wona Jehova na a tshamile xitshanwini xakwe xa wuhosi, na a hi zinwe ni yimpi yontlhe ya le tilweni, na yi yimile canjeni gakwe ga xinene ni ga xibhabha.

¹⁹ Jehova aku: Himani a ta nga ya khohlisa Ahabi a hosi ya ka Israeli, kasi a fela ku kanziha aya le Ramote-Gileade a ya fela kona ke? Loyi i lo hlamula lezi, a munwani a hlamulawu leziya.

²⁰ Zonake ku lo huma a moya wu yima mahlweni ka Jehova, wu ku ngalo: Mina nzi ta ya mu khohlisa! Jehova aku ka wona: Hi ndlela muni ke?

²¹ Wona wu te ngalo: Nzi ta ya maha moya wa mawunwa milonwini ya vaprofeti vakwe vontlhe. Jehova i te ngalo: Hakunene u ta ya mu khohlisa u mu hlula; yana u ya maha zalezo!

²² Hikwalaho i enghenisile a moya wa mawunwa milonwini ya vaprofeti va wena vontlhe; Jehova i wulile kubiha ha wena.

²³ Zonake Zedekia nʼwana Kenaana i lo tshinela kusuhani ka Mikaia a mu phakata, aku kakwe: A Moya wa Jehova wu humisile kuyini ka mina wu ta wulawula ka wena ke? Joh. 18:22; Miti. 23:2

²⁴ Mikaia i lo hlamula, aku: Wena u ta zi wona a siku lego u ta nga huma hi lomu kwarutwini u ya fihlala ka yinwani kwarutu.

²⁵ A hosi ya ka Israeli yi te ngalo: Khomani Mikaia mu mu yisa ka Amoni a nduna ya muti ni ka Joaxi nʼwana wa hosi,

²⁶ mu ya ku ngalo ka vona: A hosi yi ngalo: Enghenisani inaloyi paxweni, mu mu phamela zakuga za tsheku ni mati ya tsheku, kala nzi wuya hi kurula.

²⁷ Mikaia i lo hlamula, aku: Loku wena futsi u wuya hi kurula, Jehova a nga wulawulangi ka mina. I lo engeta kambe aku ngalo: Zwanani nwina nwentlhe vanhu!

²⁸ Zinghaho a hosi ya ka Israeli yi lo kanziha yiya le Ramote-Gileade zinwe na Jehoxafate a hosi ya ka Juda.

²⁹ A hosi ya ka Israeli yi te ngalo ka Jehoxafate: Mina nzi ta ambala tinwani tinguwo nzi enghena lomu yimpini; kanilezi wena ambala tinguwo ta wena ta wuhosi. Zinghaho a hosi ya ka Israeli yi lo ti hunzula, vaya yimpini.

³⁰ Makunu a hosi ya le Siria yi wa leletele a tinduna ta tikareta ta yona, yiku: Mu ngalwi ni munhu; kani wa tsongwani kani wa hombe, saseka a hosi ya va ka Israeli basi.

³¹ Laha a tinduna ta tikareta ti nga wona Jehoxafate, ti te ngalo: Hi leyi a hosi ya ka Israeli! Va lo yi ranzela a kuva valwa naye. Kanilezi Jehoxafate i loba huwa; zonake Jehova i lo mu ponisa, Nungungulu a va kucetela ku mu tsika.

³² Laha a tinduna ta tikareta ti nga wona lezaku a hi yona hosi ya ka Israeli, ti lo mu tsika.

³³ Zonake a munwani wanuna i lo phanda a paxa wakwe, a fula a hosi ya ka Israeli na a nga yi tivi; i lo yi fula hi laha matlhanganweni ya xikatawu xakwe xa xiketse. Ahabi i te ngalo ka mufambisi wa kareta yakwe: Hunzuluka u nzi humesa lomu yimpini, hakuva nzi khuvazilwe nguvu.

³⁴ Kanilezi a yimpi yi lo kula lego siku; hambu lezo a hosi ya ka Israeli yi lo tshama lomu kareteni ya yona yi cuwukana ni maSiria kala laha gambyeni; kupeleni ka gambo yi lofa.